Fréttablaðið - 01.03.2008, Blaðsíða 98

74 1. mars 2008 LAUGARDAGUR
sport@frettabladid.is
Eftirminnilegustu félagaskipti í handbolt-
anum í áraraðir fóru fram síðasta sumar er
Sigfús Páll Sigfússon ákvað að fara í Val úr
Fram. Mikill hiti var í kringum félagaskiptin,
sem fóru meðal annars fyrir héraðsdóm,
og lengi vel leit út fyrir að Sigfús gæti
hreinlega ekki skipt um félag. Lend-
ing náðist í málinu rétt fyrir mót er
Valur reiddi fram hæstu upphæð frá
upphafi fyrir mann sem hefur farið
á milli félaga innanlands að því er
sagt var.
„Því er ekki að neita að ég er
orðinn mjög spenntur og þetta
er sannkallaður draumaúrslita-
leikur. Þetta átti örugglega að
verða,“ sagði Sigfús Páll léttur
við Fréttablaðið.
„Biðin eftir leiknum er búin
að vera löng og ég vil spila sem fyrst. Mér
líður nokkuð vel fyrir leikinn og þetta verður
eðlilega sérstakur leikur fyrir mig. Leikurinn
í Safamýrinni var mjög sérstakur og
svo var einhvern veginn allt orðið
eðlilegt þegar Fram kom í heim-
sókn,“ sagði Sigfús Páll, sem var
leystur út með blómum er hann
kom í Safamýrina. Hann átti aftur á
móti slakan leik en var talsvert betri
á sínum nýja heimavelli er
Fram kom þangað.
„Ég held að blómin
trufli mann bara og
þetta hafi verið
bragð til að
koma mér
úr jafnvægi,“
sagði Sigfús á
gamansömum nótum. „Ég á annars ekki von
á öðru en góðum móttökum frá stuðnings-
mönnum Framara. Þeir stóðu upp fyrir mér
síðast og ég held að allt sé í góðu núna.“
Þrátt fyrir hasarinn segist Sigfús ekki
sjá eftir því að hafa farið í Val. „Ég er
sannfærður um að ég hafi gert rétt.
Mér finnst gaman að spila handbolta
núna en mér fannst ekki gaman í
fyrra. Ég þurfti að breyta til og er
búinn að finna gleðina aftur,“
sagði Sigfús en hann sagði að
það hefðu verið smá kýtingar
á milli sín og eins leikmanns
Fram í síðasta leik. „Hjörtur
Hinriks var með eitthvað létt
en hann er ágætur utan vallar
þó hann missi sig stundum í
leikjum,“ sagði Sigfús.
SIGFÚS PÁLL SIGFÚSSON: MÆTIR SÍNUM GÖMLU FÉLÖGUM Í FRAM Í LAUGARDALSHÖLLINNI Í DAG
Þetta er sannkallaður draumaúrslitaleikur
HANDBOLTI Reykjavíkurfélög hafa
unnið 15 af 34 bikarmeistaratitil-
um karla í handbolta og það er
ljóst að sá sextándi kemur í höfuð-
borgina um helgina þegar Valur
og Fram mætast í úrslitaleik Eim-
skipsbikars karla.
Þetta verður samt aðeins í sjö-
unda sinn sem Reykjavíkurfélög
leika til úrslita, þar af aðeins
annar Reykjavíkurslagurinn síð-
ustu átján ár. Þegar saga Reykja-
víkurslaga í bikarúrslitum karla
er skoðuð kemur í ljós að Vals-
menn hafa unnið alla þrjá bikarúr-
slitaleiki sína þar sem þeir hafa
mætt nágrannaliðum sínum en
Framarar hafa hins vegar tapað
sínum báðum.
Valur og Fram léku til úrslita í
fyrstu bikarkeppninni 1974 og það
voru einnig þau sem mættust í síð-
asta Reykjavíkurslagnum fyrir
tíu árum. Valsmenn höfðu betur í
bæði skiptin Markahæstur Vals-
manna í fyrsta úrslitaleiknum var
Bergur Guðnason með 7 mörk í
sínum síðasta leik en hann er faðir
Guðna Bergssonar. Það vakti
athygli að leikmenn Valsliðsins
fengu ekki verðlaunapening fyrir
sigurinn heldur lítinn bikar.
Síðan liðu fimm ár þar til
Reykjavíkurfélög mættust aftur
en Víkingar unnu þá öruggan s
sigur á ÍR. Tveimur árum síðar
vann Þróttur síðan eins marks
sigur á Víkingum þar sem Sigurð-
ur Valur Sveinsson var marka-
hæstur meistaranna með 8 mörk.
Víkingar unnu tíu marka stór-
sigur á KR í fjórða Reykjavíkur-
slagnum þar sem Þorbergur Aðal-
steinsson skoraði 9 mörk og
Sigurður Gunnarsson 6 mörk.
