Búnaðarrit - 01.01.1988, Síða 173
Mál nr. 26
Erindi Búnaðarsambands Eyjafjarðar um nytjaskógrækt.
Málið afgreitt með eftirfarandi ályktun, sem samþykkt var með 22
samhljóða atkvæðum:
Búnaðarþing skorar á landbúnaðarráðherra að beita sér fyrir því, að
breytt verði lögum um nytjaskóga á bújörðum frá 30. maí 1984 og bendir á
eftirtalin atriði í því sambandi:
1. Lög þessi hafa ekki reynzt vera sá aflvaki, sem dugi til þess, að skriður
komist á ræktun nytjaskóga.
2. Þau ákvæði laganna, sem lúta að samningagerð og skuldbindingum
bóndans við skógrækt ríkisins, hafa þótt það flókin og þung í
framkvæmd, að þau hafa ekki náð tilætluðum árangri.
3. Haga þarf fyrirkomulagi á framlögum ríkisins til skógræktar á bújörð-
um með hliðstæðum hætti og til ræktunar samkvæmt jarðræktarlögum,
þ.e., að veitt verði ákveðið framlag til flatareiningar lands samkvæmt
úttektum.
4. Að taka þurfi tillit til þess við framlög til ræktunar nytjaskóga til
viðarframleiðslu, að arður kemur mjög seint og miða við, að bóndinn
njóti þóknunar fyrir tillag sitt til framtíðarinnar.
5. Vísað er til athugasemda Búnaðarþings 1987 um frumvarp til laga um
skógrækt og skógvernd.
6. Búnaðarþing óskar eftir því, að Búnaðarfélag íslands fái að fylgjast
með undirbúningi endurbóta á skógræktarlögum og felur stjórn félags-
ins að fylgja því eftir, að endurskoðun þeirra ljúki sem fyrst.
Mál nr. 27
Erindi Búnaðarsambands Eyjafjarðar um ráðstöfun fjármagns til uppbygg-
ingar í landbúnaði.
Málið afgreitt með eftirfarandi ályktun, sem samþykkt var með 18
samhljóða atkvæðum gegn einu:
Búnaðarþing hefur kynnt sér erindi Búnaðarsambands Eyjafjarðar um
ráðstöfun fjármagns í landbúnaði. Þingið felur stjórn Búnaðarfélags
íslands að senda erindi þetta heim til búnaðarsambandanna til umsagnar.
Greinargerð:
Þar sem erindið felur í sér mjög veigamiklar breytingar á ráðstöfun
fjármagns í þágu landbúnaðarins og þar er lagt til, að búnaðarsamböndin
fái stóraukið ákvörðunarvald um úthlutun þess, þykir eðlilegt og sjálfsagt
að leita álits þeirra á málinu.
171