Morgunblaðið - 27.06.2007, Blaðsíða 11

MORGUNBLAÐIÐ MIÐVIKUDAGUR 27. JÚNÍ 2007 11
FRÉTTIR
„Hvergerðingar
eru langþreyttir
á þessum vegi,“
segir Aldís Haf-
steinsdóttir,
bæjarstjóri í
Hveragerði, um
Suðurlandsveg.
„Það er löngu
tímabært að
auka flutnings-
getu hans og tvö-
földun er eina leiðin til þess. Vegur-
inn er löngu sprunginn á álags-
tímum,“ segir hún og ítrekar að
meðaltalsumferð um Suðurlands-
veg sé nú orðin meiri en hún var á
Reykjanesbraut þegar farið var í
tvöföldun á henni.
„Það er gríðarlegt öryggisatriði
að tvöfalda veginn. Með aðeins eina
akrein í hvora átt er mjög erfitt að
hafa ökutæki með mismunandi há-
markshraða á svona fjölförnum
vegi. Flutningabílar og bílar með
eftirvagna hafa 80 kílómetra há-
markshraða á klukkustund, en aðr-
ir 90. Hér er mikið um malarflutn-
inga, og hundruð ferða farin á
hverjum degi úr malarnámum fyrir
austan fjall. Þungaflutningar aust-
ur á land fara allir um þennan veg,“
segir Aldís, en hún telur fulla tvö-
földun einu lausnina til framtíðar.
Tvöföldun
eina leiðin
Aldís
Hafsteinsdóttir
Tvöföldun vega út frá höfuðborginni forgangsmál að mati forsvarsmanna bæjarfélaga á suðvesturhorninu
„Ferðamenn
voru tvo og hálf-
an tíma að kom-
ast frá Grundar-
tanga og suður á
sunnudaginn,“
segir Gísli S. Ein-
arsson, bæjar-
stjóri á Akranesi,
um ástandið á
Vesturlandsvegi.
Gísli lýsir um-
ferðardögum eins og um síðustu
helgi þannig að álagið sé allan dag-
inn, ekki á afmörkuðum tímapunkt-
um. Hann telur að tvöföldun vegar-
ins og Hvalfjarðarganga verði að
fara í gang sem fyrst og vill tvöfald-
an veg alla leið að Bifröst í Norður-
árdal, enda margir hættulegir kafl-
ar á leiðinni, ekki síst á milli
Munaðarness og Bifrastar.
„Þetta verður 4-5 ára verkefni,
en menn verða komnir í alvarlegt
ráðþrot á næstu tveimur árum ef
þróun umferðarþungans helst eins
og hún hefur verið undanfarið,“
segir Gísli og nefnir sérstaklega að
gríðarleg fjölgun eftirvagna auki
umferðarþungann til mikilla muna.
Hann segir Akraneskaupstað hagn-
ast á nálægðinni við Reykjavík, en
umferðarþunginn sé þó galli á
þeirri sambúð.
Tvöfalt upp
að Bifröst
Gísli S.
Einarsson
„Umferðarþung-
inn hefur verið
mikill lengi og
nær frá Reykja-
vík alla leið á Sel-
foss, en þar losn-
ar tappinn,“
segir Ragnheið-
ur Hergeirs-
dóttir bæjar-
stjóri sveitar-
félagsins Ár-
borgar. Hún segir augljóst að
Suðurlandsvegur, aðkoman að Sel-
fossi og Ölfusárbrúin séu mikil
þrenging. Við Selfossbæ sjálfan
segir hún málið fyrst og fremst snú-
ast um að minnka tafir fyrir ferða-
menn og óþægindi fyrir bæjarbúa,
en úti á þjóðvegi sé tvöföldun gríð-
arlegt öryggisatriði. Þetta segir
hún horfa til betri vegar, aðgerðir
séu hafnar í samgönguráðuneyti og
byrjað að hanna nýjan veg sem
verður leiddur framhjá bænum.
Megináhersla Ragnheiðar er á tvö-
földun austur fyrir Selfoss og nýja
brú yfir Ölfusá. „Það er skýr krafa
af okkar hálfu að vegurinn verði
tvöfaldaður, enda sjáum við að svo-
kallaður tveir-plús-einn vegur ann-
ar alls ekki því sem þarf hinum
megin við Hellisheiðina og er ekki
lausn til framtíðar.“
2+1 vegur
er ekki nóg
Ragnheiður
Hergeirsdóttir
„Það er borð-
leggjandi fyrir
okkur sem búum
í Mosfellsbæ, á
Kjalarnesi, í Kjós
og langleiðina
upp í Borgarnes,
að Vesturlands-
vegur verði ein-
faldlega tvöfald-
aður. Síðasti
sunnudagur
sýndi okkur það, hér var í 4-5
klukkustundir bíll við bíl svo langt
sem augað eygði,“ segir Ragnheið-
ur Ríkharðsdóttir, bæjarstjóri í
