Vikan - 01.02.1979, Side 31

Þeir hafa gulltryggt
nafnið
Eins og fram kemur í úrslitum Vinsældavalsins, eiga þeir
bræður í Bee Gees sér marga aðdáendur hér á landi. Það
kom raunar á óvart, að þeir urðu ekki í efsta sæti sem
hljómsveit ársins, en við hér á Vikunni erum ekki í vafa um,
að plakatið með þeim verður vel þegið, því margir hafa látið
í Ijósi ósk um að fá góða mynd af þeim til að prýða veggi
hjá sér.
Kjarninn í Bee Gees hafa alltaf verið
þeir bræður, Barry (fæddur í september
1946) og tvíburarnir Robin og Maurice
(fæddir í desember 1949). Þeir eru
fæddir í Englandi, nánar tiltekið í
Manchester, en þaðan er einnig hið
fræga fótboltalið Manchester United.
1958 flytja þeir ásamt foreldrum sínum
til Ástralíu og það leið ekki á löngu, þar
til þeir fóru að láta til sín heyra. Þeir
höfðu verið byrjaðir að fikta í
hljóðfærum, áður en þeir fluttu til
Ástraliu og meðal annars unnið í
tónlistarkeppni, þegar Barry var níu ára
og tviburarnir aðeins sjö, en þeir höfðu
eiginlega ekki gert neitt af því að koma
fram opinberlega.
Síðan er það, að þeir vinna í
hæfileikakeppni, eftir að hafa búið
aðeins í nokkra mánuði í fyrirheitna
landinu. Eftir það fóru þeir að koma
fram i vikulegum skemmtiþætti í
sjónvarpinu, og 1963 kemst fyrsta lagið
þeirra, „Three Kisses Of Love”, á
vinsældarlistann. Og þeir létu ekki þar
við sitja, heldur unnu dyggilega að því
að tryggja sig í sessi. Þeir voru ákveðnir
í því að leggja heiminn að fótum sér.
Bræðurnir Gibb sneru aftur til
Englands, eftir að hafa undirritað
samning við Robert Stigwood. Hann
hafði hönd í bagga með stjórnun á
„Hair”, „Jesus Christ, Superstar” og
„Tommy”, stjórnaði tveimur
Bítlamyndum, „Sgt. Pepper’s Lonely
Hearts Club Band”, „Grease” og
„Saturday Night Fever”. Undir
handleiðslu hans leið ekki á löngu, þar
til þeir höfðu breska vinsældarlistann i
höndum sér. 1967 kom út lagið „New
York Mining Disaster 1941” og nokkru
seinna „Massachussetts”, bæði lögin
eftir þá sjálfa.
En ekki gekk nú samvinnan sem best,
og 1969 ákvað Barry að reyna fyrir sér
einn. Hann gaf út eina plötur, áður en
hann ákvað að snúa til baka. Árið 1971
komu lögin „Lonely Days” og „How
Can You Mend A Broken Heart?” á
markaðinn, og eftir það hafa þeir
bræður ekki vikið af toppnum. Tvö
síðustu framlög þeirra í poppheiminum,
tónlistin í kvikmyndinni „Saturday
Night Fever” og hlutverk þeirra í „Sgt.
Pepper’s Lonely Hearts Club Band”
hafa siðan gulltryggt þeim sess, við hlið
Bítlanna, sem einir fremstu tónlistar-
menn aldarinnar.
HS