Gerðir kirkjuþings - 01.01.2015, Qupperneq 37

37
Nefndarálit allsherjarnefndar um skýrslu kirkjuráðs.
Á fund nefndarinnar kom frú Agnes M. Sigurðardóttir, biskup.
Kirkjuþing 2015 hefur fjallað um skýrslu kirkjuráðs og fylgigögn með henni ásamt
ávörpum og ræðum við upphaf kirkjuþings.
Nefndin þakkar ávarp Magnúsar E. Kristjánssonar, forseta kirkjuþings og þá hvatningu
sem kom fram í orðum hans. Magnús lagði áherslu á að kirkjan sé fyrir alla. „Það er
kominn tími til að það sé skoðað og rætt hvers konar samfélag verður til þegar boðskapi
fjallræðunnar verður minna haldið á lofti.“
Magnús ítrekar það í ræðu sinni að sóknargjöldin séu félagsgjöld og greiðslur fyrir
kirkjujarðasamkomulagið séu afborganir af jarðakaupum en ekki framlag ríkisins til
þjóðkirkjunnar. „Mér hefur þótt það furðulegt að gjaldið sem ríkið greiðir fyrir þessar eignir
skuli í ríkisreikningum fært sem hluti af framlögum á sviði innanríkisráðuneytisins. Ég
teldi eðlilegra að þetta væri hjá fjármálaráðuneytinu eins og skuldbindingar sem ríkið tekur
á sig vegna fjárfestinga. Þetta fyrirkomulag hefur orðið til þess að margir sem a.m.k. ættu
að vita betur eru að túlka þessar greiðslur sem framlög ríkisins til rekstrar þjóðkirkjunnar
en ekki afborgun af jarðakaupum sem þetta í raun eru. Okkur hjá þjóðkirkjunni hefur
ekki tekist nægilega vel að útskýra eðli þessa máls og mikilvægt að við gerum betur í þeim
efnum“.
Í ávarpi forsætisráðherra, Sigmundar Davíðs Gunnlaugssonar, við upphaf kirkjuþings
kom m.a. fram að á tímum efnahagsþrenginga hefði kirkjan sjálf boðist til að gefa eftir af
fjármunum sínum og hefði fyrir það ekki fengið nægjanlega þakkir. Staða kirkjunnar væri
lagalega sterk og nú gætu stjörnvöld ekki lengur gengið á lagið.  Hann lýsti yfir velvilja
sínum í garð þjóðkirkjunnar enda áhrif hennar á samfélagið mikil í þúsund ár og hvatti
hana til þess að efla sjálfstraust sitt.
Í setningarræðu biskups, Agnesar M. Sigurðardóttur kom eftirfarandi m.a. fram:
„Beiðni ríkisins um afslátt af afgjaldinu var hafnað af kirkjuþingi fyrir yfirstandandi
ár og í gær, á fundi sem ég sótti ásamt forseta kirkjuþings í innanríkisráðuneytið, var
upplýst að ríkið óskar eftir viðræðum við Þjóðkirkjuna um fjárhagsleg samskipti ríkis og
kirkju, bæði hvað varðar kirkjujarðasamkomulagið og sóknargjöldin“. „Það hefur reynst
þessari þjóð blessun að byggja á þeim gildum er Kristur birti og boðaði. Við skulum ekki
fyrirverða okkur fyrir fagnaðarerindið og ekki heldur leggja niður fræðslu um það“.
Skýrsla kirkjuráðs kom mjög seint fram og því gafst kirkjuþingsfólki lítill tími til
undirbúnings.
– Kirkjujarðasamkomulagið
Framundan eru viðræður við ríkið um kirkjujarðasamkomulagið. Ráðuneytin hafa sett á
fót nefnd varðandi þetta mál. Í undirbúningi er að skipa viðræðunefnd af hálfu kirkjunnar.
Í skýrslu kirkjuráðs kemur fram að ágreiningur sé innan ráðsins um ábyrgð kirkjuráðs
á kirkjujarðasamkomulaginu og verið sé að vinna í því að leysa hann.