Morgunblaðið - 03.02.2005, Blaðsíða 4

Björn Bjarnason þakkaði áhöfn Týs
fyrir góða frammistöðu og skoðaði
ofurtógið sem slitnaði í atganginum
fyrir austan. Með á myndinni eru
Georg Kr. Lárusson, forstjóri Gæsl-
unnar, Stefán Eiríksson, skrif-
stofustjóri í dómsmálaráðuneytinu,
og Sigurður Steinar Ketilsson,
skipherra á Tý.
FÖR Dettifoss Eimskipafélagsins í slipp í Rotterdam var frestað í gær
vegna veðurs og var stefnt að því að draga skipið út í dag, fimmtudag.
Þýska dráttarskipið Primus kom til Eskifjarðar í gærmorgun en
áætlað er að skipin komi til Rotterdam um miðja næstu viku. Þar verð-
ur farmur Dettifoss losaður og fluttur þaðan til endanlegs ákvörð-
unarstaðar. Í Rotterdam mun Dettifoss fara í þurrkví þar sem unnið
verður að viðgerðum á stýri skipsins sem bilaði undan Eystra-Horni á
föstudagskvöld.
Dráttarskipið Primus er nýlega smíðað og hefur um 120 tonna tog-
kraft. Það er 48,9 metra langt og 14 metra breitt, hefur 2 aðalvélar
sem samtals skila um 9000 hestöflum og 15 sjómílna ferð. Skipið er
hannað fyrir úthafsdrátt jafnt sem hafnaraðstoð og er með öflugan
dælubúnað til björgunarstarfa.
Að sögn Rúnars Gunnarssonar, þjónustustjóra Eimskipa á Austur-
landi, mun veður ráða því hvort óhætt verði að draga skipið út í dag.
Við komu varðskipsins Týs til hafnar í Reykjavík í gær tók Björn
Bjarnason dómsmálaráðherra á móti áhöfninni og þakkaði henni góða
frammistöðu við björgun Dettifoss. Við það tækifæri gat ráðherra þess
að í skoðun væri hvort ekki væri mögulegt að bæta búnað og tækja-
kost Landhelgisgæslunnar, samkvæmt upplýsingum Georgs Kr. Lár-
ussonar.
Dettifoss dreginn
áleiðis til Rotterdam
4 FIMMTUDAGUR 3. FEBRÚAR 2005 MORGUNBLAÐIÐ
FRÉTTIR
Japan er að ná sér upp úr efnahagslægð síðustu ára og ýmsir
möguleikar að opnast þar fyrir íslensk fyrirtæki. Boðað er til fundar
til að kynna þessa nýju viðskiptamöguleika og skýrslu sem norrænu
útflutnings-skrifstofurnar í Tókýó létu vinna um markaðstækifæri
norrænna fyrirtækja tengdum orkumálum í Japan.
Fundurinn verður haldinn 11. febrúar nk. kl. 8:30 til 10:30 hjá
Útflutningsráði Íslands, Borgartúni 35, 6. hæð.
Hvað er að gerast í Japan?
11.febrúar 2005
Keisuke Ryu, viðskiptafulltrúi
hjá Swedish Trade, kynnir fimm
skýrslur sem norrænu
útflutningsskrifstofurnar í
Tókýó hafa látið vinna um
markaðstækifæri í orkumálum
í Japan. Erindið er á ensku.
Fundurinn er liður í undirbúningi
vegna fyrirhugaðrar ferðar
viðskiptasendinefndar til
Japans í haust.
Þátttaka óskast tilkynnt í síma
511 400 eða með tölvupósti á
netfangið:
utflutningsrad@utflutningsrad.is
Dagskrá
Benedikt Höskuldsson, sendifulltrúi
í sendiráði Íslands í Tókýó:
Staða efnahagsmála í Japan.
Mattias Bergman, yfirmaður
skrifstofu Swedish Trade í Tókýó:
Mögulegar leiðir fyrirtækja til að
nálgast japanska markaðinn.
Lárus Ásgeirsson, sölu og
markaðsstjóri hjá Marel: Reynsla
Marels og hagnýt ráð.
Kaffihlé
Borgartún 35 • 105 Reykjavík • sími 511 4000 • fax 511 4040
utflutningsrad@utflutningsrad.is • www.utflutningsrad.is
M
IX
A
•
fí
t
•
0
4
8
7
5
FLYTJA þyrfti nær allar ófrískar konur í Vest-
mannaeyjum sem fæða eiga í sumar, til lands
nokkru áður en þær eiga von á sér, komi til þess
að skurðdeild Heilbrigðisstofnunar Vestmanna-
eyja verði lokuð í sex vikur, eins og útlit er nú
fyrir. Ekki er óhætt að láta konur fæða í Eyjum
á þessu tímabili komi eitthvað upp á sem skurð-
lækni þarf við.
