Fréttablaðið - 19.11.2007, Blaðsíða 8

8 19. nóvember 2007 MÁNUDAGUR
VIÐSKIPTI „Þetta eru engir átthagafjötrar heldur
eingöngu til að verjast áhættu,“ segir Ólafur Sigurðs-
son, framkvæmdastjóri Stafa lífeyrissjóðs. 50 þúsund
manns eiga réttindi í Stöfum, sem eru sjötti stærsti
lífeyrissjóður landsins.
Stafir hófu á þessu ári að taka allt að tveggja prósenta
uppgreiðslugjald af nýjum lífeyrissjóðslánum sem
bera fasta vexti, ef vaxtastigið er lægra en af því láni
sem greitt er upp. „Uppgreiðslugjaldið er reiknað út
frá mismuninum og þetta getur gilt fyrir alla,
sjóðfélaga sem aðra, sem taka lán á föstum vöxtum.“
Ólafur bætir því við að við núverandi vaxtastig þurfi
lántakendur sem greiða upp lánin ekki að greiða slíkt
gjald. „Fólk getur líka flutt lánið með sér,“ segir
Ólafur.
Björn Þorri Viktorsson, fyrrverandi formaður
Félags fasteignasala, undrast þessa ráðstöfun.
„Sjóðfélagarnir greiða til sjóðanna og eiga þá. Ég hélt
að þetta væri þjónusta við þá.“
Lífeyrissjóður starfsmanna ríkisins, stærsti
lífeyrissjóður landsins, tekur ekki uppgreiðslugjald.
Haukur Hafsteinsson, framkvæmdastjóri sjóðsins,
segir tvær meginástæður fyrir því. „Almennt eru
lánin góð og trygg ávöxtun fyrir sjóðinn. Síðan er
þetta góð þjónusta við sjóðfélagana.“
Aðeins einn lífeyrissjóður, Lífeyrissjóður starfs-
manna Kópavogsbæjar, rukkaði uppgreiðslugjald,
þegar Landssamband lífeyrissjóða gerði lánakönnun
hjá sjóðunum snemma í fyrra.
Sé uppgreiðslugjald tvö prósent þarf lántakandi að
greiða tuttugu þúsund krónur aukalega fyrir hverja
milljón króna sem hann greiðir upp af láninu. - ikh
Lífeyrissjóðurinn Stafir tekur allt að tveggja prósenta uppgreiðslugjald af lánum:
Rukka fyrir uppgreiðslu lána
DÓMSMÁL Ekki tókst samkomulag
milli lögmanna olíufélaganna og
lögmanns ríkisins um hvaða ein-
staklingar yrðu fyrir valinu sem
dómkvaddir matsmenn, og endaði
dómari því á að velja matsmenn-
ina sjálfur.
Málið var tekið fyrir í Héraðs-
dómi Reykjavíkur gær. Um er að
ræða mál sem olíufélögin Olís,
Skeljungur og Ker hafa höfðað,
þar sem þess er krafist að sektir
samkeppnisyfirvalda vegna sam-
ráðs félagana verði ógiltar.
Heimir Örn Herbertsson, lög-
maður ríkisins í málinu, segir að í
gær hafi þrír matsmenn verið
valdir til að fara yfir matsgerðir
sem olíufélögin hafi látið gera.
Matsmennirnir eru þau Guðrún
Johnsen hagfræðingur, Gylfi
Zoëga hagfræðingur og Þorsteinn
Haraldsson löggiltur endurskoð-
andi.
Hópurinn er skipaður að beiðni
Heimis, þar sem hann hyggst
freista þess að fá upphaflegum
matsgerðum olíufélaganna
hnekkt.
Að auki voru matsmenn skipaðir
að ósk Heimis til að svara ákveðn-
um spurningum sem ekki var spurt
í upphaflegum matsbeiðnum, og
voru þau Guðrún og Gylfi valin til
að taka það verk að sér.
Heimir segist vonast til þess að
nýtt mat verði tilbúið í mars eða
apríl á næsta ári. Verði það niður-
staðan sé líklegt að málið verði
flutt fyrir dómi næsta haust.
Ómögulegt sé þó að segja hversu
langan tíma vinnan muni taka. - bj
Lögmenn náðu ekki sáttum um dómkvadda matsmenn í olíusamráðsmálinu:
Dómari valdi matsmennina
HEIMIR ÖRN
HERBERTSSON
BJÖRN ÞORRI
VIKTORSSON
Undrast upp-
greiðslugjaldið.
ÓLAFUR SIG-
URÐSSON „Engir
átthagafjötrar.“
HAUKUR
HAFSTEINSSON
„Tökum ekki upp-
greiðslugjald.“
REYKJAVÍK Borgarráð vill að nekt-
ardansstaðirnir Bóhem, Óðal og
Vegas fái ekki rekstrarleyfi. Lög-
menn staðanna segja fordóma og
ómálefnaleg sjónarmið liggja þar
að baki. Lögin banni ekki nektar-
dans.
