Fréttatíminn - 22.10.2010, Qupperneq 44

 Leiðtogar ÍsLands UngLiðar stjórnmáLahreyfinganna horfa tiL framtÍðar
Þau eiga sér
draum
Hvert stefnir Ísland? Eru ungliðar sáttir við forystu flokka sinna? Ætla þau að erfa íslensk
stjórnmál? Það er harla ólíklegt því þótt þau eigi sér sína framtíðardrauma bendir fátt til
þess að þau kjósi að feta framabraut stjórnmálanna. Starf stjórnmálamannsins heillar ekki
þessa stundina. Fréttatíminn lagði fyrir þau fjórar lykilspurningar.
1. Hvernig hefur flokksforystan staðið sig frá bankahruni?
2. Hefðir þú gert hlutina öðruvísi, og þá hvernig?
3. Hvar sérðu Ísland eftir tíu ár?
4. Hvar verður þú?
Gunnhildur Arna
Gunnarsdóttir
gag@frettatiminn.is
xD
Nafn: Ólafur Örn Nielsen
Aldur: 25 ára
Flokkur: Formaður Sambands ungra sjálfstæðismanna
Búseta: Garðabær
Starf: Í markaðsdeild Eddu-útgáfu
Byrjaði í flokknum: 18 ára
1 Flokksforystan hefur staðið sig vel. Ungt fólk hefur tekið við forystu flokksins og eðlilegt að
það hafi þurft sinn tíma til að fóta sig. Mér hefur
fundist þau á síðustu dögum og vikum vera að
sækja í sig veðrið. Þá hefur mér fundist þau standa
sig vel við að berjast á móti Icesave-samningn-
um, þar sem þau lögðu allt í að koma í veg fyrir
að samningurinn væri samþykktur. Ég myndi þó
ekki segja að flokkurinn hafi jafnað sig frá hruni.
Það þarf örugglega einar kosningar þar sem þing-
menn sem sitja á þingi og voru mest í umræðunni
í tengslum við prófkjörsstyrki og fyrirgreiðslu í
bönkunum þurfa að endurnýja umboð sitt. En í
stórum dráttum hefur orðið heilmikil endurnýjun
í flokknum, já og Alþingi almennt, frá hruni.
2 Hlutverk okkar ungliða hefur verið að halda flokknum við efnið. Við erum róttækari og vilj-
um að hann taki afdráttarlausari stefnu hvað varð-
ar frelsi einstaklingsins. Ég hefði því staðið fastar
á því að verjast ágangi stjórnmálamanna inn
í okkar persónulega líf og hefði barist
gegn því að flokkurinn færðist um
of nærri miðjunni í stefnumálum
sínum – eins og hann hefur gert.
3 Ég vona að samfélagið verði frjálslegt þar sem
hver geti notið krafta sinna
en eins og þingið er núna
óttast ég verulega að þetta
verði samfélag þar sem
allt verður sett í reglur
og reglugerðir og ekkert
leyft nema fyrir því sé sérstök
lagaheimild. Heyrst hefur í
umræðunni að annar hægri
flokkur sé í bígerð – en mað-
ur hefur ekkert heyrt frá hon-
um og því held ég að eftir tíu ár
verði Sjálfstæðisflokkurinn enn
þetta stóra afl á hægri vængnum.
Þá sé ég ekki fyrir mér að landið
verði í Evrópusambandinu eftir tíu
ár.
4 Ég á mér þann draum að reka lítið sveitaveitingahús. Vonandi
verð ég þar eftir tíu ár. Ég hef hins
vegar ekki sett mér markmið um
að vera á þingi eftir tíu ár.
xB
Nafn: Sigurjón Norberg Kjærnested
Aldur: 24 ára
Flokkur: Formaður Sambands ungra fram-
sóknarmanna
Búseta: Uppalinn og býr í Reykjavík
Byrjaði í flokknum: Fyrir tveimur árum
Nám: Í vélaverkfræði í Háskóla Íslands, á sviði
jarðvarmaorku
1 Ég er mjög sáttur við flokksfor-ystuna frá hruni. Það er loksins að
renna upp fyrir ríkisstjórninni að það
þarf að leiðrétta skuldir fólks vegna for-
sendubrests. Okkar formaður og vara-
formaður hafa sagt þetta núna í tvö ár.
Ég er mjög ánægður með að Framsókn
hefur staðið með heimilunum frá byrj-
un. Þá erum við í baráttu núna fyrir
því að klára endurnýjunina í flokkn-
um. Við þurfum að skilja almennilega
við fortíð hans áður en við verðum
almennilega trúverðug. Ég sem for-
maður ungra framsóknarmanna hef
aldrei hitt Halldór Ásgrímsson. Ég hef
heldur aldrei hitt Finn Ingólfsson, hvað
þá Ólaf Ólafsson! Ég hefði ekki nokk-
urn áhuga á því.
