Skírnir - 01.01.1934, Side 188

William Morris.
Minningarorð 24. marz 1934.
Eftir GuSm. Finnbogason.
1 dag er liðin öld síðan William Morris fæddist. Það er
full ástæða fyrir oss íslendinga til að minnast hans, þó að
hann hefði ekkert annað gert en það, sem hann hefir unnið
Islandi til gagns með ritstörfum sínum og samvinnu við
Eirík Magnússon. En um þann þáttinn í starfi hans má
vísa til Sögu Eiríks Magnússonar í Cambridge, eftir dr.
Stefán Einarsson. Eg ætla ekki heldur að segja æfiatriði
Morrisar, því að þau hafa áður verið rituð á íslenzku. Dr.
Jón Stefánsson ritaði um Morris í 3. árg. Eimreiðarinnar
1897, árið eftir að hann dó, og í 29. árg. sama tímarits er
grein um hann, eftir Matthías Jochumsson, og er þar sagt
margt frá æfi hans. Þá ritaði og André Courmont snjalla
grein í Skírni 1913: „Guðrún Ósvífrsdóttir og William
Morris“. En svo sem kunnugt er, kvað Morris söguljóð af
efni Laxdæla sögu.
Morris var eitt af höfuðskáldum Englendinga á 19.
öld og ágætur rithöfundur í lausu máli. Heildarútgáfa af
ritum hans er 24 bindi, um 400 bls. hvert í stóru 8 bl. broti.
Má af því marka, hver afkastamaður hann var við ritstörf-
in. Hann orti fjölda söguljóða og sótti efnið í fornar bók-
menntir margra og óskyldra þjóða, þar á meðal Islendinga.
Hann þýddi og Eneas kviðu Virgils og Odyneifs kviðu
Hómers. Hann ritaði mikið um listir. En aðalstarf hans er
þó enn ótalið, og um eðli þess ætla eg sérstaklega að tala,
því að það á erindi til vor. Morris var listamaður í víð-