Þetta segir Gunnar K. Gunnarsson, fram-
kvæmdastjóri Heilbrigðistofnunarinnar. Hann
segir að sjúkrahúsið hafi verið rekið með halla í
þrjú ár og nú sé einfaldlega ekki hægt að ganga
lengra. Hann álítur að með lokun deildarinnar í
sex vikur sparist 10 milljónir.
Verði deildinni lokað, eins og útlit er fyrir
núna, þarf að flytja sjúklinga með flugi upp á
land, þurfi þeir skurðaðgerð. Gunnar segir að
hafi sjúklingur ekki verið lagður inn áður en
hann þarf á skurðaðgerð að halda, borgi Trygg-
ingastofnun kostnað vegna sjúkraflugs. Liggi
sjúklingur inni í Eyjum þegar hann þarfnast
skurðaðgerðar ber Heilbrigðisstofnunin kostn-
aðinn. Gunnar telur að um 80–90% þeirra sem
þurfi á sjúkraflugi að halda sé ekki búið að leggja
inn og greiði því Tryggingastofnun reikninginn
vegna sjúkraflugs að langmestu leyti.
Peningarnir duga ekki
„Fjármagn sem við fáum á fjárlögum dugar
ekki til óbreytts reksturs,“ segir Gunnar. „Það er
búið að vera viðvarandi hallarekstur í þrjú ár og
við erum búin að klippa allt utan af en það næsta
sem við verðum að gera er að skerða þjónustu.“
Á skurðstofunni eru framkvæmdar minnihátt-
ar skurðaðgerðir og keisaraskurðir. Ekki hefur
verið ákveðið hvenær stofan verður lokuð en
hugsanlega verður það frá miðjum júní og út júlí.
„Þetta þýðir náttúrlega að svo til allar fæð-
ingar þurfa að flytjast til Reykjavíkur vegna
þess að ekki verður hægt að grípa inn í ef ekki er
allt í lagi með fæðinguna og það er ekki við-
unandi í nútímaþjóðfélagi,“ segir Gunnar. „Þetta
þýðir að konur þurfa að fara til Reykjavíkur eitt-
hvað fyrir barnsburð og bíða þar.“
Í sparnaðaráætlun sjúkrahússins er gert ráð
fyrir að sólarhringsvakt skurðlæknis og svæf-
ingarlæknis leggist af, sem og bakvakt hjúkr-
unarfræðings og ljósmóður. Gunnar segir að
stofnunin eigi enn í viðræðum við heilbrigðis-
ráðuneytið vegna málsins. „Það er engin nið-
urstaða komin ennþá en það er verið að skoða
málið í heild sinni að frumkvæði heilbrigðisráð-
herra og er farið yfir hvort einhverjir aðrir
möguleikar séu í stöðunni.“
Spurður um viðbrögð Eyjamanna við þessum
aðgerðum segir Gunnar: „Þau hafa verið tiltölu-
lega hörð. Það hefur alltaf verið litið svo á að
þetta væri algjörlega nauðsynleg þjónusta hér.
Við höfum þráast við eins og við höfum getað til
að halda þessu opnu allan sólarhringinn allan
ársins hring en það er bæði erfitt út af mann-
skap og út af kostnaði.“
Gunnar segir að stundum sé ekki hægt að
fljúga frá Eyjum en í langflestum tilfellum sé þó
hægt að fljúga frá Eyjum þó að ekki sé hægt að
lenda þar. Sjúkraflugvél er staðsett í Eyjum.
Skurðdeild á Heilbrigðisstofnun Vestmannaeyja verður hugsanlega lokað í sex vikur í sumar
Nær allar fæðingar
flytjast til Reykjavíkur
GUÐRÚN Erlingsdóttir,
forseti bæjarstjórnar
Vestmannaeyja, segir að
bæjaryfirvöld séu „logandi
hrædd“ í kjölfar frétta um
að hugsanlega þurfi að
loka skurðdeild Heilbrigð-
isstofnunar Vestmanna-
eyja í sex vikur í sumar til
að ná fram sparnaði. „Við
erum með þá sérstöðu að það er ekki alltaf
hægt að komast héðan,“ segir Guðrún, en í
bráðatilfellum þyrfti að fljúga með sjúklinga
til lands á meðan skurðdeildin yrði lokuð.
