Almanak Hins íslenska þjóðvinafélags - 01.01.1987, Blaðsíða 68
Janúar
Júpíter og Mars eru kvöldstjörnur, báðir á suðurhimni þegar dimmir
að kvöldi. Júpíter er miklu bjartari, en Mars þekkist á því, hve
rauðleitur hann er. Júpíter er í vatnsberamerki, en Mars lítið eitt
austar, í fiskamerki. Á morgunhimninum skín Venus skærast, en hún
er lágt á lofti og fer lækkandi, þegar á mánuðinn líður. Satúrnus er
einnig morgunstjarna, mjög sunnarlega í sólbrautinni, í naðurvalda-
merki, og þvf lágt á lofti. Hann kemst hæst 4° yfir sjóndeildarhring i
suðri í birtingu í Reykjavík. Satúrnus verður næst Venus 24. janúar,
tæpum 2° sunnar (neðar) á himni.
Febrúar
Júpíter er enn bjartasta kvöldstjarnan, en fer lækkandi og nálgast
sól. Hann gengur úr vatnsberamerki í fiskamerki. Mars er einnig
kvöldstjarna, nokkru lengra frá sól og hærra á lofti. Hann reikar úr
fiskamerki í hrútsmerki. Merkúríus verður að líkindum sýnilegur sem
kvöldstjarna í sólarátt um miðjan mánuðinn. Frá 11. til 17. febrúar
verður hann í rúmlega 7° hæð yfir sjóndeildarhring við myrkur í
Reykjavík, en birta hans fer dvínandi á sama tímabili. Venus er
skærasta morgunstjarnan, en er mjög lágt á lofti og nálgast sól. í
mánaðarlok kemur hún ekki upp fyrr en eftir birtingu í Reykjavík.
Satúrnus er einnig morgunstjarna, nokkru fjær sól, en afar lágt á lofti.
Hann kemst hæst 4° yfir sjóndeildarhring í suðri við birtingu í
Reykjavík.
Mars
Júpíter er kvöldstjarna í fyrstu, en lágt á lofti og hverfur brátt í
sólarbirtuna. Mars er áfram kvöldstjarna, ekki mjög bjartur, en
einkennist af rauða litnum. Hann reikar úr hrútsmerki í nautsmerki og
er ekki langt frá Sjöstirninu í mánaðarlok. Satúrnus er morgunstjarna,
jafn lágt á lofti og fyrr, aðeins kominn 4° yfir sjóndeildarhring í suðri
við birtingu í Reykjavík.
Apríl
Mars er kvöldstjarna á vesturhimni við myrkur, en lækkar heldur á
lofti. Hann er í nautsmerki og reikar til austurs, fer sunnan við
Sjöstirnið og síðar norðan við Aldebaran. Satúrnus er morgunstjarna
enn sem fyrr, lágt á lofti á suðurhimni fyrir birtingu í Reykjavík.
Maí
Mars er kvöldstjarna, en er lítið bjartari en Pólstjarnan og því ekki
áberandi á þessum tíma árs. í byrjun mánaðar verður hann 15° yfir
sjóndeildarhring í vest-norðvestri við myrkur í Reykjavík, en þegar á
mánuðinn líður, nálgast hann sól og lækkar á lofti. Satúmus er enn
morgunstjarna í merki Naðurvalda. Hann nær aðeins 4° hæð á suður-
himni fyrir birtingu í Reykjavík.
(66)