Fréttablaðið - 05.06.2008, Blaðsíða 90
66 5. júní 2008 FIMMTUDAGUR
Ég hef alltaf heillast af ralli. Ég fékk fiðring
í magann fyrst þegar mér datt í hug að fá að
sitja í slíkum bíl og var það auðsótt þegar ég
hafði samband við Sigurð Braga Guðmunds-
son. Reynsla hans af akstursíþróttum spann-
ar jafn mörg ár og lífaldur blaðamanns, 24.
Þegar mig bar að garði á heimili Sigurðar
í Kópavogi, eftir hræðsluáróður frá leigubíl-
stjóra sem spurði mig hvort ég væri nokkuð
nýbúinn að borða, var hann í bílskúrnum
ásamt Ísaki Guðjónssyni, vini sínum og
aðstoðarökumanni. Eitthvað segir mér að
þeir hafi eytt nokkrum klukkutímum í bíl-
skúr Sigurðar þar sem Mitsubishi Evo 7 bíll
þeirra er geymdur.
Báðir hafa unnið til fjölda verðlauna í
ýmsum flokkum en þeir hafa verið á meðal
þeirra bestu, í ofurbílunum, í um tíu ár. Þeir
urðu Íslandsmeistarar árið 2005.
Hvað er ég kominn út í?
„Ég kom heim úr námi 1984 og þá stóð rallí-
bíll fyrir utan íbúðina sem ég flutti í. Viku
fyrir keppnina var sá sem átti bílinn tekinn
fyrir ölvunarakstur og mátti því ekki keyra.
Hann hafði séð mig grennslast í kringum
bílinn og spurði hvort ég vildi ekki bara
keyra, en ég vissi þá ekkert um rall. Það
næsta sem ég man er frá ráslínunni þar
sem ég hugsaði með mér hvað í ósköpunum
ég væri búinn að koma mér í,“ segir Sigurð-
ur.
Ísak byrjaði árið 1993 en saman hafa
þeir ekið frá því 2002. „Ísak er einn sá besti
ef ekki sá besti,“ segir Sigurður og Ísak
bætir við að þeir eyði óhemju miklum tíma
saman yfir sumarið. „Mestur tími fer í að
skoða leiðirnar sem við keyrum. Þetta er
skráð niður nákvæmlega og svo les Ísak
þetta í mig jafn óðum,“ segir Sigurður.
„Þetta snýst um að finna réttu línurnar í
gegnum beygjurnar. Þetta er mikil vinna
og oft hálfgerð skrifstofuvinna,“ segir
Ísak.
300 hestöfl í skúrnum
Eftir spjall í garði Sigurðar í blíðskapar-
veðri kíktum við á bílinn. Og hvílíkur bíll.
Þeir félagar segja mér að umfang rallsins
sé meira en flestir geri sér grein fyrir.
Þetta er ekki aðeins tæknihliðin í kringum
bílinn og faglega hliðin sem snýr að akstr-
inum heldur er reksturinn líka mikill. Til að
mynda kostar sérstakt bensín sem þeir nota
rúmar 500 krónur hver lítri og ku vera
sterkara en flugvélabensín.
Eitt dekk kostar rúmar 30 þúsund krón-
ur og er það einn mesti kostnaðurinn við
reksturinn. „Það er hægt að eyðileggja
dekk eftir 50 metra,“ segir Ísak og Sigurð-
ur sagði að konu sinni hefði tekist að eyði-
leggja eitt dekk í innanbæjarakstri. „Vissu-
lega ákveðið afrek.“
Erlendir aðilar stilla vélina til að fá hana
til að vinna sem best. Skipta þar um sterka
bremsuklossa á 250 kílómetra fresti og
vélin dugar í allra mesta lagi sex til átta
þúsund kílómetra. Óhapp á borð við veltu
getur kostað tvær milljónir en þeir félagar
kaupa alla hluti erlendis frá.
