Morgunblaðið - 16.05.2007, Qupperneq 4

4 MIÐVIKUDAGUR 16. MAÍ 2007 MORGUNBLAÐIÐ
FRÉTTIR
Í HNOTSKURN
»Tryggingastofnun hafnaði á sínum tímaumsókn ekkna þeirra tveggja sem fór-
ust með skipinu um dánarbætur þar sem
skipið sigldi undir erlendum fána. Samskip
kærðu ákvörðunina til Tryggingaráðs og
hugðust tryggja ekkjunum fullar bætur.
Eftir Örlyg Stein Sigurjónsson
orsi@mbl.is
HÉRAÐSDÓMUR Reykjavíkur hefur dæmt
skipafélagið Samskip til að greiða ekkju Óskars
Guðjónssonar, sem fórst með Dísarfellinu árið
1997, skaðabætur vegna missis framfæranda en
talið var að skipstjóri skipsins hefði sýnt af sér
saknæmt gáleysi með því senda ekki strax út
neyðarkall þegar skipið komst í hættu suðaustur
af landinu. Bæturnar nema 1,8 milljónum króna.
Tólf manna áhöfn var á skipinu en skipverjarnir
lentu allir í sjónum og létu tveir þeirra lífið.
Í dómi segir að ekki liggi fyrir hvers vegna skip-
ið fékk á sig halla á bakborða og sjór komst inn í
lestarnar. Bent var á að skipstjórinn hefði getað
sent út neyðarkall fyrr en gert var eða strax og
ljóst var að skipið rétti sig ekki af eftir að gámar af
lestarlúgum fóru fyrir borð. Skipstjórinn var vak-
inn um kl. 2 umrædda nótt, eftir að skipið fékk á
sig halla og fyrirskipaði hann að reynt yrði að
dæla úr lestum skipsins. Fyrir kl. 4 yfirgáfu vél-
stjórar vélarrúmið þar sem þeir fengu ekkert við
ráðið og skipið hélt áfram að hallast. Eftir það gat
ekkert bjargað skipinu og er óútskýrt af hverju
skipstjórinn beið til kl. 4.52 um nóttina með að
gefa út neyðarkall, segir í dómi.
Samkvæmt þeim tímaskýrslum sem fyrir liggja
um viðbrögð björgunarþyrlunnar hefði þá verið
unnt að bjarga skipshöfninni af skipinu áður en því
hvolfdi og áður en áhöfnin fór í sjóinn. Með þessari
ákvörðun sinni að kalla ekki á hjálp þegar hennar
var þörf sýndi skipstjórnandi af sér saknæmt gá-
leysi, segir í dómi.
Óskar heitinn fékk hjartaáfall við að lenda sjón-
um og taldi dómurinn yfirgnæfandi líkur á því að
rétt viðbrögð skipstjóra á fyrri stigum hefðu leitt
til þess að áhöfninni hefði verið bjargað áður en
hún lenti í sjónum. Fjölskipaður dómur taldi að
andlát Óskars hefði verið afleiðing af þessari sak-
næmu háttsemi. Voru Samskip talin bera ábyrgð á
tjóni ekkju hans á grundvelli húsbóndaábyrgðar.
1,8 milljónir í bætur fyrir sak-
næmt gáleysi skipstjórans
Morgunblaðið/Golli
Myndin er tekin þar sem Dísarfellið fórst.
Samskip bera húsbóndaábyrgð vegna sjóslyssins þegar Dísarfellið fórst 1997
SPARAKSTURSKEPPNI FÍB og Atlantsolíu fór fram í
gær. Hér var um að ræða fyrri keppnina af tveimur á
þessu ári og tóku 32 bílar þátt í þessum atvinnumanna-
hluta hennar. Að þessu sinni mældist Skoda Oktavía,
1,9 TDI með minnsta eyðslu eða 3,5 l á hundraðið en
Ragnar Bergþórsson ók bílnum. Í öðru sæti varð Brynj-
ar S. Þorgeirsson á Ford Cmax, með 3,75 l og í þriðja
sæti lenti Eiríkur Einarsson á Toyota Yaris D4D með
3,95 l.
Öflugasti bíllinn, Ford GT, mældist með 11,31 l.
