Fréttablaðið - 27.07.2008, Blaðsíða 6
6 27. júlí 2008 SUNNUDAGUR
STJÓRNSÝSLA Samþykkt var á
bæjarráðsfundi Kópavogs á föstu-
dag að ráða í fjórar nýjar stjórn-
unarstöður hjá Kópavogsbæ en
aðeins eina þeirra á að auglýsa.
Samfylkingin er ekki sátt.
„Þetta er einfaldlega siðlaust og
engin fordæmi eru fyrir slíku á
Íslandi,“ segir Guðríður Arnar-
dóttir, oddviti Samfylkingarinnar
í Kópavogi.
„Það er mjög skýrt í lögum að
það á að auglýsa allar opinberar
stöður,“ segir Guðríður. „Tekið er
fram í starfsmannastefnu Kópa-
vogsbæjar að auglýsa eigi allar
stöður.“
Stöðurnar sem um ræðir, sem
ekki voru auglýstar, eru fram-
kvæmdastjóri fræðslusviðs, sviðs-
stjóri menningar- og tómstunda-
sviðs og ný staða gæðastjóra
bæjarins. Umdeildasta ráðningin
var framkvæmdastjóri fræðslu-
sviðs en sú sem var ráðin, sem
áður gegndi stöðu starfsmanna-
stjóra í afleysingum, er menntað-
ur stjórnmálafræðingur og með
meistaragráðu í starfsmanna-
stjórnun.
„Hún hefur enga reynslu af
fræðslumálum,“ segir Guðríður
en í starfslýsingu stendur að sá
sem gegnir starfinu skuli hafa
reynslu af fræðslumálum eða þá
reynslu sem best kemur að notum.
„Enginn er að draga hennar hæfi í
efa en í þessu tilviki er bara ekki
réttur maður á réttum stað. Án
þess að auglýsa stöðurnar vitum
við ekki hvort við erum að ráða
hæfasta fólkið.“
Spurður um nauðsyn þess að
auglýsa stöðurnar segir Ómar
Stefánsson, formaður bæjarráðs,
að hæft fólk hafi verið ráðið sem
starfaði í öðrum stöðum innan
bæjarins og tekur fram að ráðn-
ingarnar séu fullkomlega lögleg-
ar.
Um ráðningu framkvæmda-
stjóra fræðslusviðs segir Ómar að
það sem til þurfti hefði verið
manneskja með stjórnunarhæfi-
leika. „Hún sannaði sig sem stjórn-
andi þegar hún gegndi embætti
starfsmannastjóra til bráðabirgða.
Þekking á fræðslumálum er til
staðar innan sveitarfélagsins,“
segir Ómar.
Samfylkingin skoðar nú málið,
að sögn Guðríðar og mun á næst-
unni ákveða hvort ákvörðunin
verður kærð. Ljóst er hins vegar
að óskað verður álits samgöngu-
ráðuneytisins, sem fer með yfir-
stjórn sveitarstjórnarmála, hvort
þetta standist lög. vidirp@frettabladid.is
Án þess að auglýsa
stöðurnar vitum við ekki
hvort við erum að ráða hæfasta
fólkið.
GUÐRÍÐUR ARNARDÓTTIR
ODDVITI SAMFYLKINGARINNAR
Í KÓPAVOGI
Kópavogsbær ræður í þrjár
stöður án þess að auglýsa
Ráðið var í þrjár stjórnunarstöður hjá Kópavogsbæ án þess að auglýsa þær. Oddviti Samfylkingar segir
þetta ekki standast lög og hyggst kæra. Formaður bæjarráðs segir ráðningarnar fullkomlega löglegar.
