Árbók Hins íslenzka fornleifafélags - 01.01.1992, Qupperneq 176

180
ÁRBÓK FORNLEIFAFÉLAGSINS
1992 var því fyrsta heila starfsárið sem minningarstofan er opin. Safnvörður Byggðasafns
Dalvíkur er Friðjón Kristinsson.
Byggðasafn Egils Ólafssonnr að Hnjóti i Örlygshöfn
Byggðasafn Egils Olafssonar að Hnjóti í Orlygshöfn er opið yfir sumartímann frá 20. maí
til 1. október. Á þeim tíma komu 3.600 gestir. Egill Ólafsson, safnvörður, hefur byggt safnið
upp í frístundum sínum og eru þar nú 2.200 munir og barst honum töluverður fjöldi í hend-
ur á árinu.
Stækkun safnsins hófst á þessu ári og var viðbyggingin, sem er spegilmynd gamla húss-
ins, glerjuð nú í vetur. Nú er því stærsta hluta verksins lokið og vantar aðeins herslumuninn
til að það verði fullunnið. Tengibygging sem er um 100 fermetrar kemur m.a. til með að hýsa
fjölþætta starfsemi, s.s. kaffisölu o.fl. Stefnt er að opnun árið 1994.
Byggðasafn Vestfjarða
Starfsemi Byggðasafns Vestfjarða var að mestu hefðbundin á árinu. Jón Sigurpálsson, for-
stöðumaður, er eini fasti starfsmaður safnsins og mæðir því flest á honum, en yfir sumartím-
ann voru ráðnir tveir starfsmenn til yfirsetu í safninu. Fjölmargar gjafir voru gefnar á árinu
og hafa gjafir tengdar sjósókn orðið mun meira áberandi hin síðari ár. Má sennilega rekja það
til þess tíma er sjóminjadeild safnsins opnaði í Turnhúsinu í Neðstakaupstað 1987.
Safngestir á seinasta ári losuðu sjöunda þúsundið. Hingað til hefur ekki verið selt inn á
safnið en kassi fyrir frjáls framlög og gestabók hafa legið frammi. Drjúgt safnaðist í kassann
og um 75% gesta rituðu nafn sitt í gestabók. I safninu var hægt að kaupa safnvísinn, póst-
kortin og veggspjaldið, sem Tryggvi Ólafsson listmálari gaf safninu svo og harðfisk. Byggða-
safn Vestfjarða er tvískipt á þann hátt að þeir safnmunir, sem ekki teljast til sjóminja hafa
verið til sýnis í risi sundhallarinnar við Austurveg. Það húsnæði er einstaklega óhentugt og
sl. sumar var ekki mögulegt að hafa það húsnæði opið. Vilji manna stendur til að finna nýtt
húsnæði eða byggja og þá helst í nágrenni við Sjóminjasafnið í Neðstakaupstað.
Safnið opnaði útibú á Flateyri í tilefni af 75 ára afmæli Flateyrarhrepps 25. júní og fékk til
afnota „Sænska húsið", sem er í eigu Sparisjóðs Flateyrarhrepps. Safngestir þá tvo mánuði,
sem útibúið var opið voru rúmlega 2.500. Fjölmargir munir bárust safninu í kjölfarið og er
hugmyndin að þar verði minjasafn Önfirðinga.
Byggðasafn Húnvctninga og Strandamanna
Byggðasafn Húnvetninga og Strandamanna að Reykjum í Hrútafirði er opið almenningi
þrjá mánuði yfir sumartímann; júní, júlí og ágúst. Á þeim tíma komu í safnið 1.195 gestir.
Yfir vetrarmánuðina er safnið opið þeim nemendum sem stunda nám í skólabúðum í Reykja-
skóla og komu 1.959 nemendur og kennarar á árinu í safnið svo samtals sóttu það um 3.154
gestir. Forstöðumaður safnsins er Guðmundur Karlsson.
Helsta verkefnið á árinu var vinna inni í safninu við uppsetningu skálabæjar frá Tungu-
nesi í Austur-Húnavatnssýslu, en ekki vannst tími til að ljúka því verki áður en safnið opn-
aði. Vonir standa til að því verki Ijúki fyrir komandi sumar.
Byggðasafn Skagfirðinga
Þann 14. júní var haldið upp á 40 ára opnunarafmæli Byggðasafns Skagfirðinga að Glaum-
bæ og heimsóttu 16.350 gestir safnið afmælisárið, en það eru um 2.000 færri en árið áður.
Innlendum gestum fer þó fjölgandi. Eftir hátíðardagskrá í Glaumbæjarkirkju var gestum
boðið í heitt súkkulaði og meðlæti í Glaumbæ. Þar inni í baðstofu sátu nokkrar konur og
sýndu vinnubrögð tengd tóvinnu í gamla daga og þrír félagar úr harmonikkuklúbb sýslunn-
ar þöndu nikkurnar. Sumir tóku undir með söng, aðrir stigu dans og var glatt á hjalla. Af
öðrum uppákomum má nefna að hópur skólanema kom í safnið og fékk uppfræðslu um bú-
skaparhætti og byggingar fyrri tíðar. Þá var um mánaðamótin júní-júlí opnuð svo kölluð
Drangeyjarsýning á vegum Byggðasafnsins í Pakkhúsinu á Hofsósi. Þar voru sýndir munir