Fréttablaðið - 06.09.2008, Blaðsíða 62

42 6. september 2008 LAUGARDAGUR
menning@frettabladid.is
Um tuttugu íslenskir dans-
höfundar eru samankomn-
ir í Kaupmannahöfn nú
um helgina til að minnast
Reykjavík Dance Festival.
Hátíðin, sem halda átti í sjötta sinn
þessa helgi, er í uppnámi eftir að
menntamálaráðuneytið hætti
stuðningi við hana í vor. Danshöf-
undarnir hafa þegið boð um að vera
þátttakendur í Keðju, norrænum
dansfundi í Kaupmannahöfn, þar
sem danslistin verður rædd í pólit-
ísku samhengi auk þess sem tvö
íslensk dansverk líta dagsins ljós.
Fréttablaðið ræddi við danshöf-
undana, Steinunni Ketilsdóttur og
Sveinbjörgu Þórhallsdóttur, um
Reykjavík Dance Festival og mik-
ilvægi hátíðarinnar fyrir þróun
dans á Íslandi. „Reykjavík Dance
Festival varð til árið 2002 að frum-
kvæði sjálfstætt starfandi dans-
höfunda sem ákváðu að sameina
krafta sína og skapa vettvang fyrir
ný íslensk dansverk,“ segir Svein-
björg og bætir við að hátíðin sé eini
skipulagði vettvangur sjálfstætt
starfandi danslistamanna á Íslandi.
Frá stofnun hennar hafi hún alið af
sér hátt á fjórða tug nýrra íslenskra
dansverka. Steinunn tekur undir
orð Sveinbjargar og segir að aukið
framboð sýninga þýði aukin
atvinnutækifæri fyrir dansara á
Íslandi. „Margir íslenskir dansarar
og danshöfundar starfa erlendis
vegna skorts á aðstöðu og aðbúnaði
hérlendis. Þannig erum við að
missa hluta af okkar menningar-
auði úr landi.“
Í vor hætti menntamálaráðu-
neytið stuðningi við hátíðina og
erfiðlega hefur gengið að sækja
fjármagn til einkaframtaksins.
„Þetta er óskiljanleg ákvörðun af
hálfu ráðuneytisins,“ segir Stein-
unn. „Reykjavík Dance Festival
hefur sannað mikilvægi sitt fyrir
framþróun íslenskrar dansmenn-
ingar. Einstaklingar og hópar hafa
sprottið fram í auknum mæli og
skapað sér sess hérlendis og
erlendis fyrir tilstuðlan hátíðar-
innar.“ Sveinbjörg bætir við að
dansinn sé hágæða útflutningsvara
sem sannist á því að erlendis megi
finna fleiri sýningarkvöld á íslensk-
um listdansi heldur en hérlendis.
„Dansinn er alþjóðleg listgrein í
stöðugri uppsveiflu og okkur ber
skylda til að rækta og efla tengslin
við samstarfsaðila okkar erlendis.“
Hún segir að hlutverk Reykjavík
Dance Festival hafi meðal annars
verið að bjóða hingað skipuleggj-
endum erlendra danshátíða sem
koma íslenskum dansverkum á
framfæri erlendis.
„Það er mjög sorglegt að hugsa
til þess að öll sú óeigingjarna vinna
sem fór í að byggja upp hátíðina
hafi verið unnin til einskis,“ segir
Steinunn, „Þetta er öfugþróun og
merki um skammsýni ráðamanna.
Sem atvinnugrein stuðlar danslistin
að verðmætasköpun. Möguleikarnir
til að laða að erlent fjármagn eru
miklir en til þess að það markmið
náist þarf fyrst að skapa nauðsyn-
leg vaxtarskilyrði fyrir danslistina
hérlendis og það byggist á sam-
felldri aðkomu opinberra aðila.“
Sveinbjörg tekur undir orð Stein-
unnar og bætir við að nauðsynlegt
sé að treysta rekstrargrundvöll
Reykjavík Dance Festival. Að
lokum skora þær á Þorgerði Katr-
ínu menntamálaráðherra að snúa
ákvörðun ráðuneytisins við og
tryggja þannig komandi kynslóð-
um aðgengi að fjölbreyttri dans-
menningu.
kmj/pbb@frettabladid.is
Dansarar funda í Höfn
STEINUNN KETILSDÓTTIR Tekur þátt í
norrænum dansfundi í Kaupmannahöfn
nú um helgina.
