Ljósmæðrablaðið - 01.12.1985, Page 17

LJÓSMÆÐRABLAÐIÐ
53
Við kynntumst Sigurði haustið 1982. Þegar við hófum nám í
Ljósmæðraskóla íslands.
Allar höfðum við haft af honum spurnir þegar við vorum við
starfsnám frá Hjúkrunarskólanum á Kvennadeild Landspitalans.
Sigurður var ekki einungis skólastjóri og góður kennari heldur var
hann mjög góður vinur okkar allra.
Hann hafði frábæra kímnigáfu sem við kunnum vel að meta og
var oft og mikið hlegið í frimínútum sem og kennslustundum. Þar
sem þetta var fyrsta skiptið sem hjúkrunarmenntun var skilyrði
fyrir inngöngu í skólann voru ýmsar breytingar gerðar á náminu
og tók Sigurður mikið tillit til skoðana okkar og var alltaf tilbúinn
til að skoða hlutina frá okkar sjónarmiði. Sigurður lagði mikla
áherslu á að ljósmæður væru vel menntaðar og stuðlaði hann
sífellt að bættri menntun ljósmæðra.
Allt frá haustinu 1983 fórum við nemarnir að leggja drög að
útskriftarferð. Fljótlega var Skotlandsferð efst á blaði en þangað
var ekki hægt að fara án Sigurðar. Það varð úr að hann fór með
okkur 26. júní 1984 i vikuferð. Hann sá um alla skipulagningu
kynnisferða á fæðingastofnanir í Glasgow og Dundee.
Til Edinborgar fórum við einnig og þar nutum við frábærrar
gestrisni ættingja og vina Sigurðar. Var þetta frábær endir á
skemmtilegu og kröfuhörðu námi.
Við fráfall Sigurðar misstum við vin og Kvennadeild
Landspítalans öflugan og virtan prófessor, sem vann að stöðug-
um endurbótum deildarinnar.
Viljum við þakka Sigurði fyrir samfylgdina. Viljum við votta
eiginkonu, börnum og ættingjum okkar dýpstu samúð.
Anna Guðný, Auðbjörg, Björg,
Elín, Katrín og Þórgunnur