Morgunblaðið - 31.12.2011, Side 36

36
MORGUNBLAÐIÐ LAUGARDAGUR 31. DESEMBER 2011
Talið er að um 20.000 manns hafi farist af
völdum landskjálfta og flóðbylgju í norð-
austanverðu Japan 11. mars. Nær hálf
milljón manna missti heimili sín af völdum
skjálftans sem mældist 9 stig. Hamfarirnar
ollu sprengingum í kjarnorkuveri og mestu
geislunarmengun í heiminum frá kjarnorku-
slysinu í Tsjernobyl í Úkraínu árið 1986.
Mengunarslysið í Japan varð til þess að
mörg iðnríki tóku að endurskoða stefnu sína
í orkumálum og ríkisstjórn Þýskalands sam-
þykkti að stefnt yrði að því að loka öllum
kjarnakljúfum landsins ekki síðar en árið
2022.
Fleiri jarðskjálftar ollu miklu manntjóni á
árinu. Skjálfti, sem mældist 7,2 stig, reið yf-
ir Tyrkland 23. október og kostaði yfir 600
manns lífið. Rúmlega 200 manns fórust í 6,3
stiga skjálfta í borginni Christchurch á
Nýja-Sjálandi 22. febrúar.
Eyðilegging Kona grætur á götu í borginni Natori innan um rústir húsa sem hrundu í jarðskjálftanum ógurlega sem reið yfir Japan 11. mars.
Reuters
Um 20.000 fórust í jarðskjálfta í Japan
Mikið umrót var í Evrópusambandinu á árinu vegna
skuldavanda evruríkja. Leiðtogar evrulandanna sautján
samþykktu á fundi Evrópusambandsins í Brussel 9. des-
ember að gera nýjan samning um skatta- og fjármál eftir
að Bretar höfnuðu því að sáttmálum sambandsins yrði
breytt. Margir fréttaskýrendur sögðu að niðurstaða
fundarins þýddi að tvískipting Evrópusambandsins væri
óhjákvæmileg og henni var lýst sem mesta klofningi
Evrópusambandsins í sögu þess.
Skuldavandinn stuðlaði að því að Silvio Berlusconi
neyddist til að segja af sér 12. nóvember. Mynduð var
bráðabirgðastjórn undir forystu tæknikratans Marios
Montis.
Nokkrum dögum áður, eða 6. nóvember, féllst
Georgios Papandreou á að láta af embætti forsætisráð-
herra í Grikklandi vegna skuldavanda landsins. Lucas
Papademos, fyrrverandi varaforseti Seðlabanka Evrópu,
tók við embættinu.
Brian Cowen varð fyrsta pólitíska fórnarlamb skulda-
kreppunnar í febrúar þegar flokkur hans, Fianna Fail,
galt afhroð í þingkosningum á Írlandi vegna mikillar
óánægju almennings með efnahagshrunið í landinu og
skilmála aðstoðar ESB og Alþjóðagjaldeyrissjóðsins við
landið. Enn einn forsætisráðherrann, Jose Socrates,
sagði af sér í mars eftir að þing Portúgals hafnaði sparn-
aðartillögum ríkisstjórnar hans.
Skuldavandi Silvio Berlusconi eftir leiðtogafund evruríkja í
Brussel 27. október. Hálfum mánuði síðar sagði hann af sér.
Reuters
Fjórar ríkisstjórnir féllu
í umróti á evrusvæðinu
Óeirðir Mótmælandi með gasgrímu gengur framhjá brennandi bíl eftir að óeirðir blossuðu upp í Aþenu í júní þegar
sparnaðaraðgerðum grísku stjórnarinnar var mótmælt. Skuldavandinn varð til þess að gríska stjórnin féll í nóvember.
Reuters
Fréttamyndir af erlendum vettvangi
Osama bin Laden, leiðtogi al-Qaeda, beið bana í árás bandarískrar sérsveitar
á fylgsni hans í bænum Abottabad í Pakistan 2. maí. Þar með lauk tíu ára leit
að honum. Bin Laden faldi sig í stórhýsi nálægt herforingjaháskóla og bæki-
stöð þúsunda hermanna, um 60 km norðan við Íslamabad, höfuðborg Pakist-
ans. Spurningar vöknuðu því um hollustu hers og leyniþjónustu Pakistans
við Bandaríkin í hernaðinum gegn al-Qaeda. 11. september var þess minnst
að tíu ár voru liðin frá árás hryðjuverkamanna al-Qaeda á Bandaríkin. Hún
hratt af stað atburðarás, sem hefur kostað Bandaríkin 4.000 milljarða dollara
og jafnvel sess þeirra sem öflugasta heimsveldið.
Fögnuður Dauða Osama bin Ladens fagnað á Times Square í New York eft-
ir að skýrt var frá því að hann hefði fallið í árás bandarískrar sérsveitar.
Reuters
Bin Laden felldur