„Ertu tilbúinn?“
Leið okkar lá að Geithálsi við Rauðhóla en
fyrst þurfti að spenna beltin. „Þetta er eins
og að spenna ungabarn,“ sagði Ísak þegar
hann hjálpaði blaðamanni í allan öryggis-
búnaðinn. „Þetta snýst allt um öryggið,“ er
mér sagt og ég sé það er ég lít í kringum
mig. Sterk öryggisgrind er í bílnum og auk
öryggisbeltanna nota þeir sérstakan háls-
búnað í keppnum auk hjálma.
Það er ekki laust við að þeir sem
við ókum framhjá á leið okkar
upp Ártúnsbrekkuna hafi rekið
upp stór augu þegar við spænd-
um upp brekkuna. Fullbúinn
rallíbíll á fleygiferð sést ekki
daglega á götunum. Bíllinn
virkar reyndar alls ekki vel á
malbiki og þrátt fyrir mikið tog
og kraft var ekki þægilegt að
keyra bílinn. Við stoppuðum og
ræddum við ljósmyndarann áður en
við komum okkur á staðinn.
„Jæja, ertu tilbúinn?“ spurði Sigurð-
ur og ég kinkaði kolli og hélt mér ósjálf-
rátt fastar í beltið, enda alls óviss um
hvað ég væri kominn út í. Ýta þarf á átta
takka til að gera allt klárt og svo spændum
við af stað.
Eins og sinfónía
Við þeystumst um grófan malarveginn í
gegnum hverja beygjuna á fætur annarri og
hreint ótrúlegt var að upplifa sig hálfa leið í
lúpínubeðin áður en bíllinn fór á sinn stað
aftur. Sigurður var einbeittur við stýrið í
tíu-tvö stöðunni margþekktu og rykkti gír-
unum fram og til baka.
Bíllinn virkaði frábærlega. Vegurinn var
grófur en fjöðrunin er löng og stíf og fann
blaðamaður vart fyrir stórgrjótinu í
veginum. Bíllinn lætur augljós-
lega mjög vel að stjórn og
merkilegast var að sjá samspil þessara þátta
virka sem skyldi. Vélin, dempararnir, brems-
urnar, dekkin og ökumaðurinn runnu saman
eins og vel stillt sinfónía.
Við ókum fram og til baka yfir hóla og
hæðir þar til bensínið var af skornum
skammti. Ég hef ekki hugmynd um hver
mesti hraði sem við náðum var mikill en
hann var nokkuð yfir 100 kílómetra hraða.
Beygjurnar og hólarnir voru fjölmargir og
var mér eiginlega hætt að lítast á blikuna
þegar við fórum á stökkpall inn í beygju og
fullum hraða.
En allt fór þó vel og úr varð afar skemmti-
leg ökuferð. Sú skemmtilegasta sem ég hef
farið í í mörg ár reyndar. Adrenalínið flæddi
um líkamann þegar bíllinn rann til og frá en
það var erfitt að vera hræddur með jafn
mikinn fagmann og Sigurð undir stýri.
Hættan eykur spennuna
„Þetta er ótrúlega hollt sport, ég
hef lengi reynt að fá menn á aldur
við mig í sportið,“ segir Sigurður
sem kominn er á sextugsaldur og
vill gjarnan auka fjölbreytni
þeirra sem keppa hér á landi.
„Ímyndin er því miður oft sú að
þessa íþrótt stundi aðeins bifvéla-
virkjar og menn sem hafa akstur
að atvinnu. Ekki svo að skilja að
þetta séu eitthvað síðri menn
heldur væri gaman að fá meiri fjölbreytni í
þetta sport eins og raunin er erlendis. Í Bret-
landi, mekka rallsins, keppa heilaskurð-
læknar, forstjórar og einn af ríkustu mönn-
um Bretlands,“ segir Sigurður sem er
verkfræðimenntaður og situr til dæmis í
háskólaráði HR og stjórn Samtaka iðnaðar-
ins. Ísak vinnur hjá umhverfissviði Reykja-
víkurborgar.
