Fréttablaðið - 19.08.2006, Síða 46

GÁMAFÉLAGIÐ
KEMUR TIL
HJÁLPAR
4 | LISTAGÓÐ MENNINGARNÓTT 2006 |
Dagskrá Gallerís Foldar verður
með litríkara móti og líkt og fyrri
ár geta gestir reynt á lukkuna og
tekið þátt í listaverkahappdrætti
þar sem íslensk myndlist er í
verðlaun. Fyrsta Listahappið fer
fram kl. 13.45 en dregið verður
á hálftíma fresti, alls sautján
sinnum yfir daginn en allir gestir
fá happdrættismiða og geta tekið
þátt.
Dagskráin við Rauðarár-
stíginn hefst kl. 13 en þá verður
opnuð sýning á verkum eftir
Þorvald Skúlason en sýningin
er haldin í tilefni að 100 ár eru
liðin frá fæðingu listamannsins.
Í hliðarsal verður einnig opnuð
sýning á verkum eftir Kjartan
Guðjónsson.
Listamenn munu sýna
handverk sitt og vinnu, til dæmis
mun Aðalbjörg Þórðardóttir
vinna við olíumálun kl. 16 og
Sveinbjörg Hallgrímsdóttir sína
þrykkvinnu kl. 17.
Síðdegis mun Guðbjörn
Guðbjörnsson óperusöngvari
flytja létt lög við undirleik en
hann hefur áður troðið upp
í Galleríi Fold við glimrandi
undirtektir.
Líkt og í fyrra mun
Guðbjörg Káradóttir hafa
umsjón með listasmiðju fyrir
börn og leiðbeina þeim á um
klukkustundarlöngu námskeiði
í skemmtilegri listsköpun.
Námskeiðið er ætlað börnum 12
ára og yngri og hefst hið fyrsta
kl. 13.15.
Laust eftir klukkan fimm
verður síðan tendraður varðeldur
í Listaportinu og munu skátar
sjá um fjölskylduskemmtun
og síðar um kvöldið verða
gömlu dansarnir stignir við
undirleik Hljómsveitar Hjördísar
Geirsdóttur.
FÚTT
Í GALLERÍ FOLD
Skipuleggjendur Menningarnætur hafa notið liðsinnis
fjögurra ungra menningarpáfa sem sett hafa mark sitt á
dagskrána í ár. Lára Jóhanna Jónsdóttir, Ólöf Haralds-
dóttir, Hilmir Jensson og Sigurður Arent Jónsson voru
úrræðagóð og hugmyndarík fyrir en hafa lært heilmikið af
öllu tilstandinu í sumar.
„Þetta kom nú eiginlega til þannig að við sóttum um Skapandi
sumarstörf hjá Hinu húsinu en fengum ekki úthlutað þar,“ segir
Hilmir og Sigurður bætir við að verkefnisstjóri Hins hússins,
Ása Hauksdóttir, hafi síðan bent Höfuðborgarstofu, sem heldur
utan um skipulagningu Menningarnætur, á starfskrafta þeirra.
„Við höfum ágætis yfirsýn yfir það sem ungt fólk er að gera í
listinni því við höfum öll starfað eitthvað að menningarmálum,“
útskýrir Sigurður en hópurinn sem kallar sig Gámafélagið hefur
starfað einnig á vegum Hins hússins. „Því var ákveðið að við
bættum okkar sýn við dagskrá Menningarnætur. Við byrjuðum
með fundum og alls kyns hugmyndavinnu og svo höfum við
verið í allskonar snatti og í þessum praktísku hlutum,“ segir
Sigurður.
Hilmir segir að markmið hátíðarinnar í ár hafi verið að breikka
aldurshópinn sem sækir hana. „Hópurinn á aldrinum 16-24 ára
hefur alltaf verið mesti vandræðahópurinn sem hangir niðri í bæ
og við reyndum að finna lausn á því hvernig hægt væri að dreifa
þessum hóp og virkja hann til þátttöku – í staðinn fyrir að vera
passívir þátttakendur reynum við að fá þau til að taka þátt,“
segir hann.
Meðal þeirra dagskrárliða sem verða sérstaklega sniðnir að
fyrrgreindum aldurshópi er heilmikið húllumhæ sem nokkrir
framhaldsskólanna í Reykjavík skipuleggja í Iðnó og stendur
allan daginn. Þar verður til dæmis vegleg ljósmyndasýning og
ræðukeppni þar sem þjóðþekktir mælskusnillingar takast á og
dágóður skammtur af músík – hvort heldur er pönk eða klassík,
auk þess sem settar verða upp leik- og tískusýningar.
„Við komum líka með tillöguna að svokölluðu „open mike“
sviði sem verður á Ingólfstorgi en þar geta hljómsveitir troðið
upp sér að kostnaðarlausu,“ segir Ólöf en allar græjur verða á
staðnum fyrir tónlistarfólk.
Hilmir bendir á sérstaka dagskrá í tengslum við
sviðlistahátíðina Art Fart sem stendur yfir í húsnæði kenndu
við Ó. Johnsson & Kaaber við Sætún. „Það er Samband ungs
sviðlistafólks, SUS, sem stendur fyrir henni og þar verður opið
hús á Menningarnótt og sýningar á hálftíma fresti.“ Lára bendir
einnig á ljóðakvöld sem ný upprisna útgáfufyrirtækið Nykur
stendur fyrir í Hallargarðinum.
Þetta er búinn að vera mjög viðburðaríkur tími hjá
hjálparkokkunum og nú er lokaspretturinn hafinn. „Við
komumst fljótt að því að þetta er aðeins meiri vinna en maður
hugsaði sér. Öll þessi samskipti taka sitt og maður verður að
huga að viðbragðstímanum líka,“ segir Hilmir. „Þetta er samt
búið að vera æðislega gaman,“ bætir Sigurður við og Ólöf áréttar
að einstaklega góður andi ríki í kringum hátíðina. „Hér er
enginn pirringur og stress og það var alls staðar tekið vel á móti
okkur. Allir eru viljugir að láta hlutina ganga upp.“
NÁNARI UPPLÝSINGAR UM HÁTÍÐINA OG SPENNANDI
DAGSKRÁRLIÐI MÁ FINNA Á HEIMASÍÐUNNI WWW.
MENNINGARNOTT.IS.