Ægir - 01.06.2002, Blaðsíða 42
42
Búrfiskur er hávaxinn, þunnur og hausstór beinfiskur. Mesta hæð
hans er á mótum hauss og bols og er hausinn bogadreginn fyrir
endann. Augun eru stór og kjaftur er stór, víður og skástæður en
tennur á skoltum eru smáar. Á plógbeini eru engar tennur en utan
á kjálkanum og milli neðri kjálka er fjöldi smárra tanna. Hausbein
mynda óreglulega kamba og á milli þeirra eru holur fullar af slími.
Í heilabúinu er hvít fita og sömuleiðis er sundmaginn fullur af
hvítri fitu. Bakuggi er langur og á kvið er kjalhreistur. Rák er
mjög greinileg og mynduð úr gödduðum hreisturflögum.
Búrfiskur er appelsínugulur eða rauður á litinn, kjafturinn þó
svartur að innan. Búrfiskur getur náð rúmlega 70 cm lengd og
lengsti búrfiskur sem veiðst hefur hér við land mældist 71 cm.
Búrfiskur heldur sig á djúpmiðum Íslands frá Víkurál suður í
Rósagarð og suður að Írlandi vestanverðu suður í Biskajaflóa og til
Asóreyja. Hann er einnig í Suðaustur-Atlandshafi frá Walvisflóa
suður fyrir Suður-Afríku og inn í Indlandshaf. Í Norðvestur-
Atlandshafi er hann að finna í Maineflóa við Bandaríkin. Þá er
hann við Ástralíu, Nýja-Sjáland og Tasmaníu og hefur fundist við
Chile. Hér við land er mest af Búrfisk undan Suðurlandi.
Búrfiskur er miðsævis-, botn- og djúpfiskur og er hann algengastur
hér á um 800-1000 metra dýpi. Hann lifir á fiskum af ýmsu tagi
en einnig krabbadýrum eins og rækju. Um hrygningu búrfisks er
lítið vitað nema að hann virðist hrygna hér við land í nóvember til
mars. Talið er að búrfiskur vaxi hægt og verði seint kynþroska,
jafnvel ekki fyrr en 15-20 ára eða eldri. Þá er talið að hann geti orð-
ið meira en 50 ára gamall og hugsanlega yfir 100 ára.
Það var ekki fyrr en á síðustu 10 árum sem farið var að veiða búr-
fisk hér við land og setja á markað. Aflinn var seldur til Frakklands
og Bandaríkjanna en varð þó aldrei mikill, mest 382 tonn. Heldur
hefur dregið úr veiðunum að undanförnu.
Hoplostethus atlanticus
Búrfiskur
F R Ó Ð L E I K U R O G S K E M M T U N
K R O S S G Á TA N