Morgunblaðið - 03.11.2003, Side 10

FRÉTTIR
10 MÁNUDAGUR 3. NÓVEMBER 2003 MORGUNBLAÐIÐ
ÖSSUR Skarphéðinsson, formaður
Samfylkingarinnar, lagði m.a.
áherslu á það í lokaræðu sinni á
landsfundi Samfylkingarinnar í gær
að fundurinn hefði samþykkt að
taka pólitíska forystu í heilbrigð-
ismálum. Sagði hann það tímamót
að flokkurinn ætlaði að taka forystu
í þessum málaflokki. „Við ætlum að
leyfa okkur þann munað að skoða
nýjar leiðir [í heilbrigðismálum] en
við ætlum alltaf að gera það með
það fyrir augum að aðgengi verði
óbreytt og alltaf óháð efnahag.“
Í stjórnmálaályktun sem fundur-
inn afgreiddi í gær segir að Sam-
fylkingin vilji beita sér fyrir fram-
tíðarlausn í heilbrigðismálum „þar
sem nýjar leiðir og fjölbreyttari
rekstrarform, svo sem þjónustu-
samningar og einkaframkvæmd,
eru skoðuð, án þess að missa sjónar
á þeirri stefnumörkun flokksins að
allir hafi jafnan aðgang að heil-
brigðisþjónustu óháð efnahag“. Síð-
an segir að Samfylkingin hafni
einkavæðingu í velferðarkerfinu.
„Ríkið á að vera kaupandi heil-
brigðisþjónustunnar en þarf ekki í
öllum tilvikum að vera seljandi
hennar,“ segir ennfremur í álykt-
uninni. „Til að hægt sé að reyna
nýjar leiðir í rekstri heilbrigðiskerf-
isins þurfa þó eftirtaldar forsendur
að vera til staðar: Allir hafi jafnt að-
gengi að heilbrigðisþjónustunni,
óháð efnahag, þjónustan við sjúk-
linga verði betri og kostnaður sjúk-
linga og samfélagsins aukist ekki.“
Kaup á vændi verði refsiverð
Í stjórnmálaályktun Samfylking-
arinnar er tekið á ýmsum málum.
Þar er t.d. ályktað að kaup á vændi
verði gerð refsiverð. „Sala á vændi
á ekki að vera refsiverð enda eru
[þeir sem selja sig] fórnarlömb að-
stæðna og vandann á að leysa með
félagslegum úrræðum. Kaup á
vændi ber að gera refsiverð,“ segir í
ályktuninni. Ekki var samstaða um
þessa ályktun innan jafnréttis-
nefndar en að lokum fór það svo að
ályktunin var samþykkt á fundin-
um.
Í stjórnmálaályktun fundarins
segir ennfremur að Samfylkingin sé
ábyrgt landstjórnarafl og eigi aðild
að sveitarstjórnum um allt land. Síð-
an segir að Samfylkingin vilji taka
þátt í þjóðarátaki þar sem ólík öfl á
vinnumarkaði og á stjórnmálasviðinu
stilli saman strengi við mótun nýrrar
framtíðarsýnar, þar sem stefnan í
efnahagsmálum þjóðarinnar verði
samþætt markmiðum í atvinnu- og
félagsmálum. „Samfylkingin mun
beita sér fyrir víðtæku samstarfi um
að við missum ekki hagkerfið í
gamla farið með verðbólguskotum
og gengishrapi eða gengis- og vaxta-
kryppum vegna agaleysis í stjórn-
arráði og stjórnarflokkum.“
Fordæmir innrás í Írak
Í velferðarmálum vill Samfylking-
in uppræta fátæktargildrur og
treysta stöðu barnafjölskyldna, m.a.