Morgunblaðið/Árni Sæberg
Skoda Oktavia með 3,5 lítra á hundraðið
ÍBÚAR Álafosskvosar héldu mótmælum sín-
um vegna framkvæmda í næsta nágrenni
Kvosarinnar áfram í gær. Samkvæmt upplýs-
ingum frá lögreglu höfðu reiðir íbúar svæð-
isins samband við hana í gær og fóru þess á
leit við hana að framkvæmdir yrðu stöðvaðar.
Ekki kom þó til átaka og ekki voru gerðar
tilraunir til að stöðva framkvæmdirnar. Lög-
reglan hefur hins vegar ekki gripið til neinna
aðgerða á svæðinu þar sem verktakar segjast
hafa öll tilskilin leyfi og skipulagsyfirvöld
hafa ekki farið fram á að framkvæmdir verði
stöðvaðar. Að sögn Berglindar Björgúlfs-
dóttur, formanns Varmársamtakanna, voru
framkvæmdirnar kærðar til skipulags-
yfirvalda í gærmorgun og bíða samtökin eftir
úrskurði um lögmæti þeirra.
„Skrípaleikur og sýndarmennska“
Karl Tómasson, forseti bæjarstjórnar Mos-
fellsbæjar, ítrekar þá afstöðu bæjaryfirvalda
að ekki þurfi framkvæmdaleyfi fyrir fráveitu-
lögnunum og segir að fulltrúum Varm-
ársamtakanna hafi verið greint frá því í síð-
ustu viku að framkvæmdir myndu hefjast á
svæðinu. „Það er alveg ljóst að framganga
Varmársamtakanna er farin að jaðra við og
er í raun orðinn skrípaleikur og sýnd-
armennska,“ segir Karl og viðurkennir að
hann sé orðinn langþreyttur á þrætunum.
„Staðreyndin er sú að í landi Helgafells er að
rísa hverfi sem hefur staðið til að reisa í ára-
tugi og að sjálfsögðu þarf að leggja veg að
hverfinu. Auðvitað vill enginn fá veg í sitt ná-
grenni en bæjarfélaginu ber hins vegar
skylda til að hugsa um hag sem flestra íbúa,“
segir Karl og bendir á að bæjaryfirvöld hafi
gert róttækar breytingar á fyrirhugaðri
tengibraut til þess að milda áhrif hennar,
íbúum Álafosskvosar til hagsbóta. Hann telur
hugmyndir samtakanna um nýtt vegstæði
glórulausar og segir það skjóta skökku við að
samtök sem kenni sig við Varmá og umhverf-
isvernd, leggi til að Varmá verði brúuð fyrir
neðan Reykjalund, líkt og fulltrúar samtak-
anna hafi lagt til.
Lagning vegarins í gegnum Álafoss-
kvos farsælasta lausnin
Eins og áður hefur komið fram var upp-
runalegt framkvæmdaleyfi við Helgafellsveg
afturkallað í febrúarlok, þar sem Mosfellsbær
hafði ekki látið gera skýrslu um umhverfis-
áhrif framkvæmdarinnar. Ragnheiður Rík-
harðsdóttir, bæjarstjóri Mosfellsbæjar, segir
að á fundi skipulagsnefndar bæjarfélagsins,
sem fram fór í gær, hafi verið lögð fram drög
að skýrslu um umhverfisáhrif deiliskipulags
Helgafellsvegar, sem matsfyrirtækið Alta
hefur unnið fyrir bæjarfélagið. Í skýrsludrög-
unum komi fram að lagning tengibraut-
arinnar í gegnum Álafosskvos, með þeim
breytingum sem bæjaryfirvöld hafa gert á
legu tengibrautarinnar, sé farsælasta lausnin
hvað varðar áhrif á náttúru og landnýtingu.
Ragnheiður segir að líklegt sé, gangi allt eft-
ir, að deiliskipulagið ásamt umhverfisskýrsl-
unni verði auglýst í næstu viku og þá gefist
öllum kostur á að gera athugasemdir. Þegar
bæjaryfirvöld hafi farið yfir þær verði deili-
skipulagið sent Skipulagsstofnun til staðfest-
ingar
Berglind Björgúlfsdóttir segir að Varmárs-
amtökin muni fara með málið fyrir dómstóla
gerist þess þörf. „Við erum tilbúin til að fara
með það fyrir stofnanir Evrópusambandsins
enda hefur lítið reynt á þessi álitaefni hér,“
sagði Berglind.
