Gerðir kirkjuþings - 01.01.2015, Blaðsíða 23

23
og hafa biskup og kirkjuráð nú sammælst um að leita eftir áliti lögfræðinga á því hvar
mörk ábyrgðar og hlutverks kirkjuráðs og biskupsembættisins liggja. Sú vinna mun hefjast
fljótlega og vona ég að í kjölfar þeirrar vinnu verði skýrara hvar ábyrgð mála liggur.
Alltaf verður það þannig að skoðanir eru ólíkar og um þær verður tekist, það er eðlilegt
og er verkefni okkar allra að taka tillit til annarra og finna farsælar leiðir fyrir þjóðkirkjuna
á breytingar tímum.
Hins vegar getur það varla gengið þegar stjórnvald verður sjálfu sér sundurþykkt, eins
og birtist í máli númer níu hér á kirkjuþingi. Þar eru meðal flutningsmanna fulltrúar úr
kirkjuráði, sem vilja þrátt fyrir að þjóðkirkjulögin í heild séu til umfjöllunar í löggjafarnefnd,
mæla fyrir því að starfsskyldum biskups Íslands verði nú breytt á þann máta að biskup eigi
ekki lengur sæti í kirkjuráði.
Í þessu máli tel ég birtast það vantraust sem ég hef mætt í störfum mínum í kirkjuráði.
Ég tel það ómálefnalegt og ómaklegt vantraust sem ég hef þurft að glíma við hingað til og
nefni þetta hér því mér finnst mikilvægt að upplýsa kirkjuþing um þessa stöðu mála.
Það er mér ljúft og skylt að sinna verkefnum kirkjuráðs samhliða öðrum skyldum
mínum sem biskup Íslands. Verkefni kirkjuráðs eru í sjálfu sér ekki erfið eða flókin, en
langvarandi sundurlyndi hefur slæm áhrif á alla.
Sundurlyndi innan kirkjunnar er ekki það sem þjóðkirkjan þarf á að halda um þessar
mundir. Nú þurfum við að standa saman. Það er brýnt að við sem erum í lykilstöðum
í kirkjunni og sinnum trúnaðarstörfum fyrir hana leggjum til hliðar ágreining og
mismunandi skoðanir á hinum ýmsu málum og einbeitum okkur að því að standa
saman um það að koma fjárhagslegum samskiptum ríkis og kirkju í viðunandi horf. En
fyrst og fremst þurfum við að standa saman í því sameiginlega verkefni okkar að boða
fagnaðarerindið um Jesú Krist hvarvetna í sveit og borg. Það eru gömul sannindi og ný að
sameinuð stöndum við, en sundruð föllum við.
Guð blessi ykkur, kirkjuþingið og störf þess.