Skessuhorn - 09.11.2022, Blaðsíða 24

MIÐVIKUDAGUR 9. NÓVEMBER 202224
Borgnesingurinn Rúnar Gíslason
er nýjasti viðmælandi hlaðvarps-
þáttarins Skinkuhorns á skessu-
horn.is. Hann starfar sem rann-
sóknarlögreglumaður í lögreglu-
umdæmi Suðurnesja og fór yfir
helstu þætti starfs síns í þætti vik-
unnar. ,,Þetta gerðist svolítið óvart.
Þetta átti að vera sumarstarf en mig
langaði að sækja um til að víkka
sjóndeildarhringinn. Svo bara fest-
ist maður í þessu eins og gjarnan vill
verða. Ég vann náttúrlega í átta ár á
Landnámssetrinu í Borgarnesi. Ég
byrjaði þar sem uppvaskari þegar ég
var ungur en vann svo í öllu þarna
með árunum. Ég flutti svo í bæinn
og ætlaði að fara að mennta mig en
fattaði svo að ég hef engan áhuga á
því að mennta mig. Eða ég allavega
vissi ekki í hverju ég vildi mennta
mig svo ég fór að vinna með
börnum í grunnskóla. Kennarar eru
svo í fríi á sumrin þannig ég fór að
leita mér að sumarvinnu. Þá réði ég
mig hjá Lögreglunni á Norðurlandi
vestra, sem sagt á Sauðárkróki. Ég
endaði á því að vera þar í þrjú ár
og líkaði það afar vel. Svo langaði
mig að færa mig sunnar á bóginn og
prófa meira, þá vann ég á Vestur-
landi í eitt sumar með starfsstöðvar
í Borgarnesi og á Akranesi,“ segir
Rúnar um vegferð sína í lögreglu-
starfinu.
Vildi fara sem fyrst
aftur til Suðurnesja
Rúnar fer svo í lögreglunám við
Háskólann á Akureyri og endar í
starfsnámi á Suðurnesjum. ,,Ég fer
þangað í starfsnám og hugsaði að
það vill enginn heilvita maður búa
eða starfa á Suðurnesjum! Ég get
klárað starfsnámið þar og mun svo
sennilega aldrei eiga leið þangað
aftur nema þegar ég fer í flug. Svo
líkaði mér bara svo rosalega vel
þarna og þegar ég kláraði mitt lög-
reglunám ákvað ég að ég vildi fara
sem fyrst þangað aftur og hef verið
þar síðan.“
Alvarleg mál eiga
sér ekki landamæri
Hvernig mál erum við helst að
takast á við hérna á Vesturlandi?
,,Maður sér það í tölfræðinni að
umferðarmálin vega þyngst á Vest-
urlandi, sem betur fer held ég. Því
miður höfum við séð það í fréttum
að alvarleg mál eiga sér samt
hvorki landamæri né sveitarfélaga-
mörk. Það gerast öll mál í öllum
landshlutum. Ég var ekki að kljást
við nein svakaleg mál á Vesturlandi
en svona upp til hópa býr hér bara
siðað og þægilegt fólk.“
Getum lent í
erfiðleikum í lífi og starfi
Hvernig er að starfa sem lögreglu-
maður, tekur starfið ekki aðeins á
sálina stundum? ,,Ég hef stundum
verið spurður að því hvernig er að
starfa sem lögreglumaður, einmitt
upp á þetta að gera. Vissulega erum
við með mjög mikinn snertiflöt við
allt það alvarlegasta sem kemur
upp á í okkar samfélagi. Ef eitthvað
á bjátar hringir fólk í neyðarnúm-
erið 112 og það er vettvangur sem
ég vinn á sem viðbragðsaðili en ég
hef reynt að horfa á þetta þannig
að ég myndi sennilega reyna að
finna mér eitthvað annað til að
barma mér yfir ef ég væri að vinna
annars staðar. Þeir hlutir sem við
erum að kljást við í lögreglunni
eru hlutir sem munu hvort eð er
gerast, hvort sem ég vinn þar eða
ekki. Það skiptir ekki máli hvort ég
vinni þarna eða sem blaðamaður á
Skessuhorni, ég get lent í erfiðum
atvikum og stressandi aðstæðum.
