Tímarit lögfræðinga - 01.03.1979, Side 47
Ávíð
og dreif
AÐALFUNDUR DÓMARAFÉLAGS ÍSLANDS 1978
Aðalfundur Dómarafélags fslands 1978 var haldinn dagana 16. og 17. nóv-
ember s.l. í Tollhúsinu í Reykjavík.
Formaður félagsins dr. Ármann Snævarr hæstaréttardómari flutti skýrslu
um starfsemina undanfarið ár. Gat hann þess m.a., að félagið hefði gengist
fyrir málþingi um samningu dóma síðastliðið vor, tengsl við samtök dómara
á Norðurlöndum efld og stjórnin hefði sent dómsmálaráðuneytinu erindi um
endurmenntun dómara, starfsleyfi og starfsþjálfun. Þá hefði verið tekið á móti
hópi bandarískra dómara, sem staðið hefðu við hér á landi dagana 11.—13.
maí s.l. á heimleið frá Evrópu.
Upphafsfundinn sátu þeir Steingrímur Hermannsson dómsmálaráðherra,
Tómas Árnason fjármálaráðherra ásamt ýmsum embættismönnum ráðuneyt-
anna og Guðjón Steingrímsson hrl. formaður Lögmannafélags íslands. Fluttu
gestirnir fundarmönnum ávörp.
Fyrri dagurinn var að mestu helgaður málþingi um þinglýsingalögin nýju,
sem taka gildi 1. janúar 1979. Aðalframsögumaður var dr. Gaukur Jörunds-
son prófessor. Aðrir frummælendur þeir Þorleifur Pálsson deildarstjóri, Bogi
Nílsson sýslumaður og Sigurður Sveinsson borgarfógeti. Margir fundarmanna
tóku til máls, og urðu umræður hinar fjörlegustu. Var fjölmörgum fyrirspurnum
beint til frummælenda, og leystu þeir greiðlega úr þeim. Að endingu fluttu
framsögumenn stuttar yfirlitsræður.
Að loknum hinum eiginlegu aðalfundarstörfum fyrir hádegi seinni daginn
gerði Haraldur Henrýsson sakadómari grein fyrir störfum nefndar, sem fjallað
hefur um úrræði til að skapa skilyrði fjölþættari og breiðari starfsþjálfunar dóm-
ara. Nefnd þessi var skipuð af stjórn félagsins s.l. vetur, og sitja í henni auk
Haralds þeir Garðar Gíslason borgardómari og Þorleifur Pálsson deildarstjóri.
Nokkrar umræður urðu um erindi Haralds.
Steingrímur Gautur Kristjánsson héraðsdómari flutti yfirlit um störf löggiafar-
nefndar, oa Magnús Thoroddsen borgardómari sagði frá heimsókn bandarískra
dómara til fslands s.l. vor.
Þá var tekið fyrir efnið: Um úrbætur til að hraða meðferð dómsmála. Fram-
söguerindi fluttu þeir Björn Ingvarsson yfirborgardómari og Halldór Þorbjörns-
son yfirsakadómari. Tóku ýmsir til máls, og stóðu umræður fram eftir degi.
Fundinn sóttu dómarar hvaðanæva að af landinu, og fjölluðu þeir um hin
ýmsu hagsmuna- og sérmál dómarastéttarinnar.
41