19. júní - 19.06.1963, Side 5

Kveðjuorð
lesenda
Það er venja, þegar samvinna hættir, að þakka
fyrir samstarfið, einkum ef það hefur verið gott.
Ég vil þakka konum, sem störfuðu með mér í
ritnefnd 19. júní síðastliðin fimm ár, ég þakka
þeim konum, sem að beiðni minni skrifuðu
greinar í bl'aðið, og ég þakka lesendum þessa rits.
Ég er þeirrar skoðunar, að konur geti gefið sig
meir að skrifum og ritstörfum en þær gera nú.
Áður en ritöld hófst og fornsögur og fornkvæði
varðveittust í munnlegri geymd, gegndu konur
mikilvægu hlutverki í varðveizlu þeirra og áttu
mikinn þátt í að flytja hinn dýra arf milli kyn-
slóðanna.
í fyrsta íslenzka sagnfræðiritinu, íslendingabók,
nefnir Ari fróði konu, Þuríði Snorradóttur goða,
meðal heimildarmanna sinna og getur þess, að
hún hafi bæði verið margspök og óljúgfróð.
Mörgum öldum síðar voru margar þjóðsögur
skráðar eftir Ingibjörgu Pálsdóttur. Það hefur
þótt tíðindum sæta á þeim tímum, þegar nýbak-
aður stúdent úr Hafnarháskóla settist niður og
skráði eftir henni fornan fróðleik.
Á öl'lum tímum hefur íslenzka konan búið yfir
miklum fróðleik, og oft hefur verið til hennar
leitað í þeim efnum. Þessi staðreynd er okkur
konum hvatning enn í dag. Islenzkum skáldkon-
um allra alda hefur verið of lítill gaumur gefinn
allt fram á okkar dag.
Vegna anna minna og erfiðs útgáfutíma þessa
blaðs, sem prentað er í miðjum prófönnum mín-
um, læt ég af ritstjórn 19. júní. Það er ekki með
öllu sársaukalaust. Mér er annt um, að hagur
blaðsins verði sem mestur, mér er annt um, að
íslenzka konan haldi áfram að vera margspök og
láti ekki aðra um að skrásetja fróðleik sinn, held-
ur hætti sér örlítið meir út á ritvöllinn.
Að lokum óska ég ritnefnd og lesendum
19. júní alls góðs í framtíðinni.
Guðrún P. Helgadóttir.
3