Lesbók Morgunblaðsins - 19.12.1988, Blaðsíða 39
HRAFN GUNNLAUGSSON
Blús
Ég hef heyrt slúður um sterka leiki
sem þú hafðir í frammi
árin sem ég var annars hugar.
Ástæðulaust að æsa sig.
Þetta er liðið.
Aðeins ef elskhugar þínir
gengju ekki aftur
í ást þinni og atlotum.
Ég vil ekki eiga vingott við þá.
Ef einhver elskar í gegnum þig
þá elskar hann mig.
Það er allt og sumt.
Hafðu samt engar áhyggjur
sjálfur er ég út og suður
kannast ekki við veginn
sem ég ferðaðist í gær.
Samt rata ég alltaf í faðm þinn
í sólblindu og svartnætti.
Við erum ennþá
við sama heygarðshornið.
Höldum lífi í hvort öðru
með eijum og innilegum sáttafundum.
Sólin sem skríður úr egginu
hvern morgun.
Minningarnar fastar í gömlu íbúðinni.
Og við hér og þar hjá hvort öðru.
Höfundurinn er kvikmyndaleikstjóri og hefur að undanförnu verið dagskrár-
stjóri hjá Sjónvarpinu. Ljóðið er úr nýrri Ijóöabók hans, sem heitir „Reinri-
leikar í birtunni" og út er komin hjá Vöku-Helgafelli. Ljóðin i bókinni eru
frá undanförnum áratug og tengjast reynslu höfundar við kvikmyndaleik-
stjórn. [ bókinni eru einnig myndverk eftir Egil Eðvarösson, myndlistar-
og kvikmyndageröarmann. Myndefniö er sótt í Ijóöin og tengist kynnum
hans og höfundarins.
f
Mynd: Egill Eðvarðsson
Gísli Sigurðsson: Jarðlíf, 1988.
JÓN FRÁ PÁLMHOLTI
Jarðlíf
Jörðin og við á jörðinni.
Tíminn nagar okkur innvortis.
Hví erum við stödd í öryggisleysi?
Borð skápur og stóll
hversdagsfatnaður og eldhús.
Ungu lifandi kynfrumur
á jörðu undir sól.
Tímann mælum við í mannsævum.
Gjaldheimta skírteini stimpill
og við öll.
Hraðfleygar aldir í sporbaugnum
fæðing og dauði
jörð sól og menn
í hrikaleik þessarar tröllriðnu stundar.
Ljóðfundur
Brimskafl lyftir hlátri eldsins
rauðum örmum og spyr:
Fáum við kveikt daginn?
Munum við enn rísa með sól
og heilsast, reka fleyg í gijótið?
Fjöll eru köld
og vötnin grá
spegla ekki blámann í augum þínum.
Við munum enn vaka
og aðgæta jörðina.
Höfundur er skáld í Reykjavik.
LESBÓK MORGUNBLAÐSINS 19. DESEMBER 1988 39