Sjö ár liðu þar til Reykjavíkur-
lið mættustu næst en Valsmenn
unnu þá 25-21 sigur á Víkingum.
Líkt og í síðasta Reykjavíkur-
slagnum átta árum síðar þjálfaði
Guðmundur Guðmundsson silfur-
liðið gegn bikarmeisturum Vals.
Valdimar Grímsson var marka-
hæstur Valsmanna með 8 mörk.
Í síðasta Reykjavíkurslagnum
misstu Framarar niður fjögurra
marka forustu á síðustu fjórum
mínútum leiksins en Valsmenn
náðu að skora tvö mörk á síðustu
tuttugu sekúndunum og tryggðu
sér framlengingu þar sem Júlíus
Gunnarsson tryggði þeim bikar-
meistaratitilinn með sigurmark-
inu fjórum sekúndum fyrir leiks-
lok. Framarar töldu á sér brotið í
lokin og kærðu framkvæmd leiks-
ins en kærunni var vísað frá. - óój
Valur og Fram mætast í úrslitum Eimskipsbikarsins í dag og sagan er alls ekki með Frömurum:
Sagan segir að Valsmenn verði meistarar
HETJURNAR 1998 Freyr Brynjarsson
og Kári Guðmundsson voru mennirnir
að baki hinu umdeilda jöfnunarmarki
Valsmanna í bikarúrslitaleiknum fyrir tíu
árum. Freyr skoraði eftir sendingu Kára
og tryggði Val framlengingu.
FRÉTTABLAÐIÐ/BRYNJAR GAUTI
REYKJAVÍKURSLAGIR Í
BIKARÚRSLITUM KARLA:
1974 Valur-Fram 24-16
1979 Víkingur-ÍR 20-13
1981 Þróttur-Víkingur 21-20
1983 Víkingur-KR 28-18
1990 Valur-Víkingur 25-21
1998 Valur-Fram 25-24 (20-20)
Sigurhlutfall félaga:
Valur 100% (3 af 3)
Þróttur 100% (1 af 1)
Víkingur 50% (2 af 4)
KR 0% (0 af 1)
ÍR 0% (0 af 1)
Fram 0% (0 af 2)
HANDBOLTI Kvennalið Fylkis
leikur í dag fyrsta bikarúrslita-
leik sinn þegar liðið mætir
Stjönunni.
Fylkir verður fjórtánda félagið
til þess að leika til úrslita í
kvenna flokki og aðeins þremur af
hinum þrettán tókst að vinna sinn
fyrsta leik.
Síðasta félag til þess að vinna í
frumraun sinni í Höllinni var
Haukar árið 1997 en þá höfðu
liðið tuttugu ár síðan KR (1977)
og Ármann (1976) unnu sinn
fyrsta bikarúrslitaleik.
Mótherjar Fylkis í dag,
Stjarnan, töpuðu tveimur fyrstu
úrslitaleikjum sínum, 1986 og
1988, áður en Stjörnukonur urðu
bikarmeistarar í fyrsta sinn 1989.
- óój
Fyrsti úrslitaleikur Fylkisliðsins:
Fá lið hafa unn-
ið fyrsta leikinn
REYNSLUBOLTARNIR Natasa Damilj-
anovic og Elzbieta Kowal eru tveir af
reyndustu leikmönnum Fylkis.
FRÉTTABLAÐIÐ/DANÍEL
HANDBOLTI Framarar eru sjötta
félagið í sögu bikaúrslitaleiks
karla sem fær tækifæri til að
bæta fyrir tap í úrslitaleik árið á
undan.
Fram tapaði með tíu marka
mun gegn Stjörnunni í fyrra, 17-
27, en mætir Val í úrslitaleiknum
í dag.
Síðustu tvö lið sem hafa staðið í
sömu sporum, KA 1995 og Valur
1993, hafa bæði unnið bikarmeist-
aratitilinn og það gerðu líka
Stjörnumenn 1987. Lið Víkings
1991 og lið Fram 1975 töpuðu hins
vegar bæði öðrum bikaúrslita-
leiknum í röð.
Siflurlið bikarúrslitanna hafa
því í 60 prósentum tilfella unnið
bikarinn þegar þau hafa farið í
úrslitaleikinn árið eftir. - óój
Fram tapaði í úrslitum 2007:
Geta bætt fyrir
tapið í fyrra
ENGINN ROLAND Í ÁR Roland Valur
Eradze hefur varið 28,5 skot að meðal-
tali í síðustu tveimur bikarúrslitaleikjum
og tryggði Stjörnunni bikarinn í bæði
skiptin. FRÉTTABLAÐIÐ/ANTON
HANDBOLTI Það er stór dagur í
Laugardalshöllinni í dag þegar
úrslitaleikir Eimskipsbikars karla
og kvenna fara fram. Fyrst mæt-
ast kvennalið Fylkis og Stjörnunn-
ar kl. 13.30 og karlalið Fram og
Vals takast á kl. 16.00.