Sem dæmi var ég búinn að vinna í
lögreglunni í þónokkurn tíma áður
en ég kom að andláti eða endur-
lífgun en ég þekki fólk sem hefur
komið að erfiðum aðstæðum og
gert ýmislegt sem það skrifaði ekki
upp á að vilja gera. Við lendum í
ýmsu, hvort sem maður er heima,
uppi í sófa eða í vinnunni þannig
að ég hef reynt að nálgast þetta
með því hugarfari.“
Hlusta má á viðtalið við Rúnar
Gíslason í Skinkuhorninu, á
skessuhorn.is og Spotify.
sþ
Skinkuhorn — Rúnar Gíslason
Skinkuhornið
er komið á Spotify!
Skannaðu QR kóðann til að hlusta!

Gamla myndin
Í tilefni þess að á næsta ári fagnar Skessuhorn 25 ára starfsafmæli hefur ritstjórn blaðsins
verið að grúska í gömlum myndakössum sem geyma myndir fyrir og í kringum síðustu
aldamót. Mynd vikunnar er frá því í kringum aldamótin síðustu og er tekin í Borgarnesi af
krökkum á leið í eða úr fótbolta sem eru greinilega stolt af sínu liði.
Í gær kom út ný bók eftir Ævar
Þór Benediktsson sem ber heitið
Drengurinn með ljáinn. Bókin er
gefin út af Forlaginu og er þrítug-
asta bók höfundar. „Þetta er barna-
og unglingabók um dauðann og
hvað hann getur verið hræðilegur
en líka fallegur á sama tíma,“ segir
Ævar í samtali við Skessuhorn.
Myndheimur bókarinnar er eftir
yngri bróður Ævars, Sigurjón Lín-
dal Benediktsson, sem er nemandi
á listnámsbraut í Verkmenntaskóla
Akureyrar. „Ég hef teiknað síðan
ég man eftir mér og það hefur
lengi verið grínast með það í fjöl-
skyldunni hvenær ég fari að teikna
eða vinna með Ævari,“ segir Sig-
urjón en þetta er fyrsta bókin sem
hann myndlýsir. Það eru myndir
á öllum blaðsíðum bókarinnar
nema einni og segir Ævar það hafa
gerst náttúrlega. „Við settum bók-
ina þannig upp að hún er eins og
hún hafi komið voða fín úr prentun
en svo hafi aðalpersónan komist í
hana og byrjað að krota og krassa,
því það er það sem aðalpersónan
gerir í gegnum söguna, krotar hér
og krassar þar,“ segir
Ævar en samstarf
þeirra bræðra gekk
þannig fyrir sig að
Ævar sendi Sigurjóni
þær síður sem voru
tilbúnar hverju sinni
og Sigurjón hafði þá
lausan taum til þess
að skapa myndheim í
kringum þann texta.
„Svo sendi hann bara
á mig athugasemdir,
t.d. ef hann vildi
meira af einhverju
eða minna,“ segir
Sigurjón.
Þeir bræður gefa
ekki upp hvort áfram-
haldandi samstarf sé í
kortunum en hugmyndin af þeirra
samstarfi við þessa bók kviknaði um
jólin 2019. Þá gaf Sigurjón öllum
systkinum sínum kolateikningu í
jólagjöf. „Mér fannst teikningin svo
ótrúlega flott og fékk þá þessa flugu
í hausinn að við yrðum að gera eitt-
hvað saman,“ segir Ævar.
Á sunnudaginn, 13. nóvember,
verður úgáfuhóf bókarinnar haldið
í versluninni Nexus í Glæsibæ
klukkan 14. Ævar og Sigurjón
verða báðir á staðnum og segja þeir
að aldrei sé að vita nema gefnar
verði nokkrar bækur. Allavega
verði upplestur úr bókinni, áritanir
og almenn gleði og hamingja. – En
hvar verður hægt að kaupa bókina?
„Alls staðar þar sem maður getur
keypt bækur og sums staðar þar
sem maður getur keypt mat,“ segir
Ævar kankvís að lokum, en skilja
má það svar sem svo að bókin fáist í
öllum helstu bókabúðum.
gbþ
Drengurinn með
ljáinn kom út í gær
Teikningar eru á öllum síðum bókarinnar, nema einni.
Bókin Drengurinn með ljáinn kom út í gær.
Myndheimur bókarinnar er eftir Sigurjón Líndal Benedikts-
son.