Tímarit lögfræðinga - 01.03.1979, Blaðsíða 52

um það nefna, að við hjónaskilnaði er oft hart deilt um umráðarétt yfir gælu-
dýrum fjölskyldunnar!
Hér hafa verið stigin nokkur hliðarspor út fyrir þá línu, er venjulega er þrædd
í Tímariti lögfræðinga. Skal því aftur vikið að lagaskólanum í Berkeley. Bóka-
safn er mjög gott, en gæti verið betra. Skortur á húsrými og ónógar fjárveit-
ingar eru safninu fjötur um fót, og skilst mér, að heldur hafi sigið á ógæfu-
hliðina í þeim efnum síðari árin. Þó er rannsóknaraðstaða allgóð, en misjöfn
eftir því, hver svið menn stunda. T.d. virðist hér vera óvenju gott safn bóka
um sum svið réttarsögu. Hér má nefna tvö sérsöfn ,,The Robbins Hebraic and
Roman Law Collection" og „The Robbins Canon Law Collection." Lagabóka-
safnið er í Boalt Hall, en aðalbókasafn háskólans er annars staðar á lóðinni.
Er það talið mjög merkt og fjölbreytt safn.
Ekki er það einungis lagabókasafnið, er skortir fé til að halda uppi fullri
reisn. Á þessu ári urðu þau tíðindi í Kaliforníu, að stórlega var dregið úr fast-
eignasköttum. Tekjutap hins opinbera vegna þessa kemur m.a. niður á fjár-
veitingum til Kaliforníuháskóla. Eru háskólayfirvöld mjög uggandi vegna þess
ástands, er skapast hefur. Óttast menn, að háskólinn dragist aftur úr á flestum
sviðum í hinni hörðu samkeppni við aðra bandaríska háskóla.
Svo sem fram hefur komið, er kennaralið fjölmennt. Margir kennaranna eru
framúrskarandi fræðimenn og fræðarar og sumir þekktir víða um heim. Eru
kennarastöður hér eftirsóttar. Gestakomur eru tíðar. Auk gistiprófessora, er
starfa eitt eða fleiri misseri, koma menn til skemmri dvalar til þess að halda
námskeið eða til þátttöku í málþingum og öðrum fræðafundum. Oft eru hér á
ferð lögfræðingar, er halda einstaka fyrirlestra fyrir kennara og/eða stúdenta.
Loks eru hér jafnan nokkrir fræðimenn frá öðrum löndum og öðum stöðum
í Bandaríkjunum við rannsóknir, án þess að stunda kennslu.
Nokkrir hinna föstu kennara lagadeildar eru af erlendu bergi brotnir. A.m.k.
tveir þeirra eru þýskir Gyðingar, sem flúðu Þýskaland fyrir síðari heimsstyrj-
öldina. Nokkrir aðrir eru fæddir erlendis eða af erlendu foreldri. Fjölmargir
kennaranna hlutu lögfræðimenntun sína í öðrum ríkjum Bandaríkjanna. Af
þessum sökum er allmikill heimsborgarabragur yfir lagaskólanum. Kennarar
af erlendum uppruna hafa mjög stuðlað að tengslum við háskóla víða um
heim og rannsóknum í samanburðarlögfræði. Á þetta bæði við um kennara,
er enn starfa, og ýmsa, sem fallnir eru frá. Meðal hinna siðartöldu má nefna
hinn þekkta austurríska fræðimann Albert A. Ehrenzweig, er settist að í Banda-
ríkjunum eftir að Þjóðverjar hertóku Austurríki og varð prófessor í Boalt Hall-
skólanum.
Eins og fram hefur komið í fréttum voru háðar kosningar í Bandaríkjunum
hinn 7. nóvember s.l. Kosnir voru þingmenn, ríkisstjórar og ýmsir aðrir embætt-
ismenn. Þá var kosið um ýmsa dómara og um ýmis einstök mál, sem borin eru
undir þjóðaratkvæði i hverju ríki fyrir sig. Mjög er mismunandi eftir ríkjum, um
hvað kosið er. í sumum ríkjum voru kosnir öldungadeildarþingmenn auk full-
trúadeildarmanna. í Kaliforníu var að þessu sinni ekki kosið til öldungadeild-
arinnar og var það talið hafa dregið nokkuð úr áhuga manna á kosningunum.
Edmund G. Brown Jr., úr flokki demókrata var endurkjörinn ríkisstjóri Kali-
forníu með miklum yfirburðum. Er nú talið líklegt, að hann keppi að framboði
til kjörs forseta Bandaríkjanna í næstu kosningum. Þrátt fyrir yfirburðasigur
„Jerry“ Brown, er hann þó allumdeildur, ekki sfst vegna vals á dómurum
46