Fyrir fram er ef til vill búist við
sigri Stjörnustúlkna gegn nýliðum
Fylkis í úrslitaleik Eimskipsbik-
ars kvenna enda liðið á mikilli
siglingu þessa dagana, en Árbæj-
arstúlkur eru til alls líklegar eftir
að hafa lagt Val á leið sinni í
úrslitaleikinn. Guðríður Guðjóns-
dóttir, þjálfari Fylkis, kvað lið sitt
mæta fullt sjálfstrausts í leikinn.
„Það er náttúrulega frábært
ævintýri fyrir svo ungt lið eins og
Fylki að vera komið alla leið í
úrslit í fyrsta sinn í sögu félagsins
og við erum full tilhlökkunar og
ætlum að njóta dagsins. Við erum
litla liðið fyrir leikinn og Stjörnu-
liðið er sterkasta liðið í dag en við
sýndum hvers við erum megnugar
gegn Val og það er allt hægt í
handbolta,“ sagði Guðríður, sem
var sjálf afar sigursæl sem leik-
maður og varð tólf sinnum bikar-
meistari.
Aðalsteinn Eyjólfsson, þjálfari
Stjörnunnar, ítrekaði á fjölmiðla-
fundi fyrir leikinn að fáránlegt
væri að tala um Stjörnusigur sem
eitthvert formsatriði.
„Ég og Ragnar Hermannsson
höfum verið að reyna að undirbúa
lið okkar líkamlega fyrir átökin og
vonumst til þess að sú hugmynda-
fræði og það skipulag sem við
höfum spilað eftir í vetur eigi eftir
að halda og skila okkur sigri í
leiknum. Fylkisliðið er með
reynslu bolta innanborðs sem
mynda hrygginn í liðinu og þar
fyrir utan eru efnilegir leikmenn
sem eru að taka stöðugum fram-
förum þannig að þetta verður
hörkuleikur,“ sagði Aðalsteinn.
Það verður sannkallaður
Reykjavíkurslagur þegar erki-
fjendurnir Fram og Valur leiða
saman hesta sína í úrslitaleik Eim-
skipsbikars karla. Óskar Bjarni
Óskarsson, þjálfari Vals, segir
mikla eftirvæntingu ríkja í her-
búðum síns liðs.
„Undirbúningur fyrir stórleik
sem þennan verður alltaf aðeins
öðruvísi hvort sem menn hafa lagt
upp með það eða ekki. Við höfum
því verið að gera ýmislegt til þess
að efla liðsandann, fórum til
að mynda á Rambo í bíó og
það skilar vonandi ein-
hverju. Spennustigið verð-
ur hátt í höllinni því liðin
eru ekki ólík og ég býst við
hörkuleik,“ sagði Óskar Bjarni og
starfsbróðir hans hjá Fram, Fer-
enc Antal Buday, tekur undir með
honum.
„Liðin spila svipaðan handbolta
og leikirnir hafa verið jafnir í
vetur. Þetta verður vonandi hin
besta skemmtum og við
ætlum að sjálfsögðu
að vinna,“ sagði
Buday.
omar@frettabladid.is
Spennustigið verður hátt í Höllinni
Það verður mikið um dýrðir í Laugardalshöll í dag þegar úrslitaleikir Eimskipsbikars karla og kvenna í
handbolta fara fram. Fylkir og Stjarnan eigast við hjá konunum en Fram og Valur mætast í karlaleiknum.
MARKVÖRÐUR LYFTIR BIKARNUM Það verður annað hvort Magnús Erlendsson,
markvörður og fyrirliði Fram, eða Ólafur Haukur Gíslason, markvörður og fyrirliði
Vals, sem lyftir bikarnum í dag. FRÉTTABLAÐIÐ/STEFÁN
BÚIST VIÐ SIGRI
STJÖRNUNNAR
Það búast
flestir við því
að Rakel Dögg
Bragadóttir
og félagar í
Stjörnunni muni
vinna næsta
auðveldan sigur
á Sunnu Maríu
Einarsdóttur og
félögum í Fylki.
FRÉTTABLAÐIÐ/
DANÍEL &
VILHELM
> Ekki hægt að slá áhorfendametið?
Mikil spenna er fyrir bikarúrslitaleik Vals og Fram í
Eimskipsbikarnum í Laugardalshöllinni í dag en
leikurinn hefst klukkan 16.00. Laugardalshöll-
in tekur bara 3.000 manns og eru líkur á því
að uppselt gæti orðið á leikinn.
Áhorfendametið á bikarúrslita-
leik karla er orðið fimmtán ára
gamalt en 3.300 manns komu
leik Vals og Selfoss árið 1993.
Það met mun standa áfram því
Höllin tekur aðeins 3.000 manns.
2.800 manns komu á leik Vals og
Fram fyrir tíu árum og þeir eru örugg-
lega enn að stríða þeim á því sem mættu
ekki.