Skinfaxi - 01.12.2002, Side 28

Siggi Hall meistarakokkur
'Ég mæli því með þvi að hreindýrið komi i stað rjúpunnar fýrir þessi
jól. Einnig er hægt að fá heiðar- eða villigæs. Þetta er vissulega ekki
það sama og rjúpan, en það er lyngbragð af gæsinni ef um góða
heiðargæs er að ræða sem er skotin á réttum stöðum' - Siggi Hall
Ertu skráður í íþróttafélag núna? ,,Nei, en ég er fyrst og
fremst Fjölnismaður í dag. Ég reyni að fylgjast með þeim og starfa
og vil vinna að velgengni félagsins."
Þú ert þó ekki hættur öllum íþróttum. Má ekki lcalla
kokkalistina íþrótt? ,,Ég veit ekki hvort það er íþrótt og þó því
vissulega er mikil keppni í þessum geira. Ég er í stöðugri keppni
við sjálfan mig og gesti þegar mikið er að gera. Þá þarf að vinna
hratt og vel og því má oft segja að maður sé í kappi við tímann."
Hvernig fékkstu áhuga á eldamennsku? ,,Það eru mörg ár
síðan. Ég óx einhvern veginn inn í þetta. Ég fór ungur að árum að
vinna í Danmörku á veitingahúsi við að vaska upp. Mér leist vel á
þessa vinnu, enda innivinna og þótt þetta væri uppvask þá fannst
mér það ekkert leiðinlegt auk þess gat ég fengið nóg að borða.
Þegar á leið fór ég að aðstoða kokkana við matinn og þá ákvað ég
að leggja þetta fyrir mig. Dreif mig því heim til íslands og fór að
læra á Hótel Sögu."
Hefur þú alltaf verið mikill matmaður? „Nei, ég held að ég
hafi verið sérvitur þegar ég var ungur og nokkuð erfiður þegar
kom að mat."
Þú hefur s.s. ekki byrjað í þessu með að hræra í pottunum
hjá mömmu þinni fyrir jól og hátíðir? „Nei, ekki get ég sagt
það. Ég kom ekki nálægt þessu fyrr en boltinn fór að rúlla í
Danmörku."
Hvað kitlar bragðlauka Sigga Hall í dag? „Það er vandaður
matur sem er gerður úr góðu hráefni þar sem hugvit og hæfileiki í
samsetningu á mat ræður ríkjum frekar en flóknar, langsóttar og
einnkennilegar aðferðir við að búa til einhvern einfaldan rétt. Ég
hef verið mjög hrifinn af ítalskri matargerð undanfarið og þá hef
ég aðallega aðhyllst þeirra heimspeki í matargerð. Þar ræður
einfaldleikinn ríkjum og hann er alltaf bestur þegar uppi er
staðið."
Hvernig fer það með menn að standa í eldhúsinu allan
daginn við að elda ljúfenga rétti? „Er ekki hættan á að vera
stöðugt að bragða á réttunum? „jú, vissulega. Ég er reyndar mikið
í hinum daglega amstri við reksturinn og er því ekki eins mikið í
eldhúsinu. Ég fylgist þó með hverju einasta atriði sem þar fer fram
og ætlast til að það sé gert á þeim nótum sem ég bið um. Ég geri
því mikið af því að smakka réttina sem sést kannski best á mér.
Maður fitnar bara með árunum," segir hann og horfir á magann.
„Ég skammast mín ekkert fyrir að vera kominn með smá bumbu
enda alltaf verið svo mjór í gegnum tíðina."
Það styttist í jólin. Ertu mikið jólabarn?
, ,Ef þú myndir spyrja einhvern annan en mig þá myndi hann segja
að ég væri það ekki. Mér finnst jólin sá tími þar sem allir eru svo
uppteknir af jólnum að það hefur ekki tíma fyrir hvort annað fyrr
en á aðfangadag. Mér finnst sjálf jólin mjög skemmtileg. Þau eru
og eiga að vera hefðbundin. Þetta er tími fjölskyldunnar og
þannig eiga jólin að vera. En desember er mjög sérstakur
mánuðir, þar sem mikið er um mat og neyslu á öllum sviðum. Það
furðulega við þetta er að fólk fer í allt annan búning yfir jólin, það
skiptir um gír og hagar sér öðruvisi heldur en aðra mánuði ársins.
Það er bara eins og það sé skipt um plánetu," segir hann og setur
upp jólabrosið.
Það þurfa margir að bregða út af vananum þessi jól þar
sem erfitt er að fá rjúpu. Hvað ráðleggur kokkurinn Siggi
Hall þessu fólki að gera og hvað líkist rjúpunni mest? „Það
er ekkert sem beint líkist rjúpunni á bragðið en hreindýrakjötið
kemst næst því. Ég mæli því með þvi að hreindýrið komi í stað
rjúpunnar fyrir þessi jól. Einnig er hægt að fá heiðar- eða villigæs.
Þetta er vissulega ekki það sama og rjúpan, en það er lyngbragð
af gæsinni ef um góða heiðargæs er að ræða sem er skotin á
réttum stöðum."
En hvað er Siggi sjálfur með í matinn á aðfangakvöld? „Ég
er með rjúpu og hreindýr, Það er gömul hefð og ég gæti ekki
breytt út af þeim vana."
Ertu búinn að tryggja þér rjúpu? „Já, ég er búinn að því. Ég
skýt hana þó ekki sjálfur en á vini og ættingja sem skjóta fyrir mig
nokkrar rjúpur, því ég þarf ekki margar," segir hann að lokum.