HAMRABORG Í KÓPAVOGI Umdeild er ráðning framkvæmdastjóra fræðslusviðs hjá Kópavogsbæ, en hún hefur menntun á sviði
starfsmannastjórnunar. FRÉTTABLAÐIÐ/GVA
ÓMAR
STEFÁNSSON
GUÐRÍÐUR
ARNARDÓTTIR
EKVADOR, AP Stjórnlagaþing
Ekvadors samþykkti í fyrradag
nýja stjórnarskrá sem eykur völd
forsetaembættisins. Stjórnar-
skráin verður lögð undir þjóðar-
atkvæðagreiðslu í september.
Forsetinn getur samkvæmt
nýju stjórnarskránni rofið þing,
hefur völd yfir peningastjórninni
og getur setið lengur. Hún gerir
núverandi forseta, sósíalistanum
Rafael Correa, kleift að halda
embætti til ársins 2017.
Forsetinn er vinsæll í Ekvador
og líklegt að Ekvadorar samþykki
nýju stjórnarskrána. - gh
Ný stjórnarskrá styrkir forseta:
Ekvadorar kjósa
um stjórnlög
RAFAEL CORREA Stjórnarandstæðingar
saka forsetann um að vilja taka sér
alræðisvald. FRÉTTABLAÐIÐ/AP
STJÓRNMÁL Íslandshreyfingin er
eini stjórnmálaflokkurinn sem
hefur skilað bókhaldi sínu inn til
Ríkisendurskoðunar. Samkvæmt
lögum, sem sett voru í fyrra, skulu
stjórnmálasamtök halda sam-
stæðureikning fyrir allar einingar
sínar og skila endurskoðuðum
reikningum til Ríkisendurskoðun-
ar.
Íslandshreyfingin eyddi um 30
milljónum króna á síðasta ári. Um
6,5 milljónir söfnuðust og þar að
auki fékk flokkurinn 12 milljóna
króna styrk frá ríkinu. Sá styrkur
er árlegur og fer til stjórnmála-
flokka í hlutfalli við fylgi þeirra í
síðustu alþingiskosningum. Skuld-
ir Íslandshreyfingarinnar nema
því um 11,5 millljónum nú.
Margrét Sverrisdóttir varafor-
maður segir flokkinn koma ágæt-
lega út úr kosningaári. „Við höfum
einsett okkur að greiða niður allar
okkar skuldir eins fljótt og hægt
er,“ segir Margrét.
Hjá hinum stjórnmálaflokkun-
um fengust þær upplýsingar að
verið væri að vinna í bókhaldinu.
Samfylkingin mun skila sínu inn á
allra næstu dögum, Sjálfstæðis-
flokkur og Framsóknarflokkur
reikna með að skila með haustinu,
Vinstri grænir og Frjálslyndir
nefndu ekki neina tímasetningu,
en verið væri að vinna í málinu.
Eitt af því sem flækir málið er
að starfsár flestra stjórnmálafé-
laga hefjast að hausti, en bók-
haldsár um áramót. - kóp
Stjórnmálaflokkar fæstir búnir að skila bókhaldi til Ríkisendurskoðunar:
Íslandshreyfingin hefur ein skilað
ÍSLANDSHREYFINGIN Aðeins Íslandshreyfingin hefur skilað inn bókhaldi til
Ríkisendurskoðunar. Frá blaðamannafundi við stofnun flokksins. FRÉTTABLAÐIÐ /GVA
KÍNA Lítill grís hefur vakið mikla
athygli í þorpinu Fengzhang í
Kína sökum undarlegs útlits.