Borgarráð hafði í ágúst gefið
umsögn vegna rekstrarleyfis til
staðanna þriggja. Eigendur stað-
anna telja umsögnina hafa verið
jákvæða en lögreglustjóri höfuð-
borgarsvæðisins taldi hana óljósa
og nú liggur fyrir tillaga í borgar-
ráði að nýrri umsögn til lögreglu-
stjórans. Hann annast veitingu
rekstrarleyfa. Samkvæmt nýju
umsögninni leggst borgaráð alfar-
ið gegn því að heimilaður verði
nektardans á stöðunum en er ekki
andvígt að þeir fá almennt rekstr-
arleyfi.
Lögmaður Óðals við Austurvöll
hefur sent borgaryfirvöldum yfir-
lýsingar sjö kvenna sem hann
segir starfa á staðnum. Þær segja
Óðal vera hreinlegan og öruggan
vinnustað. Þar þrífist alls ekkert
vændi. Segir lögmaðurinn stúlk-
urnar reiðbúnar að mæta bæði í
borgarráð og fyrir dómstóla til að
vitna.
„Sérfræðingar um kynferðisof-
beldi hafa bent á að sýnt hafi
verið fram á að í skjóli nektar-
dansstaða þrífist gjarnan vændi,
auk þess sem erfitt sé að ganga úr
skugga um hvort þær stúlkur sem
þar starfi séu til þess neyddar
eður ei,“ segir í nýju umsögninni
sem borgarráð frestaði að
afgreiða á fimmtudag. Reykja-
víkurborg hafi einsett sér að
sporna gegn vændi og „klámvæð-
ingu“ og að í málinu séu almanna-
hagsmunir í húfi.
Í bréfi til borgarstjórnarinnar
segir Brynjar Níelsson, lögmaður
Bóhem á Grensásvegi, persónu-
legar skoðanir einstakra umsagn-
araðila ekki vera málefnaleg
sjónarmið. „Þau verða ekki mál-
efnalegri þótt vísað sé til Rann-
sóknarstofu í kynja- og kvenna-
fræðum. Tilvísun til slíkra gagna
er jafn gagnleg til niðurstöðu og
sjónarmið grænmetisætu á holl-
ustu kjöts,“ segir lögmaðurinn.
Eins og lögmaður Bóhem segir
Halldór H. Backmann, lögmaður
Óðals við Austurvöll, að borgin
geti ekki breytt fyrri ákvörðun og
verði að byggja á málefnalegum
sjónarmiðum. „Hleypidómar eða
almennar ályktanir um meintan
þátt umbjóðanda míns í vændi og
mansali, hvað þá að umbjóðandi
minn beri ábyrgð á hinni svoköll-
uðu klámvæðingu eru ekki rök
sem fullnægja þessum sjálfsögðu
skilyrðum laganna,“ skrifar Hall-
dór borgaryfirvöldum.
Davíð Steingrímsson, eigandi
Vegas við Frakkastíg, þvertekur
fyrir að þar sé klám, vændi eða
mansal. „Er mér sama þó að þær
mættu ekki einu sinni bera brjóst-
in. Eða hafa lepp yfir geirvörtun-
um eins og er gert til dæmis í
mörgum fylkjum Bandaríkjanna,“
skrifar eigandi Vegas sem vill ná
samkomulagi við borgaryfirvöld:
„Við erum í sama liði. Við viljum
öll betra Ísland.“ gar@frettabladid.is
Nektardansarar vilja
bera vitni í borgarráði
Talsmenn nektardansstaða segja ómálefnaleg rök ráða viðhorfi borgarráðs
til staðanna. Lögmaður Bóhem segir umsögn Rannsóknarstofu í kvenna- og
kynjafræðum álíka gagnlega og sjónarmið grænmetisætu um hollustu kjöts.
NEKTARDANS Dansmeyjar frá Íslandi, Búlgaríu, Rúmeníu og Ungverjalandi segja gott
að vinna á Óðali og eru tilbúnar að vitna um það fyrir borgarráði og dómstólum.
FÁNANUM VEIFAÐ Göngufólk heldur á
loft hinum þrílita þjóðfána Belga í gær.
FRÉTTABLAÐIÐ/AP
BELGÍA, AP Um 35.000 manns tóku
þátt í fjöldagöngu í Brussel í gær
til að lýsa óánægju sinni með að
stjórnmálaleiðtogar Flæmingja
og Vallóna skyldu ekki getað kom-
ist yfir þann ágreining sem hefur
aftrað þeim frá að mynda nýja
ríkisstjórn. Rúmir 150 dagar eru
liðnir síðan kosningar voru þar í
landi. Óeining stjórnmálamann-
anna hefur kynt undir kröfum og
ótta um að belgíska ríkið verði
leyst upp.