Íbúar Álafosskvosar mótmæltu framkvæmdum bæjaryfirvalda annan daginn í röð. Framkvæmd-
irnar hafa verið kærðar til skipulagsyfirvalda og bíða íbúarnir óþreyjufullir eftir niðurstöðu
Líkir framgöngu íbúa við skrípaleik
Morgunblaðið/ÞÖK
Mótmæli Framkvæmdum í Álafosskvosinni
var mótmælt í gær.
Eftir Friðrik Ársælsson
fridrik@mbl.is
ÍÞRÓTTAFÉLAGIÐ Grótta á Sel-
tjarnarnesi hlaut í gær foreldra-
verðlaun Heimilis og skóla fyrir
samræmingu skóladags og æfinga-
tíma í samvinnu við bæjaryfirvöld
og Grunnskóla Seltjarnarness.
Þorgerður Katrín Gunnarsdóttir
menntamálaráðherra afhenti
Bjarna Torfa Álfþórssyni, for-
manni Gróttu, verðlaunin.
Auk foreldraverðlaunanna
sjálfra voru veitt tvenn hvatning-
arverðlaun og ein dugnaðarforka-
verðlaun. Hvatningarverðlaun
fengu Reykjanesbær fyrir að
styðja við bakið á foreldrastarfi
með veitingu styrks til ráðningar
verkefnistjóra FFGÍR og Guðlaug
Snorradóttir og starfsfólk Nýbúa-
deildar við Hjallaskóla í Kópavogi
fyrir óeigingjarnt starf í þágu ný-
búa. Þá var Hlynur Snorrason val-
inn dugnaðarforkur ársins fyrir
forvarnaverkefni í Grunnskólum
Ísafjarðarbæjar.
Grótta fékk
foreldra-
verðlaunin
Samræmdu skóla
og æfingatíma
UMFERÐARÓHAPP varð skammt
frá Þórustöðum í Ölfusi á sjötta tím-
anum í gær þegar bifreið fór út af
veginum með þeim afleiðingum að
hún hafnaði ofan í skurði.
Að sögn lögreglu er talið að öku-
maðurinn, sem var eldri maður, hafi
fengið aðsvif eða hjartaáfall undir
stýri.
Maðurinn var fluttur með sjúkra-
bifreið á slysadeild í Reykjavík.
Maðurinn er ekki sagður hafa slas-
ast í óhappinu en nánari upplýsingar
um líðan hans liggja ekki fyrir að svo
stöddu.
Fékk að-
svif undir
stýri
Slys Óhappið varð síðdegis í gær.
Ljósmynd/Guðmundur Karl
KAUPÁS hf. sem flytur inn Organic
Baby-barnamat, framleiddan af
UNFI í Bandaríkjunum, hefur inn-
kallað Organic Baby, Plum Bananas
Oats-barnamat með dagsetningu 02-
2009, lotunúmer 0396X2413. Hann
hefur verið seldur í verslunum Nóa-
túns og Krónunnar. Um er að ræða
barnamat í glerkrukkum.
Ástæða innköllunarinnar er að í
einni krukku af Organic Bacby Plum
Bananas Oats með ofangreindu lotu-
númeri hefur fundist aðskotahlutur
úr annarri krukku og segist Kaupás
vilja fyrirbyggja möguleika á skaða
sem gæti hlotist af því ef aðskota-
hlutir leyndust í fleiri krukkum af
viðkomandi tegund. Vara úr sömu
framleiðslulotu hefur þegar verið
fjarlægð úr hillum verslana. Dag-
setningu og lotunúmer umræddrar
framleiðslu má finna á loki krukk-
unnar.
Óskað er eftir því að neytendur
sem kunna að eiga viðkomandi vöru
skili vörunni til Kaupáss eða láti fyr-
irtækið vita símleiðis þannig að hægt
sé að nálgast vöruna hjá viðkomandi.
Innkallar
barnamat
♦♦♦