Þorpsbúar flykkjast að heimili
Feng Changlin, eiganda gríssins
sem segir hann forljótann,
engann vilja kaupa grísinn og
fjölskyldan sé hrædd við að horfa
á hann. Þá segir hann grísinn
helst líkjast apa í framan en að
auki séu afturlappirnar mun
lengri en þær fremri. Því hoppi
grísinn um í stað þess að ganga
eins og aðrir grísir. Það varð
grísnum til lífs að sonur Feng
hefur gaman af því að leika við
hann og gefur honum mjólk að
drekka. Fréttavefurinn ananova
greindi frá. - ovd
Vanskapaður grís í Kína:
Lítill grís með
andlit apa
APALEGUR GRÍS Í KÍNA Þorpsbúar í
Fengzhan í Kína sýna þessum litla
grís mikinn áhuga enda er hann mjög
sérstakur í útliti. MYND/ANANOVA
Kjarnaofni lokað í skyndi
Kjarnaofni í kjarnorkuverinu í Rivne í
vestanverðri Úkraínu var skyndilega
lokað í fyrradag eftir að aðvörun-
arkerfi fór í gang. Embættismenn
í neyðarástandsráðuneyti landsins
sögðu þó enga hættu á ferðum.
Geislavirkni sé innan eðlilegra marka.
Árið 1986 varð versta kjarnorkuslys
sögunnar í Tsjernóbyl í Úkraínu.
ÚKRAÍNA
BANDARÍKIN, BBC Kaliforníuríki er
fyrsta ríkið til þess að banna veit-
ingahúsum og verslunum að nota
herta fitu (transfitusýrur). Þetta
kemur fram á fréttavef BBC. Hert
fita er stór orsakavaldur að hjarta-
og æðasjúkdómum.
Arnold Schwarzenegger, ríkis-
stjóri Kaliforníu, segir reglugerð-
ina, sem tekur gildi árið 2010, mik-
ilvægt skref í framtíð
heilbrigðismála. Þeir sem ekki fara
að reglunum verða beittir sektum
sem munu nema allt að 80 þúsund
krónum.
Hert fita er grænmetisolía sem
hefur verið hert til þess að lengja
endingartíma hennar. Fitan er
notuð í bakkelsi og kökur, smjörlíki
og skyndibitamat. Hert fita hefur
ekkert næringargildi. Um leið og
dregið er úr neyslu hennar minnka
líkur á hjartasjúkdómum.
Forseti Fjölskyldulæknaaka-
demíunnar í Kaliforníu segir
neyslu hertrar fitu aldrei innan
öryggismarka, ekki frekar en reyk-
ingar.
Borgirnar New York, Fíladelfía
og Seattle hafa nú þegar lagt bann
við hertri fitu. Margir matvæla-
framleiðendur og veitingahúsa-
keðjur hafa einnig gert tilraunir
með efni sem gætu komið í stað olí-
unnar og þeirrar matvöru sem inni-
heldur hana. - hþj
Veitingahús og verslanir beittar sektum árið 2010
Hert fita bönnuð í Kaliforníu
HAMBORGARI OG FRANSKAR GÆTU
VERIÐ HOLLARI Matur á skyndibitastöð-
um inniheldur oft mikið af transfitu en
hún eykur líkur á hjartasjúkdómum og
hefur ekkert næringargildi.
FRÉTTABLAÐIÐ/ANTON
STJÓRNSÝSLA Reglugerð um vernd
og aðstoð við fatlaða og hreyfi-
hamlaða farþega í flugi tók gildi í
gær. Meðal aðstoðar sem á að
veita er að komast um borð í
loftfar, koma farangri um borð,
komast úr loftfari, endurheimta
farangur á komustað, fara í
gegnum tollskoðun og fleira.
Reglugerðinni er ætlað að
tryggja að rekstraraðilar
flugvalla og flugrekendur veiti
þessum farþegahópi nægilega
aðstoð og sporna þannig við
mismunun gagnvart þeim.
Reglugerðin er innleiðing á
reglugerð frá Evrópuráðinu og
Evrópuþinginu. - vsp
Reglur um aðstoð við fatlaða:
Fatlaðir fái
aukna aðstoð
Er rétt að slá Bitruvirkjun af?
Já 44,7%
Nei 55,3%
SPURNING DAGSINS Í DAG:
Styður þú sigurtillöguna um
nýja byggingu Listaháskólans?
Segðu skoðun þína á visir.is
KJÖRKASSINN