Mosfellsbæ.
Hún segir Sundabraut vissulega
munu slá eitthvað af umferðinni um
Vesturlandsveg, en þrátt fyrir það
sé mikilvægt að það verði tvöfald-
að. „Ég tel að tvöföldun Vestur-
landsvegar standi okkur nær held-
ur en Sundabrautin, enda mun
Sundabrautin heldur alls ekki taka
alla þá umferð sem fer hér í gegn-
um bæinn,“ segir Ragnheiður. Hún
leggur áherslu á vinnu sem hefur
verið unnin í þessu máli, bæjar-
stjórar á höfuðborgarsvæðinu hafi
gert tillögur um úrbætur í þessum
málum í heild, sem lagðar voru fyr-
ir samgönguráðherra síðastliðið
vor.
Bílaröðin
ansi löng
Ragnheiður
Ríkharðsdóttir
Vilhjálmur Þ.
Vilhjálmsson,
borgarstjóri í
Reykjavík, segir
það mjög alvar-
legt að umferð sé
jafnmikil og raun
ber vitni á viss-
um tímum, en
Sundabraut er
honum efst í
huga. „Það er
gerð Sundabrautarinnar sem ég
horfi fyrst og fremst á núna. Það er
mjög mikilvægt að þeirri fram-
kvæmd verði hraðað. Nú er hún í
undirbúningsferli og verið að skoða
nokkra kosti, en sjálfum líst mér
best á jarðgöng,“ segir Vilhjálmur.
Hann deilir samt sem áður skoð-
unum annarra á mikilvægi þess að
Vesturlandsvegur verði tvöfald-
aður. Spurður um forgangsröðun
segir Vilhjálmur: „Sundabrautin er
alveg sérstakt verkefni. Búið er að
eyrnamerkja ákveðna fjármuni fyr-
ir hana. Ég lít ekki svo á að eitt
þurfi endilega að víkja fyrir hinu.“
Hann telur jafnvel hægt að fara í
hvort tveggja um svipað leyti, enda
sé þarna um mjög mikilvægar sam-
gönguúrbætur að tefla og mörg
erfið gatnamót á Vesturlandsvegi
sem þurfi úrbóta við.
Sundabraut
og meira til
Vilhjálmur Þ.
Vilhjálmsson
SUNDAGÖNG eru á byrjunarstigi
í hinu lögformlega matsferli um-
hverfisáhrifa. Drög að tillögu að
matsáætlun voru kynnt í gær, en
segja má að matsáætlun sé eins
konar yfirlit yfir það sem taka
skal til skoðunar við gerð frum-
matsskýrslu. Áætlað er að vinnu
framkvæmdaraðila við frummats-
skýrslu verði lokið um miðjan
næsta vetur og henni skilað til
Skipulagsstofnunar í kjölfarið.
Skipulagsstofnun tekur skýrsluna
til umfjöllunar og innir eftir við-
brögðum íbúa við henni. Að því
loknu þarf framkvæmdaraðili að
vinna úr athugasemdum áður en
endanleg matskýrsla er lögð
fram til Skipulagsstofnunar, sem
þá hefur fjórar vikur til umfjöll-
unar, áður en útgáfa fram-
kvæmdaleyfis er auglýst. Gert er
ráð fyrir því að breytingar á að-
alskipulagi og svæðisskipulagi
verði unnar samhliða þessu, sem
og umhverfismat áætlana. Ef
gengur að óskum, má reikna með
því að framkvæmdaleyfi fáist út-
gefið að um 12 mánuðum liðnum,
en ef framkvæmdirnar verða
kærðar til úrskurðarnefndar
Skipulags- og byggingarmála
lengir það útgáfu leyfisins í allt
að þrjá mánuði.
Á byrjunarstigi
í matsferlinu
Fulltrúar FramkvæmdasviðsReykjavíkurborgar, Skipu-lagsstofnunar og Línu-hönnunar kynntu drög að
tillögu að matsáætlun fyrsta áfanga
Sundabrautar á fjölmennum fundi í
Rimaskóla í gær. Í fyrsta áfanga
kemur annars vegar til greina að
gera 4,3 kílómetra löng jarðgöng sem
hefjast við Kirkjusand og enda á
Gufunesi, svokölluð Sundagöng, og
hins vegar að byggja brýr og gera
landfyllingu frá Vogahverfi til Gufu-
ness um Elliðaárvog. Hefur sú tillaga
verið nefnd Eyjaleið. Að sögn Ólafs
Bjarnasonar, aðstoðarsviðsstjóra
Framkvæmdasviðs Reykjavíkur-
borgar, virðast ýmsir borgarfulltrúar
og almenningur mun spenntari fyrir
fyrri kostinum, enda þótt bæði gerð
jarðgangnanna og viðhald þeirra sé
mun dýrara en gerð og rekstur
þeirra vegamannvirkja sem Eyja-
