Búnaðarrit - 01.01.1988, Side 163
Búnaðarþing beinir því til búnaðarsambandanna, að þau veiti sérbú-
greinafélögum aðild að aðalfundum sínum til að auka tengsl þeirra við
samböndin, þar til fastari skipan kemst á þessi mál í kjölfar hugsanlegrar
endurskipulagningar á félagskerfi landbúnaðarins.
Greinargerd:
A síðustu árum hefur orðið nokkur breyting á uppbyggingu búnaðar-
samtakanna, ekki sízt með tilkomu sífellt fleiri sérbúgreinafélaga, sem haft
hafa misjafnlega sterk tengsl við þau samtök, sem fyrir voru.
Þessi félög hafa nú fengið beina aðild að Stéttarsambandi bænda með
breytingum, sem gerðar voru á samþykktum þess, og hefur það orðið til
að treysta samstöðu þessara búgreinafélaga í baráttu fyrir bættum hlut.
Þessu Búnaðarþingi hafa borizt nokkrar ályktanir og tillögur um endur-
skoðun og að nokkru um breytta tilhögun þessara mála.
Verði af þeirri endurskoðun, er ljóst, að hún tekur nokkurn tíma, þar
sem vanda þarf til hennar, svo að árangur, sem af hugsanlegri endurskipu-
lagningu leiddi, yrði sem mestur og gæti skilað bændastéttinni í heild
sterkum og heilsteyptum búnaðarsamtökum.
Því væri æskilegt, að á meðan ekki kemst fastari skipan á þessi
samskipti, væri þessum félögum veitt aðild að búnaðarsambandsfundum,
eins og nú þegar mun vera gert hjá sumum búnaðarsamböndunum. Því er
lagt til, að slíkt verði tekið upp hjá öllum búnaðarsamböndunum eftir því,
sem tilefni gefst til og aðstæður leyfa.
Mál nr. 10
Frumvarp til laga um jarðhitaréttindi — 33. mál 110. löggjafarþings.
Málið afgreitt með eftirfarandi ályktun, sem samþykkt var með 24
samhljóða atkvæðum:
Búnaðarþing mælir gegn lögfestingu á „Frumvarpi til laga um jarðhita-
réttindi, mál nr. 33 á 110. löggjafarþingi.“
Greinargerð:
Frumvarpið brýtur gegn rótgróinni réttarvitund um eignarrétt á landi og
landsnytjum og er nánast algjör eignaupptaka á jarðhita. Auk þess flækir
það og þrengir möguleika landeigenda, sem leitt gætu til nýrra
atvinnutækifæra í dreifbýli og annarrar hagkvæmrar orkunýtingar. Þá skal
bent á, að samkvæmt áliti sérfróðra manna er vart mögulegt að skipta
hitaréttindum með láréttri línu, og hafi frumvarpið átt að vera trygging
gegn óeðlilegum fébótum til einstaklinga vegna félagslegrar samnýtingar á
jarðhita, þá má e.t.v. telja, að flest stærstu tilvik í því efni séu þegar að
baki.
ii
161