með hækkun barnabóta. Ennfremur
segir í ályktun fundarins að Sam-
fylkingin vilji vinna bug á því rang-
læti sem eigi sér stað við skattlagn-
ingu lífeyrissparnaðar. „Landsfund-
urinn lýsir stuðningi við réttinda-
baráttu eldri borgara og samtök
öryrkja í þessum málum.“
Í alþjóðamálum fordæmir lands-
fundurinn „einhliða stuðning ís-
lensku ríkisstjórnarinnar við innrás-
ina í Írak án þess að ræða það við
þing eða þjóð“, að því er fram kem-
ur í stjórnmálaályktuninni. „Lands-
fundarfulltrúar hugsa til írösku
þjóðarinnar í hörmungum hennar
og til aðstandenda fallinna her-
manna. Landsfundur vonar að hægt
sé að skapa samstöðu á alþjóðavett-
vangi undir forystu Sameinuðu
þjóðanna um að Írakar sjálfir taki
sem fyrst við völdum í landi sínu í
sæmilegri sátt við grannþjóðir.“
Landsfundur ályktaði einnig um
Evrópumál og segir m.a. að í ljósi
áhrifaleysis og einstakra milliríkja-
mála verði æ ljósara að erfitt verði
að byggja á samningnum um hið
Evrópska efnahagssvæði til fram-
búðar. Segir í ályktuninni að Sam-
fylkingin muni því stofna sérstakan
níu manna málefnahóp um Evrópu-
mál sem m.a. skoði ávinning Íslands
af aðild að Evrópusambandinu.
Að lokum má geta ályktunar um
atvinnu- og byggðamál, en þar segir
m.a. að Samfylkingin stefni að því
að endurheimta sameiginlega auð-
lind þjóðarinnar, fiskinn í sjónum,
með markvissri innköllun og endur-
úthlutun veiðiheimilda „þar sem
opnaður verði aðgangur að veiði-
réttinum með jafnræði og réttlæti
að leiðarljósi“. Segir að sú leið færi
komandi kynslóðum „aftur réttinn
til arðs og aðgengis að sameigin-
legri auðlind, tryggi nýliðun í út-
gerð og færi íbúum sjávarbyggð-
anna á ný réttinn til að nýta þá
auðlind sem skapaði þær“.
Landsfundur Samfylkingarinnar samþykkir stjórnmálaályktun í lok fundarins í gær
Vilja beita sér fyrir
framtíðarlausn í
heilbrigðismálum
Morgunblaðið/Árni Sæberg
INGIBJÖRG Sólrún Gísladóttir
var á landsfundi Samfylking-
arinnar um helgina sjálfkjörin
varaformaður Samfylkingarinnar.
Tekur hún við því embætti af Mar-
gréti Frímannsdóttur alþingis-
manni sem gaf ekki kost á sér til
endurkjörs. „Kæru félagar, vinir
og samstarfsfólk. Ég er nú orðin
varaformaður Samfylkingarinnar
með engu greiddu atkvæði,“ sagði
Ingibjörg Sólrún í upphafi ræðu
sinnar eftir að því hafði verið lýst
yfir að hún væri orðin varafor-
maður flokksins. „Það er auðvitað
hálf snubbótt og tekur eiginlega
frá mér ánægjuna af því að vita
hvaða stuðning ég hef. Það tekur
líka af ykkur möguleikann til þess
að lýsa annað hvort yfir vantrausti
eða trausti á mér. En þetta eru
reglurnar og við þær verður að
búa,“ sagði hún. Kvaðst hún reikna
með því að á næsta landsfundi
yrðu þessar reglur breyttar, þ.e.
öðruvísi yrði staðið að kjöri for-
manns og varaformanns.
Kvaðst finna fyrir ábyrgð
Ingibjörg sagði að þótt hún
hefði ekkert atkvæði hlotið nú í
varaformannskjörinu, þá breytti
það ekki því að hún fyndi mjög
sterkt fyrir þeirri ábyrgð og þeim
vanda sem fylgdi þessari vegsemd.
„Ég á eftir að glíma við vandann,
enda nýkjörinn varaformaður, en
ábyrgðin er orðin að veruleika. Og
ég fann mjög sterkt fyrir þessari
ábyrgð þegar ég kom til þessa
landsfundar,“ sagði hún, „þegar ég
kom hingað inn í fullan íþróttasal
af Samfylkingarfólki. Fólki, sem
var komið hingað til að vera saman
og vinna saman, ekki bara þessa
einu helgi, heldur í fjögur ár.“
Ingibjörg sagði að þeir sem
sætu á landsfundi Samfylking-
arinnar væru fulltrúar tæplega 57
þúsund kjósenda. „Þriðjungur
þjóðarinnar er á bak við okkur og
mun fleiri eru tilbúnir til þess að
fylkja sér á bak við okkur. Það
höfum við séð á þeim rannsóknum
sem hafa verið gerðar á kosn-
ingaúrslitunum. Við áttum mögu-
leika á allt upp í 45% fylgi, þ.e.