Göngufólk, sem var bæði úr
röðum flæmsku- og frönskumæl-
andi Belga, safnaðist saman í
almenningsgarði í höfuðborginni,
hlýddi á ádrepur, söng þjóðsöng-
inn og veifaði þjóðfánanum. - aa
Fjöldaganga í Brussel:
Kallað eftir
þjóðareiningu
ÚKRAÍNA, AP Metangassprenging í
kolanámu í austurhluta Úkraínu
varð í fyrrinótt að minnsta kosti
63 manns að bana. Þetta er
mannskæðasta námuslysið í
landinu í sjö ár, að sögn almanna-
varnafulltrúa.
Bjarga tókst yfir 360 námu-
mönnum en minnst 37 voru enn
lokaðir inni í Zasyadko-námunni,
sem er ein sú stærsta og dýpsta
sem starfrækt er í Úkraínu. Eldur
sem logaði eftir gassprenginguna
hamlaði björgunarstarfi.
Viktor Jústsjenkó forseti sakaði
ríkisstjórnina um að leggja ekki
nógu hart að sér við að bæta
öryggi í námum landsins og
fyrirskipaði rannsókn á slysinu.
- aa
Sprenging í úkraínskri námu:
Tugir námu-
manna fórust
Á VETTVANGI Björgunarsveitarmenn
skunda að inngangi Zasyadka-námunnar
í Donetsk í Úkraínu í gær. FRÉTTABLAÐIÐ/AP
FÓLK Allsherjarþing Sameinuðu
þjóðanna tók fyrir tveimur árum
þá ákvörðun að helga þriðja
sunnudag í nóvember ár hvert
fórnarlömbum umferðarslysa.
Þessi dagur var í gær og af því
tilefni sendi biskup Íslands, hr.
Karl Sigurbjörnsson, prestum
Þjóðkirkjunnar bréf og bað þá að
minnast þessa í messum gær-
dagsins. Biskup sagði í bréfi sínu
að dagurinn væri mikilvæg
áminning um stórfelldan samfé-
lagsvanda sem snertir okkur öll.
Enn fremur minnti hann á bæn
sem sérstaklega er helguð
fórnarlömbum umferðaróhappa.
- vþ
Biskup um umferðarslys:
Stórkostlegur
samfélagsvandi
RÚSSLAND, AP Rússneskt björgun-
arlið vann að því hörðum höndum
í gær að bjarga áhöfn rússnesks
fragtskips sem sökk á Japanshafi
í gær. Skipið var á leið frá
höfninni Nakhodka í Síberíu til
Kína þegar það lenti í óveðri með
ofangreindum afleiðingum. 36
menn voru um borð í skipinu
þegar það sökk og tókst þeim
öllum að koma sér um borð í
björgunarbáta. Búið var að
bjarga 22 þeirra í gærkvöldi og
stóðu aðgerðir yfir til þess að
bjarga þeim sem eftir voru, en
veðurskilyrði voru afar slæm og
gengu björgunaraðgerðir því
hægt og erfiðlega fyrir sig. - vþ
Skipskaði í Rússlandi:
Unnið að björg-
un skipverja
1. Á hvaða bæ í Eyjafirði
drápust 200 nautgripir í elds-
voða í fyrradag?
2. Hver er forseti Georgíu?
3. Hvar var fundur Vísinda-
nefndar Sameinuðu þjóðanna
um loftslagsbreytingar haldinn
nýlega?
SVÖRIN ERU Á SÍÐU 34
ÍRAN Mahmoud Ahmadinejad,
forseti Írans, hefur í hyggju að
leita eftir aðstoð hlutlauss lands í
þeim tilgangi að auðga úran.
Nefndi hann Sviss í þessu
samhengi, að því er greint er frá
á fréttavef BBC.
Þessi ummæli Ahmadinejads
koma í kjölfar þess að svissneski
forsetinn Micheline Calmy-Rey
hefur látið í ljós vilja sinn til þess
að miðla málum á milli Írans og
Bandaríkjanna með kjarnorku-
áætlun Írans. Calmy-Rey segir
Svisslendinga viðurkenna rétt
Írana til að nota kjarnorku í
friðsamlegum tilgangi. - vþ
Kjarnorkuáætlun Írans:
Auðga úran
annars staðar
MAHMOUD AHMADINEJAD
VINNUMARKAÐUR Svæðisbundin
vinnumarkaðsráð eru nú tekin til
starfa um land allt. Ráðin starfa á
grundvelli laga um vinnumark-
aðsaðgerðir sem samþykkt voru á
Alþingi í fyrra. Hlutverk ráðanna
er meðal annars að greina stöðu
og þróun atvinnumála hvert á
sínu starfssvæði og gera tillögur
að vinnumarkaðsúrræðum sem
sniðin eru að þörfum svæðisins.
Vonast er til að starfsemi
ráðanna styrki þannig vinnu-
markaðsaðgerðir og gefi einstök-
um svæðum aukið hlutverk við að
ákveða aðgerðir á hverjum stað
fyrir sig. - vþ
Atvinnulífið:
Ráð greina
atvinnumál
VEISTU SVARIÐ?