Ritið : tímarit Hugvísindastofnunar - 01.10.2004, Blaðsíða 53

Guðni Elísson
Hver af hinum bestu er ég?
Nafnleysi Byrons og höfundar Don Jnan
- Readers, try -
And tell me which among the best am I.
Juan Secundus. Canto the First. London: John
Miller, 5, New Bridge Street (1825), 46. erindi.
I
Byron lávarður (1788-1824) hafði verið metsöluhöfundur um sex ára
skeið þegar söguljóðið Beppo og fyrstu kviðurnar af Donjuan birtust fyrst
á prenti. Utgefandi hans, JohnMurray (1778-1843), hafði markvisst nýtt
sér höfundarnafn Byrons við sölu á bókum hans allt frá útgáfu Pílagríms-
ferðar Childe Harolds árið 1812, en ljóðið gerði hann að frægasta skáldi
Evrópu. Þó að Byron væri eflaust enn virtasta skáld Englands á árunum
1818-19 (en á þeim árum sendi hann frá sér ljóðin um Beppo og Don
Juan) hafði höfundarnafh hans beðið mikinn skaða af skilnaðinum við
lafði Byron 1816 þó að hann væri enn mikilsmetið skáld. Hneykslið sem
fylgdi í kjölfarið er án efa það mesta í enskri bókmenntasögu og þá sneru
flestir landar hans við honum baki, þeir hinir sömu og áður höfðu keppst
við að hlaða á hann lárviðarsveigum og lofi. Byron yfirgaf England fyrir
fullt og allt vorið 1816, og aðeins átta árum síðar lést hann í frelsisstríði
Grikkja. Frægðarár Byrons (en svo eru árin frá 1812-16 oft kölluð í
enskri bókmenntasögu) voru því liðin þegar hér var komið og Byron orð-
inn sjálfskipaður útlagi á Italíu.
51