leiðin gerir ráð fyrir. Gróflega áætl-
aður kostnaður við gangnagerðina
nemur 14,6 milljörðum króna á móti
10,6 milljörðum sem áætlað er að
Eyjaleiðin muni kosta.
Áhyggjur íbúa í Sundum af
umferðarþunga og hávaða
Flestir fundargestir virtust sam-
mála því að langeðlilegast væri að
gera Sundagöng. Með því yrðu mun
færri íbúar í austurbæ Reykjavíkur
og Grafarvogi fyrir óþægindum
vegna umferðarþunga og hávaða.
Gert er ráð fyrir að Sundabrautin
tengist við Sæbraut sunnan Holta-
vegar og var það sú tenging sem íbú-
ar í Sundum höfðu hvað mestar
áhyggjur af. Telja þeir að tengingin
muni valda því að umferð um Sæ-
brautina, bæði frá Miklubraut og
Reykjanesbraut, aukist í kjölfar
framkvæmdanna, þar sem vegfar-
endur muni taka Sundabrautina
fram yfir Vesturlandsveginn á leið
sinni úr bænum. Þá höfðu íbúar við
Sæviðarsund og aðrar nærliggjandi
götur áhyggjur af miklum umferðar-
þunga og hávaða í kringum teng-
inguna sunnan við Holtaveg og
spurðu þeir framkvæmdaraðila til
hvaða mótvægisaðgerða þeir ætluðu
að grípa til að sporna við áhrifum um-
ferðarmannvirkjanna. Fram-
kvæmdaraðilar sögðu ekki unnt að
svara nákvæmlega spurningum á
borð við þessar, þar sem aðeins væri
um að ræða drög að matsáætlun, þ.e.
drög að því hvaða taka ætti til skoð-
unar við gerð frummatsskýrslu. Þeg-
ar hún lægi fyrir yrði sennilega unnt
að svara flestum þessum spurningum
þar sem þá væri búið að taka út ein-
staka þætti framkvæmdarinnar og
áhrif þeirra á umhverfi, hljóðvist og
samgöngur.
Þeir þættir sem mest áhersla verð-
ur lögð á að skoða í frummatsskýrslu
fyrir Sundagöngin eru hafstraumar,
göngur laxfiska, hljóðvist, loftgæði,
landslag og sjónrænir þættir, sam-
göngur og umhverfisáhrif fram-
kvæmdanna. Einnig verður litið til
áhrifa framkvæmdanna á útivist,
fornleifar og náttúruminjar.
Tvíbreiður vegur í báðar áttir
Á íbúafundinum í gær var einnig
rætt um annan áfanga, en matsáætl-
unin er komin lengra hvað hann
varðar; búið er að kynna drög að til-
lögu að matsáætlun og taka við at-
hugasemdum frá almenningi og mun
framkvæmdaraðili á næstu dögum
skila tillögu að matsáætlun til Skipu-
lagsstofnunar sem hefja mun form-
lega málsmeðferð með því að auglýsa
tillöguna. Hins vegar er stefnt að því
að frummatsskýrslum fyrir báða
áfanga verði skilað samtímis í vetur.
Í öðrum áfanga er gert ráð fyrir því
að leggja tvíbreiðan veg í báðar áttir
frá Gufunesi, norður Geldinganes og
yfir í Gunnunes þaðan sem hann fer
um Álfsnes og yfir Kollafjörð. Veg-
urinn endar á því að sameinast Vest-
urlandsvegi skammt norðan Kolla-
fjarðar.
Þrír valkostir verða teknir fyrir í
mati á umhverfisáhrifum varðandi
annan áfanga. Innri og ytri leiðir yfir
Leiruvog verða skoðaðar sem og
jarðgöng undir Eiðsvík. Samkvæmt
grófri kostnaðaráætlun mun ytri leið
á Geldinganesi yfir Leiruvog kosta
12,4 milljarða króna, innri leiðin 10,4
milljarða og jarðgöng undir Eiðsvík
14,6 milljarða.
Fundarmenn vöktu máls á því að
eðlilegast væri að gera jarðgöng
samfleytt frá Kirkjusandi og upp á
Álfsnes. Helga Jóhanna Bjarnadótt-
ir, sviðstjóri umhverfissviðs Línu-
hönnunar, svaraði því til að slík
gangnagerð væri mjög dýr og því
hefði hún verið lögð til hliðar.
Tillaga að matsáætlun fyrsta
áfanga Sundabrautar lögð fram
Eftir Friðrik Ársælsson
fridrik@mbl.is
    

 



























 






  


 




Morgunblaðið/ÞÖK
Framtíðin Áhugasamir íbúar beggja vegna Elliðaárvogs skoða líkan af fyrirhugaðri lagningu Sundabrautar.