Fréttatíminn - 23.11.2012, Blaðsíða 55

Afmælisrit skátanna 19
Sími 555 3100 www.donna.is
Til hamingju skátabræður og -systur!
Skátar eru ávallt viðbúnir með búnað frá Donnu ehf.
Sáraumbúðir - brunaumbúðir - Travel John
ferðaklósett - Blister-O-Ban bóluplástur á bólur
spelkur - hálskragar - sjúkrabörur - sjúkratöskur
hjartastuðtæki - endurlífgunarbúnaður o.fl
Þó að úti geysi hráslaglegt
vetrarveður er hlýlegt um að litast á
heimili Maríu við Vesturgötu þar
sem hún leyfir kaffinu að malla í
pressukönnunni á meðan hún teygir
sig í konfekt úr háum hornskáp í
eldhúsinu. Maríu Ellingsen þekkja
margir af leiksviðinu og hvíta
tjaldinu en færri átta sig kannski á
að í henni slær skátahjarta, -og
hefur gert síðan hún var 11 ára!
Hvað er þér minnisstæðast úr
skátastarfinu þegar þú varst
barn?
Ég byrjaði í Haförnum daginn sem
ég mátti byrja og var lengi búin að
bíða spennt.
Mér fannst ég strax alveg
ofboðslega rík, því að það að hefja
skátastarf er næstum eins og að fá
vegabréf að heilu ríki. Ég tilheyrði
strax risastóru samhengi þar sem ég
eignaðist svo mikið bakland. Ég var
ekki bara einhver 11 ára krakki,
heldur partur af alheimshreyfingu
skáta þar sem allir voru vinir. Þetta
var í raun öflugra en þegar facebook
kom fram á sjónarsviðið, allt í einu
átti maður inni milljón vinabeiðnir.
Hvaða ævintýri biðu þín í
skátastarfinu?
Mesta ævintýrið var tímælalaust að fá
að kynnast náttúru Íslands; þegar
maður fór að lesa þetta land, labba
um þetta land og eignast þetta land.
Náttúran á Íslandi getur verið svo
mögnuð að maður verður stundum
við hræddur við kraftinn í henni. Í
skátunum lærði maður að búa sig vel
og rata, þannig að manni var óhætt
að fara út og lenda í þeim ævintýrum
sem náttúran bauð upp á.
Þannig stækkaði í raun tilveran
aftur. Fyrst eignaðist ég óteljandi
vini og nú eignaðist ég allt þetta
land. Þetta hvoru tveggja jók
sjálfstraustið. Í skátastarfi fá allir að
njóta sín á sínum eigin forsendum.
Ef maður er með leiðtogahæfileika er
maður gerður að foringja og ef
manni finnst gaman að teikna er
maður gerður að skrautskrifara.
Þannig fá allir hlutverk við sitt hæfi
og fá að njóta sín í verkefnum sem
eru krefjandi sem maður ræður samt
við.
Hvaða hlutverk var þér falið?
Ég var snemma gerð að foringja. Ég
er alveg rosalega góð í að halda utan
um hóp, hafa yfirsýn, skipuleggja og
stýra. Í skátunum fékk ég að þroska
þann hæfileika. Þegar ég er að
stjórna einhverju, hvort sem það er
fundur, leikrit eða eitthvert verkefni,
þá set ég mig í sömu spor og ég gerði
sem ungur skátaforingi. Ég set mig í
spor leiðangursstjóra. Það er hópur
sem vill fara eitthvað og maður leiðir
hópinn í stað þess að skipa honum
fyrir eða ráðskast með hann. Þetta er
einfaldlega ferðalag, ég er með
yfirsýnina og landakort í höndunum
og passa upp á að allir komist
sameiginlega frá A til B.
Hvað úr þínu skátastarfi nýtir
þú þér í starfi þínu?
Ævintýrin! Í skátunum bjó maður
til ævintýri úr engu, sem er
nákvæmlega það sem maður gerir í
leikhúsinu. Svo eru hvers kyns
hæfileikar sem maður tileinkaði sér í
skátastarfi sem nýtast mér mikið í
dag; að vera skapandi, úrræðagóður
og sjá lausnir frekar en hindranir. Ég
lærði líka að taka frumkvæði og
ábyrgð. Í staðinn fyrir að sitja og
kvarta yfir ókostum í samfélagi og
stjórnkerfi, þá reyni
ég alltaf að hugsa:
„Hvað get ég lagt af
mörkum til að bæta
samfélagið?“ -skrifa
bréf, tala við
einhvern, halda
þjóðfund eða jafnvel stofna
baráttusamtök. Það þýðir ekki að
sitja aftast í rútunni og kvarta og
kveina!
Hvað er það í skátastarfi sem
höfðar svona til þín?
Þessi sterku gildi. Það sem maður
gerir verður að vera byggt á sönnum
gildum. Ég held að gildin í
skátastarfi komi til með að ná til
ungs fólks um alla framtíð, því þegar
gildi eru djúp þá eru þau eilíf.
Gildin sem ég tengi til að mynda
mikið við er að
bera virðingu fyrir
öðrum og
umhverfinu. Það
að vera
náttúruvinur
hefur verið mér
mjög hugleikið, því við byggjum lífið
á náttúrunni og getum ekki skilið
okkur frá henni. Ég nota mikið af
mínum frítíma til þess að standa
vörð um náttúruna annars vegar og
vera út í náttúrunni hins vegar.
Af hverju ættu foreldrar að
senda börnin sín í skátana?
Því þetta er einfaldlega einstakt
lífsleikni- og lífsgleði-prógramm!
Eignaðist óteljandi vini
Í skátastarfi fá
allir að njóta sín á
sínum eigin forsendum
MARÍA ELLINGSEN - LEIKKONA
maría ellingsen er leikkona, mamma, náttúrubarn og
hugsjónarkona sem átti þátt í að stofna framtíðarlandið
og skipuleggja þjóðfundinn 2009.