Dagblaðið Vísir - DV - 26.05.2017, Blaðsíða 45

Helgarblað 26. maí 2017 KYNNINGARBLAÐ Útivist 5
Sársaukinn gleymist en minningin
um afrekið fylgir manni ævilangt
Gunnlaugur Auðunn Júlíus-son er einn þekktasti lang-hlaupari landsins og hefur
getið sér frægð fyrir þátttöku
sína í svokölluðum ofurhlaupum
þar sem hundruð kílómetra eru
lögð að baki. Athyglisvert við feril
Gunnlaugs, sem í dag er 65 ára, er
að hann byrjaði ekki að hlaupa fyrr
en vel upp úr fertugu og hljóp sitt
fyrsta maraþon þegar hann var
48 ára.
„Á þessum tíma þótti mörgum
fásinna að svona gamall maður
ætlaði að hlaupa maraþon,“ segir
Gunnlaugur.
En er það ekki bölvuð vitleysa?
„Jú, jú. Sú kenning er til að þegar
menn eru yngri þá séu þeir sneggri
og sprettharðari og leiti þá frekar
í styttri hlaup. Þegar menn eldast
þá eykst seiglan í þeim og úthaldið.
Það hægir jafnframt á þeim og
þeir leita í lengri hlaupin.“ Gunn-
laugur bætir við að andlegt þrek
aukist oft með árunum en jafn-
framt aukist líkamleg seigla með
áratugalangri þjálfun líkamans.
Þú ert lifandi dæmi um að fólk
geti byrjað að hlaupa á miðjum
aldri og orðið langhlauparar. En
hlýtur ekki samt að vera eitthvað
óvenjulegt við þig? Fyrir flesta
getur það varla verið raunhæft að
stefna að því að keppa í 200 eða
400 kílómetra hlaupi?
Gunnlaugur hlær við: „Sko, mér
finnst ég vera voðalega venjulegur.
Þetta er eitthvað sem þróaðist
stig af stigi hjá mér og ég held
að mín mesta gæfa sem hlaup-
ari hafi verið sú hvað ég byrjaði
rólega. Í nokkur ár hélt ég mig við
tíu kílómetra og þar undir. Þannig
byggði ég skrokkinn upp hægt og
rólega. Svo eftir nokkur ár hlunk-
aðist ég í hálfmaraþon. Tveimur
árum síðar var það maraþon. Eftir
það vaknaði löngunin í að hlaupa
Laugaveginn. Eftir að því markmiði
var náð fékk ég veður af því að
það væru í boði enn lengri hlaup.
Svona þróaðist þetta nú bara,
eitthvað sem í upphafi hefði verið
algjörlega óraunhæft var síðar
orðið að raunhæfu markmiði.“
Ég hef séð haft eftir
þér að mataræði skipti
miklu máli fyrir árangur
þinn. „Já, ég byrjaði að
taka til í mataræðinu fyrir
um tíu árum. Ég held mig
við kjöt og fisk, grænmeti
og ávexti. Þegar ég er að
æfa mikið sneiði ég alveg
hjá hveiti, sælgæti og öllu
ruslfæði. Kolvetni eru svo
auðleysanleg, þetta er eins
og munurinn á bensíni og
dísil. Bensínið fuðrar upp
en dísil er svo miklu lengur
að brenna. Þegar maður
hleypur þessu löngu hlaup
er einfaldlega best að vera
saddur. Þá er líkaminn full-
ur af orku. En ef maður er
svangur þá er þetta bara
eins og það leki úr dekkj-
unum undir bíl og keyrt
sé á felgunum. Þegar
ég hljóp Thames Ring á
Bretlandi, 400 kílómetra
hlaup sem tók á fjórða
sólarhring, þá man ég að
það voru pítsur í boði á drykkjar-
stöðvunum og það var bara eins
og að gapa upp í vindinn, engin
næring. Það sem gildir er kjöt, fita
og prótein og stundum dökkur bjór
en kolvetnin í honum eru góð fyrir
langhlaupara.“
Gunnlaugur bendir á að hollt
og rétt mataræði auki ekki aðeins
árangur meðan á hlaupi stendur
heldur hafi mikil áhrif á hve lengi
líkaminn er að jafna sig eftir hlaup.
Fyrir hann er fituríkt, próteinríkt og
kolvetnasnautt mataræði lykillinn.
Aðspurður játar hann að hluti
af því að þrauka ofurhlaup sé að
þola sársauka: „Maður
hugsar með sér að hann sé
tímabundinn en upplifunin
af hlaupinu og afrekinu er eilíf. Þó
að einhverjar blöðrur myndist á
fótunum þá eru þær grónar fyrr
en varir en upplifunin af afrekinu
fylgir manni það sem eftir er. Þetta
verður aldrei frá manni tekið: að
fara út í óvissuna og sigrast á
þrautinni,“ segir Gunnlaugur og
samsinnir því að þetta hljóti að
vera sambærilegt við tilfinningu
fjallgöngugarpsins sem klífur hinn
hæsta tind.
Hér eru að lokum hollráð Gunn-
laugs til þeirra sem vilja byrja að
stunda reglubundna hreyfingu:
1. Það geta allir miklu meira en
þeir halda.
2. Maðurinn er gerður til að
hreyfa sig.
3. Forsenda fyrir árangri er að
setja sér markmið og byggja upp
aga til að ná settum markmiðum.
4. Það er engin þörf á að hlaupa
til að byggja upp þrek og úthald.
Það er nægilegt að finna góða
brekku og ganga rösklega upp
hana. Það tekur líka í!
5. Heilnæmt mataræði er
forsenda svo margs, til dæmis
almenns heilbrigðis og vellíðunar.
Spjallað við Gunnlaug Auðun Júlíusson ofurlanghlaupara
Myndir: Gunnlaugur Júlíusson