Sigurður hefur keppt í ótalmörgum keppn-
um og þrátt fyrir að hann viðurkenni að ald-
urinn hái sér örlítið er hann ekkert að slaka
á. „Það er ekkert sem maður fær meiri útrás
fyrir eins og rallið. Að koma heim eftir góða
rallhelgi er óviðjafnanlegt. Það eykur spenn-
una að geta drepið sig við minnstu mistök,“
sagði Sigurður Bragi.
Blaðamaður tekur undir að adrenalín-
flæðið eykst töluvert frá því að taka strætó í
vinnuna við að fá far með margreyndum
Íslandsmeistara í einum besta rallíbíl lands-
ins. Ferðin var eins og Sigurður lýsir, óvið-
jafnanleg. hjalti@frettabladid.is
Rússíbanareið í vel stilltri sinfóníu
Að aka í rallíbíl er mikil upp-
lifun. Á fleygiferð inn í hverja
beygju og að þeysast svo út
úr henni á ógnarhraða á hár-
réttum stað er mikil list. Hjalti
Þór Hreinsson, blaðamaður á
Fréttablaðinu, kynntist því í 300
hestafla rallíbíl og þeirri miklu
samhæfingu sem honum fylgir.
FR
ÉT
TA
B
LA
Ð
IÐ
/A
N
TO
NEFNILEGUR Blaðamaður stillir sér upp
með Sigurði Braga eftir æsispennandi
ökuferð. Upplifunin var einstök.
SIGURÐUR BRAGI OG ÍSAK
Árangur frá fyrstu keppni saman:
2002: Kepptu ekki í öllum mótum ársins. Besti árangur í keppni, annað sæti.
2003: Annað sæti í öllum keppnum ársins. Annað sæti á Íslandsmótinu.
2004: Fjórum sinnum í öðru sæti, unnu alþjóðlega rallið.
2005: Íslandsmeistarar eftir sigur í öllum mótum ársins.
2006: Einn sigur, tvisvar í öðru sæti. Urðu að draga sig úr mótinu eftir slys á Mælifellsdal. Sigurður
Bragi bakbrotnaði, hann braut rifbein og lunga féll saman.
2007: Einn sigur, þrisvar í þriðja sæti. Voru með örugga forystu í alþjóðlega rallinu og í Íslandsmótinu þegar
vélin gaf sig og sigurvonir þeirra urðu að engu.
2008: Sigur í fyrsta móti.
Næsta keppni er á föstudagskvöld og á laugardaginn.
MITSUBISHI EVO 7
Gerð: Mitsubishi Lancer
Árgerð: 2002
Land: Japan
Hestöfl: 280-300
Drif: Fjórhjóla
Þyngd: 1350 kg - Mun meira með áhöfn
Stærð vélar: 2,0 l.
Verð: Um fjórar milljónir erlendis.
NÓTNABÓKIN Stjórna þarf sinfóníunni og er
það gert með þessari nótnabók. Hver beygja er
skilgreind frá einum upp í fimm og þýðir V1 til að
mynda mjög kröpp vinstri beygja. „Allt er þetta stytt
niður í tákn sem ég skil mjög auðveldlega, enda
má ekkert hik vera á nótunum til ökumanns, þær
þurfa að koma í takt og vel skipulagðar,“ segir Ísak.
RENNIREIÐ Sigurður ók á miklum hraða inn
og út úr beygjunum í heiðarlegri tilraun til að
hræða líftóruna úr blaðamanni. Hér „slædar“
hann út úr einni af fjölmörgum beygjum sem
við þeyttumst í gegnum.
HRESSIR Ísak Guðjónsson blaðamaður og
Sigurður Bragi Guðmundsson stilltu sér upp
eftir ökuförina á Geithálsi.