45% kjósenda gátu á einhverjum
tímapunkti hugsað sér að styðja
okkur. Við getum því orðið 40%
flokkur. Það getum við verið sann-
færð um. Og þetta verðum við að
muna og aðrir stjórnmálaflokkar
verða að taka mið af því. Þessi
staðreynd á að valda straum-
hvörfum í starfi flokksins. Það
verður eðlisbreyting á flokki þegar
hann fer úr því að vera 15 til 20%
flokkur yfir í 30 til 40% flokkur.
Við eigum svo miklu fleiri kosta
völ í þessum stóra flokki en við
áttum áður.“
Vilja vinna sem einn maður
Ingibjörg sagði að sú staðreynd
að flokkurinn væri orðinn svo stór
legði jafnframt á hann miklar
skyldur og mikla ábyrgð. „Við er-
um flokkur sem alltaf mun verða
með stjórnartaumana innan seil-
ingar. Og stuðningsmenn okkar
eiga rétt á því að við gerum það
sem í okkar valdi stendur til að ná
tökum á þessum taumum; að við
klúðrum ekki þeim tækifærum
sem við fáum og að við vinnum
sem einn maður að því að undirbúa
okkur fyrir hlutdeild í ríkisvald-
inu.“
Ingibjörg sagði að stofnanir
flokksins; landsfundur, flokks-
stjórn, framkvæmdastjórn, þing-
flokkur og forysta, væru með fjör-
egg í höndunum. „Við erum með
vonir, þrár og væntingar margra
kynslóða; þeirra sem hafa beðið
eftir því að svona flokkur yrði að
veruleika. Ekki bara í ár heldur
áratugi. Og við erum líka með
væntingar, vonir og þrár, þeirra
kynslóða sem eru að verða fyrir
sínum fyrsta pólitíska innblæstri,
akkúrat þessa dagana, þessi miss-
eri.“
Ingibjörg sagði að það sem ræki
Samfylkingarfólk áfram væri löng-
unin til að breyta. „Það er löng-
unin til að búa til gott samfélag,
sem hvílir á hornsteinum jafn-
aðarstefnunnar; jöfnuði, jafnræði,
jafnrétti, lýðræði og samkennd;
samfélag þar sem er rými fyrir
alla; þar sem fólki líður vel.“
Vitum hvert við stefnum
Hún sagði að stærsta verkefnið
sem Samfylkingarfólk stæði and-
spænis, væri það hvernig ætti að
skipta ávöxtum aukins hagvaxtar.
„Viljum við gera eitthvað fyrir alla
eða mest fyrir þá sem minnst
hafa?“ Hún sagði að það væri ekki
nóg að vilja ná tökum á stjórn-
artaumunum. „Við verðum að vita
hvert við ætlum og hvaða erindi
við eigum. Við megum aldrei
gleyma hugsjónum okkar og það
er í ljósi þeirra sem við eigum að
skoða allt það sem við gerum. Með
þær í huga eigum við að vega og
meta stefnu og strauma samtím-
ans, markmið okkar og leiðir. […]
En við eigum ekki bara að vera
hugsjónafólk. Við eigum bæði að
vera hugsjónafólk og raunsæis-
menn. Hugsjónir án raunsæis er
ekkert annað en hugarleikfimi og
raunsæi án hugsjóna er í besta
falli tóm leiðindi. Hjá okkur á
þetta að fara saman.“
Eftir ræðu Ingibjargar stóðu
fundargestir upp og hylltu nýkjör-
inn varaformann sinn með lófa-
klappi.
Ingibjörg Sólrún Gísladóttir var kjörin nýr varaformaður Samfylkingarinnar
Samfylkingin er flokkur með
stjórnartaumana innan seilingar
Ingibjörg Sólrún Gísladóttir var kjörin varaformaður Samfylkingarinnar.
Morgunblaðið/Árni Sæberg
ÞAÐ lá vel á samfylkingarfólki þegar lands-
fundi flokksins var slitið síðdegis í gær. Tekist
hafði verið á um ýmis mál í málefnanefndum
og hluti ályktana afgreiddur af landsfundar-
fulltrúum. Hinum var vísað til framkvæmda-
stjórnar til frekari umræðu og samþykktar
þar sem fundurinn hafði farið verulega fram-
yfir sett tímamörk. Össur Skarphéðinsson, for-
maður Samfylkingarinnar, var ánægður með
fundinn og voru margir þeirrar skoðunar að
umgjörð hans hefði verið til fyrirmyndar.
Almenn ánægja
með landsfundinn