2 Ég hefði viljað að flokkurinn allur tæki tveggja ára hlé frá umræðum
um Evrópumál og hugsaði meira um
atvinnu- og iðnaðarmál; nokkuð sem
skiptir alvöru máli. Það er engin þörf
á að ræða þau á meðan inngönguferlið
er í gangi.
3 Eftir tíu ár sé ég Ísland komið út úr kreppunni og með alvöru áherslur
á atvinnuuppbyggingu. Ég hef trú á
því að orkan skapi störf og með jarð-
varmaorku, geti flott starfsemi virki-
lega blómstrað hér eftir tíu ár. Og ég
sé Íslandi eftir tíu ár stjórnað af meiri-
hlutastjórn Framsóknarflokksins eins.
4 Ég verð líklega að vinna sem verk-fræðingur við rannsóknir á jarð-
varmaorku. En hugsanlega reyni ég
við Alþingi einhvern tímann, sjái ég
að ég geti komið einhverju í gegn þar.
Það fer þó eftir því hvernig starf al-
þingismanna þróast. Ef það felur í
sér eggjahríð hef ég lítinn áhuga.
Áður en við unga fólkið tökum
þátt verður Alþingi að sýna að
kerfið virki og sé víst til ár-
angurs. Við eigum nefni-
lega valkost. Við getum
farið út á Austurvöll,
öskrað og hent eggj-
um og látið
okkur
sjálf-
um
líða vel,
en viljum við
breytingu þurf-
um við að taka
þátt í kerfinu
og breyta því
innan frá.
xS
Nafn: Guðrún Jóna Jónsdóttir
Aldur: 30 ára
Flokkur: Formaður Ungra jafnaðarmanna
Búseta: Reykjavík
Byrjaði í flokknum: Í Samfylkingunni frá upphafi, en virk
síðustu þrjú ár.
Starf: Tölvunarfræðingur hjá Marorku
1 Það hafa verið tvær forystur í Samfylkingunni frá hruni. Það er auðvelt að horfa til baka og
gagnrýna það sem gert var í hringiðunni, en í
grunninn hefur forystan staðið sig ágætlega. Þá er
ég ágætlega sátt við samstarf Samfylkingarinnar
og Vinstri grænna, þetta eru ólíkir flokkar með
ólíkar skoðanir sem reyna að mynda samstöðu.
2 Ég hefði viljað sjá forystuna taka fyrr á skulda-vanda heimilanna. Einnig hefði mátt ræða
hugmyndirnar um niðurskurð áður en þær voru
bornar fram. Ég hefði til dæmis haft samráð við
starfsmenn um niðurskurð til heilbrigðisstofnana
úti á landi og rýnt betur í útgjöld utanríkisþjónust-
unnar og skýrt fyrir öðrum hvaða áhrif á gjaldeyr-
istekjur landsins það hefði að loka sendiráðum. Þá
hefði ég viljað sjá heildstæða stefnu áður en gripið
var til niðurskurðar og meiri sátt um aðildarvið-
ræðurnar við Evrópusambandið.
3 Ég sé meiri breytingar eftir fjörutíu ár en tíu. Þá verður ekkert álver í Helguvík heldur þrjú
til fjögur græn fyrirtæki sem nýta orkuna
sem ætluð er álverinu, til dæmis gagnaver,
reikniver og líftæknifyrirtæki. En sé litið til
tíu ára vona ég að við sjáum öflugra skóla-
starf og færri háskóla. Þá verðum við
komin í Evrópusambandið og búin
að taka upp evru. Skoðun mín er sú
að þegar ekki er þörf fyrir stjórn-
málaflokka eigi að leggja þá nið-
ur. Ég tel að eftir tíu ár verði
enn þörf fyrir Samfylkinguna
enda hafi þá ekki algjör jöfnuð-
ur náðst. Hugsanlega verða breyt-
ingar á flokknum en hann mun þó
sem fyrr einblína á frelsi, jafnrétti
og bræðralag.
4 Eftir tíu ár bý ég enn á Freyju-götunni, sátt og vonandi með
mastersgráðu. Ég sé mig ekki í
pólitík. Stjórnmálamenn þurfa
að vera rosalega óeigingjarnir og
tilbúnir að vinna hvenær sem er
og hvar sem er – margir eru góðir
í því, aðrir eru ekki hæfir. Mig
langar frekar að einbeita mér
að mínum markmiðum þegar
ég horfi til næstu tíu ára.
HELGARBLAÐ
Sími 531 3300
44 spurningar og svör Helgin 22.-24. október 2010