Hún segir ekki gott að þurfa t.d. að senda
ófrískar konur til lands um sumarmánuðina.
„Slysin gera ekki boð á undan sér,“ segir
Guðrún. „Það er því alveg skelfilegt ef þetta
verður niðurstaðan.“ Guðrún segir það ekki
síður áhyggjuefni að bakvakt á sjúkrahúsinu
verði hugsanlega lögð niður. „Það hræðir
okkur líka.“
Bæjarráð ályktaði um málið í janúar. Var
þar skorað á heilbrigðisráðherra að tryggja
nægjanlegt fjármagn til Heilbrigðisstofn-
unar Vestmannaeyja, svo að fyllsta öryggis
verði gætt og jafnframt ítrekar bæjarráð
landfræðilega sérstöðu Vestmannaeyja.
Þá hefur Lúðvík Bergvinsson þingmaður
óskað eftir utandagskrárumræðu um málið
á þingi.
„Erum logandi hrædd“
HÉRAÐSDÓMUR Reykjavíkur
dæmdi í gær sjötugan karlmann í
átta mánaða fangelsi fyrir ítrekuð
kynferðisbrot gegn ungri stúlku,
ömmubarni eiginkonu hans. Í dómn-
um segir að í ljósi aldurs mannsins,
þess að hann er hjartasjúklingur og
iðrast mjög gjörða sinna, skuli refs-
ingin vera skilorðsbundin.
Maðurinn krafðist frávísunar
málsins vegna formgalla og til vara
að hann yrði sýknaður af refsingu og
skaðabótakröfu.
Brot mannsins fólust einkum í því
að strjúka stúlkunni innanklæða og
utan, hann nuddaði kynfæri hennar,
káfaði á brjóstum auk annarra brota.
Fram kemur í dómnum að hann
bauð stúlkunni 100.000 krónur fyrir
að fá að hafa samfarir við hana en því
neitaði stúlkan og er ekki ákært
vegna samfara.
Fyrsta brotið framdi maðurinn
þegar stúlkan var 12 ára og hið síð-
asta framdi hann þegar hún var 15
ára gömul á árinu 2004.
Færði engin rök fyrir sýknu
Maðurinn játaði hluta brotanna en
neitaði öðrum. Hann krafðist engu
að síður sýknu í málinu en færði þó
engin rök fyrir því hvers vegna hann
skyldi sýknaður. Til vara krafðist
hann frávísunar vegna formgalla en
á það féllst héraðsdómur ekki held-
ur. Gegn staðfastri neitun mannsins
taldi dómurinn að ekki hefði tekist
að sanna sekt í þremur ákæruliðum
af sex.
Í niðurstöðum dómsins segir að
við ákvörðun refsingar verði að líta
til þess að maðurinn misnotaði sér
gróflega aðstöðu sína og trúnaðar-
traust stúlkunnar. Atferli hans væri
til þess fallið að valda henni sálar-
háska og tjóni og ætti hann sér eng-
ar málsbætur. Hann hafi á hinn bóg-
inn ekki áður sætt refsingu. Með
hliðsjón af því væri hæfileg refsing
átta mánaða fangelsi. Þá vísaði dóm-
urinn til þess að maðurinn er hjarta-
sjúklingur og þarf á stöðugri lyfja-
meðferð og eftirliti að halda. Á
meðan á dómsmeðferð málsins stóð
hafi hann ítrekað þurft að taka inn
svokallaðar sprengitöflur og á með-
an þurfti að gera hlé á skýrslutökum
yfir honum. Af þessum sökum ákvað
dómurinn að refsingin yrði skilorðs-
bundin til þriggja ára.
Stúlkunni voru dæmdar 350.000
krónur í miskabætur úr hendi
mannsins en krafist var einnar millj-
ónar.
Þorgeir Ingi Njálsson, Finnbogi
H. Alexandersson og Guðmundur L.
Jóhannesson kváðu upp dóminn.
Sigríður Jósefsdóttir sótti málið af
hálfu ríkissaksóknara, Vilhjálmur
Þórhallsson hrl. var til varnar og
Þórdís Bjarnadóttir var réttar-
gæslumaður stúlkunnar.
Dæmdur fyrir kynferðisbrot gegn ungri stúlku
Refsing skilorðsbundin
vegna hjartasjúkdóms
Morgunblaðið/Helgi Garðarsson
Þýska dráttarskipið Primus sem
hér sést vinstra megin á mynd er
með 9 þúsund hestafla vélar og sér-
hæft fyrir úthafsdrátt.
Morgunblaðið/Árni Sæberg