SunnudagsMogginn - 25.09.2011, Qupperneq 36

36 25. september 2011
Ferðalög
M
argir eiga sér uppáhalds
þetta og uppáhalds hitt,
gefnir eru út listar og jafn-
vel bækur yfir 100 eða 500
eða 1000 staði sem fólk þarf að upplifa
áður en það heldur yfir móðuna miklu,
mismunandi gómsæta rétti sem smakka
þarf, lög sem nauðsynlegt er að njóta og
bækur sem þarf að ljúka við.
Mér finnst ekki ólíklegt að þá töfrandi
borg Barcelona, á norðaustanverðri Mið-
jarðarhafsströnd Spánar, sé að finna á
mörgum slíkra lista; undirritaður varð
að minnsta kosti heillaður af henni strax
við fyrstu kynni og það hefur ekkert
breyst.
Ólympíuleikarnir voru haldnir í
Barcelona sumarið 1992, sællar minn-
ingar. Jafnvel þeir sem fóru snemma á
fætur að morgni og seint í rúmið, hvern
vinnudaginn á fætur öðrum og voru þar
af leiðandi gjarnan býsna lúnir, gátu ekki
annað en hrifist af stemningunni í þess-
um fallega bæ; mannlífið var iðandi en
þó afslappað þrátt fyrir allt. Svo er enn.
Það eftirminnilega sumar var sungið
Amigos Para Siempre í opinberu lagi Ól-
ympíuleikanna; Vinir að eilífu. Margir
eignuðust þar vin fyrir lífstíð og enn
fleiri borgina að vini ef að líkum lætur.
Barcelona er höfuðstaður Katalóníu-
héraðs og nafn lagsins fallega er Amics
per sempre á tungu heimamanna. Kata-
lónía er gjarnan nefnd á undan Spáni
þegar landafræðina ber á góma og upp-
runann; í héraðinu hefur lengi verið
töluverður vilji fyrir sjálfstæði frá Spáni
en það er alltjent helsta mótvægið við
Madríd og Kastilíu alla. Íþróttafélagið
sem ber nafn bæjarins skipar ótrúlega
mikilvægan sess í hugum fólksins enda
löngum verið það afl sem staðið hefur
uppi í hárinu á elítunni í höfuðborginni.
Í Madrid hafði einræðisherrann Franco
vitaskuld aðsetur og Real Madrid var því
„hans“ lið; stundum hefur verið haft á
orði að baráttu íþróttaliðanna tveggja
megi líkja við spænsku borgarastyrjöld-
ina á fjórða áratug síðustu aldar. Enda er
Barcelona meira en bara íþróttafélag í
hugum heimamanna og skreytir sig ein-
mitt með þeim orðum. Það er stolt hér-
aðsins; bardagasveit dagsins í dag sem
fjöldinn flykkir sér á bak við.
Ekki þarf að velkjast í vafa um að í
Barcelona er hægt að slá margar flugur í
einu höggi. Staðurinn er stórborg með
öllu tilheyrandi en jafnframt notalegur
strandbær. Götulífið er skemmtilegt,
borgin annáluð fyrir góða veitingastaði,
áhugamenn um verslun komast þar í
feitt, að ekki sé talað um þau veisluföngÖll sumarkvöld er mögnuð tónlistar- og ljósaveisla við Spánartorg, Placa d’Espanya.
La Sagrada Familia, frægasta bygging katalónska arkitektsins Antoni Gaudi og þekktasta
kennileiti borgarinnar. Gaudi helgaði þessu verkefni 40 ár af ævi sinni, kirkjan hefur verið
liðlega eina öld í byggingu en ennþá er nóg að gera áður en verkinu verður lokið.
Frábært útsýni er yfir borgina af Tibidabo fjalli. Þangað er farið með sporvagni.
Stórborg og
strandbær
Barcelona er heillandi staður. Sólstrandar-
gæjar, menningarvitar, áhugafólk um
verslun eða íþróttanördar; allir ættu að
finna þar eitthvað við sitt hæfi.
Texti og myndir: Skapti Hallgrímsson skapti@mbl.is
Ströndin í Barcelona er mjög fín fyrir sóldýrkendur og aðeins steinsnar frá miðbænum.