Húnavaka - 01.05.1981, Síða 160

158
HÚNAVAKA
Ingibergur Bjarnason kvæntur Sigurbjörgu Vigfúsdóttur og búa
þau á Rauðsnesi á Mýrum.
Jónas Þorvaldsson var búþegn góður og stundaði sjó er hann mátti
því við koma. Hann réri undan Brekkunni og frá Kálfshamarsnesi.
Var hann með gildustu bændum hér í sveit. Jörðin var landmikil með
hlunnindum af silungsveiði í vötnum Skagaheiðar, en snjóþungt er
þar á vetrum og er þar mikil snjóakista. En á góðu dægri kemur jörðin
græn undan snjónum. Sigurbjörg var sinnug húsmóðir og án efa mikill
uppalandi barna sinna. Hún mun hafa haft lag á að kenna börnum
lestur. Er ég þess minnugur er hún kom með þau til barnaprófs hvað
þau voru vel læs. Hún hafði ánægju af þvi að ræða við gesti og
gangandi og blanda geði við fólk á mannamótum. Hún starfaði í
kvenfélögum bæði á Skaga og í Höfðahreppi. Sigurbjörg var mjög
kirkjurækin og unni kristinni trú og guðshúsi sínu, og rækti vel helgar
tíðir. Var þó færðin ekki alltaf góð frá Fjalli að Hofi i skammdeginu.
Jónas Þorvaldsson andaðist 1941. Bjó Sigurbjörg þá áfram með Ólafi
syni sinum í tvibýli við Skafta Fanndal son sinn. Árið 1943 brennur
bærinn á Fjalli og flytur þetta fólk þá til Höfðakaupstaðar. Reistu þá
synir hennar handa henni hús á Skagaströnd, er hún nefndi Bræðra-
minni. Tók hún þá til uppfósturs tvær dótturdætur sínar 5 ára að
aldri, Guðrúnu og Sigurbjörgu Angantýsdætur. Þær voru með ömmu
sinni um 10 ára bil. Reyndist Sigurbjörg góður uppalandi þó að hún
væri komin á efri ár, og var heimili þeirra hlýlegt og notalegt. Árið
1971 fer Sigurbjörg á Héraðshælið á Blönduósi og dvaldist hún þar
lengst af við sæmilega heilsu og lifði þar glöð í anda. Hún var jarðsett
á Hofi 3. maí 1980.
Sigurður Gunnarsson prentari andaðist á Héraðshælinu á Blönduósi
hinn 6. ágúst 1980. Hann var fæddur 10. ágúst 1923 á Selalæk í
Rangárvallasýslu. Foreldrar hans voru hjónin Gunnar Sigurðsson lög-
fræðingur, alþingismaður og bóndi, og Sigriður Sigurgeirsdóttir.
Sigurður Gunnarsson lauk prentnámi 1945. Hann var vélsetjari í
fjölda ára og verkstjóri í prentsmiðju.
Hann kvæntist 8. júní 1946, Sigríði Ólafsdóttur, Lárussonar kaup-
félagsstjóra á Skagaströnd. Voru þau hjón i kynnisferð á Skagaströnd,
eins og svo oft áður, þegar andlát hans bar að.
Hann var jarðsettur í Reykjavík.