Frjáls verslun - 01.08.2014, Qupperneq 34

34 FRJÁLS VERSLUN 8-9 tbl. 2014
Skekkir samkeppnismyndina
Hvernig metur Reynir styrk atvinnulífsins
í dag?
„Ég held að styrkur atvinnulífsins þyrfti
að vera meiri. Fyrirtæki hefðu þurft að ná
sér fyrr á strik. Mér finnst t.d. slæmt að sjá
hve mörg fyrirtæki og eignir eru í höndum
og í eignarhaldi opinberra aðila eða stórra
aðila eins og bankanna. Ég held að það
skekki samkeppnismyndina og dragi úr
því að menn séu tilbúnir til að fara af stað
í samkeppni ef þeir vita að keppinauturinn
hefur allt annan aðgang að fjármagni og
möguleikum en þeir.
Auðvitað hefur margt jákvætt gerst á
undanförnum sex árum en þetta tekur of
langan tíma og við Íslendingar höfum misst
af einhverjum tækifærum. Við höfum líka
misst af ágætu fólki úr landi út af hruninu.
Við erum hins vegar betur stödd en t.d.
árið 2012. Batinn þarf samt að gerast
hraðar til að skapa líka ungu fólki fleiri
atvinnutækifæri.“
Reynir segir að ljóst sé að endurskoðun
sé nauðsynlegur þáttur í viðskiptalífinu.
„Miðað við það sem ég hef fylgst með
hvernig staðið er að menntun endur skoð ­
enda þá sé ég ekki annað en að hún verði
góð áfram. Við eigum eftir að hafa öflugt
ungt fólk sem heldur merki endurskoðenda
á lofti og á eftir að tryggja að það verði vel
að verki staðið um ókomin ár.“
90 ára
Danskur endurskoðandi, Nils Manscher,
stofnaði skrifstofuna sem nú er PwC á
Íslandi fyrir 90 árum og í dag er hún aðili
að neti endurskoðunarskrifstofa með sama
nafni um allan heim. Haldið hefur verið
veglega upp á þessi tímamót á undan ­
förnum mánuðum.
„Ákveðið var að halda upp á afmælið
annars vegar inn á við með starfsfólki
félagsins og fjölskyldum þess og hins
vegar út á við gagnvart viðskiptavinum
og al menningi. Við héldum t.d. nýlega
áhugaverð námskeið um heilbrigðismál
og fengum fulltrúa frá PwC í Noregi til að
aðstoða við þau. Þá höfum við haldið ýmis
smærri námskeið og boðið viðskiptavinum
og almenningi að koma á þau.
Þá var haldin skemmtileg móttaka í
húsnæði fyrirtækisins á afmælisdaginn 24.
september og nokkur hundruð viðskipta ­
vina, velunnara og fyrrverandi starfsmanna
sóttu okkur heim þann dag. Móttakan tókst
vel og er greinilegt að við eigum marga vini
sem vildu spjalla og rifja upp gamla tíma.
Þetta var ákaflega ánægjulegt.
Ég held að það skekki sam­
keppnis myndina og dragi úr
því að menn séu tilbúnir til að
fara af stað í samkeppni ef þeir
vita að keppinauturinn hefur
allt annan aðgang að fjármagni
og möguleik um en þeir.
SÖGUlEG MyND
Reynir Vignir með Hjalta Geir Kristjánssyni, fyrrverandi forstjóra Kristjáns Siggeirssonar, í afmælisveislu PwC á dögunum. Reynir
Vignir hefur verið löggiltur endurskoðandi hjá PwC í samfellt 40 ár og gegndi þar meðal annars starfi framkvæmdastjóra og stjórnar­
formanns um árabil. Fjölskylda Hjalta Geirs og fyrirtæki í hennar eigu hafa verið í samstarfi við PwC í 90 ár en húsgagnafyrirtækið
Kristján Siggeirsson var stofnað árið 1919 og var með fyrstu viðskiptavinum forvera PwC árið 1924. Þess má geta að Hjalti Geir sat
um árabil í stjórn Eimskips og Sjóvár.
NærmyNd