Menningarmiðstöðin Gerðuberg í Breiðholti
er uppátækjasöm með meiru og stendur oft
fyrir viðburðum sem hressa verulega upp á
gráan hversdaginn. Í dag verður þar margt um
dýrðir þegar haldinn verður safnaramarkaður í
tengslum við sýninguna Stefnumót við safnara
III. Þó að sýningin sé tileinkuð hljóðfærum og
ýmsum hlutum sem allir tengjast tónlist á einn
eða annan hátt er rétt að vekja athygli á því að
opið er fyrir kaup og sölu á hvers kyns varningi
á markaðinum. Markaðurinn verður opinn á
milli kl. 13 og 16 og er ómissandi fyrir hvern
þann sem þykir eitthvað vanta í sitt eigið safn,
hverju sem safnað er.
Auk markaðarins verður ýmislegt skemmti-
legt um að vera í Gerðubergi í dag. Nokkrir af
þeim söfnurum sem sýna nú hljóðfærasöfn
sín þar verða á markaðnum og geta því svarað
spurningum forvitinna sýningargesta. Auk þess
verður Jón Baldur Hlíðberg teiknari á staðnum
og býður upp á leiðsögn um sýningu sína sem
heitir Kynjaskepnur úr íslenskum þjóðsögum og
hefur svo sannarlega slegið í gegn hjá ungum
sem öldnum. Síðast en ekki síst verður opnuð
fyrsta sýningin í Safnarahorni Gerðubergs.
Listakonan Lóa Guðjónsdóttir dregur þar fram
ýmsa skemmtilega og forvitnilega hluti úr fórum
sínum, þar á meðal forláta postulínsbrúður,
gamalt hljóðfæri, styttur, mynt og fleira. - vþ
Safnarar selja eigur sínar
LÍF OG FJÖR Á MARKAÐI Nóg var um að vera á Safn-
aramarkaði Gerðubergs árið 2005. MYND/GERÐUBERG
> Ekki missa af …
sýningunni Tilraunamaraþon í
Listasafni Reykjavíkur í Hafnar-
húsinu, en henni lýkur á
morgun. Sýningin var opnuð í
maí síðastliðnum sem hluti af
dagskrá Listahátíðar í Reykja-
vík. Margir þekktir listamenn
eiga verk á sýningunni, þeirra
á meðal eru Erró, Brian Eno,
Marina Abramovic, Hreinn
Friðfinnsson og Roger Hiorns.
Kl. 14
Dagskrá í tilefni af aldarafmæli
rithöfundarins William Saroyan fer
fram í Norræna húsinu í dag og
hefst kl. 14. Þar stíga á svið meðal
annarra Gyrðir Elíasson, Óskar
Árni Óskarsson, Ingibjörg Þóris-
dóttir og dr. Dickran Kouymjian og
fjalla um Saroyan og lesa upp úr
verkum hans. Einnig verður sýnd
stuttmynd sem Saroyan leikstýrði
og framleiddi sjálfur.
Sýning á myndskreytingum
Kristínar Rögnu Gunnarsdóttur
fyrir barnabókina Örlög guðanna,
sem kom út fyrir hálfum mánuði
á vegum Máls og menningar,
verður opnuð í Þjóðminjasafninu
í dag kl. 14. Bók þessi, sem er
samstarfsverkefni mynd-
skreytisins Kristínar og Ingunn-
ar Ásdísardóttur sem skrifar
textann, setur fram allar helstu
sögur af norrænum goðum og
gyðjum á þann hátt að bæði börn
og fullorðnir geta haft gagn og
gaman af.
Á opnuninni í dag verður ýmis-
legt skemmtilegt um að vera. Ing-
unn les upp úr bókinni og myndir
Kristínar verða til sölu, auk þess
sem höfundarnir munu árita
bækur sínar. Alls verða rúmlega
tuttugu myndir til sýnis sem sýna
ýmis þekkt andartök eða hug-
myndir úr heimi norrænnar goða-
fræði, til að mynda sköpunina,
söguna af Iðunni og eplunum,
sögurnar af dauða og bálför Bald-
urs, heimstrénu Aski Yggdrasils
og svona mætti áfram telja.
Sýningin hangir uppi til 21.
september og er aðgangur ókeyp-
is. - vþ
Örlög guðanna í myndum
GULLVEIG BRENND Ein af myndskreytingum Kristínar Rögnu úr bókinni Örlög
guðanna.