Víkurfréttir - 18.12.2014, Blaðsíða 68
68 fimmtudagurinn 18. desember 2014 • VÍKURFRÉTTIR
SENDUM BÆJARBÚUM OKKAR
BESTU ÓSKIR UM GLEÐILEG JÓL
OG FARSÆLT KOMANDI ÁR
- jólaspurningar
Eru einhverjar hefðir hjá ykkur á
bæjarskrifstofunni þegar kemur
að jólunum?
Bæjarskrifstofan er skreytt áður en
aðventa gengur í garð. Starfsfólkið
kemur saman og borðar jólamat í
aðdraganda jólanna.
Hvernig eru jólahefðir hjá þér?
Jólahefðir eru ýmsar. Skreytingar
á húsi, rölt um Laugaveginn á Þor-
láksmessukvöld, yfirleitt hef ég
reykt hangilæri hangandi í eld-
húsinu fyrir jól og við fáum okkur
flís af kjöti af og til. Síðan eru
ýmsar hefðir á aðfangadag. Síðan
er fastur liður að borða hangikjöt
hjá tengdamömmu á jóladag.
Hver er besta jólamyndin?
Gamla Dickens sagan um Skrögg
er mjög klassísk og góð.
Hvaða lag kemur þér í jólaskap?
Raggi Bjarna, Er líða fer að jólum.
Ertu vanafastur um jólin, eitthvað
sem þú gerir alltaf?
Ég er mjög vanafastur um jólin.
Fyrir utan aðfangadag (sjá að
neðan), þá er bókalestur og sam-
vera með sem flestum í fjölskyld-
unni. Oftast fer ég í jólamessu og
horfi á hátíðarmessu í sjónvarpi.
Hvernig er aðfangadagur hjá þér?
Það er alltaf heimabakað brauð og
hangikjöt á borðum um hádegi á
aðfangadag. Eftir það förum við
feðgar og látum ljós á leiði forferðra
og -mæðra í kirkjugarðinum. Fjöl-
skyldan borðar síðan saman og
eftir það eru opnaðar jólagjafir, það
er framkvæmt eftir föstum hefðum.
Oft fer ég í messu á aðfangadag.
Eftirminnilegasta jólagjöf
sem þú hefur fengið?
Margar góðar og eftirminnilegar
jólagjafir gegnum tíðina. Líklega
er það þó rafmagnsbílabrautin sem
ég fékk í jólagjöf þegar ég var 10-11
ára sem er eftirminnilegust.
Hvað er í matinn á aðfangadag?
Við höfum yfirleitt kalkún í matinn
á aðfangadagskvöld.
Eftirminnilegustu jólin?
Ætli eftirminnilegustu jólin séu
ekki þegar ég var rúmlega tvítugur
og var einn í Reykjavík vegna þess
að ég var mikið að spila með Upp-
lyftingu um þau jól. Það er eftir-
minnilegt að hafa verið einn á að-
fangadagskvöld og öll fjölskyldan
var vestur í Ólafsvík.
Hvað langar þig í jólagjöf?
Góð bók er alltaf sígild.
Borðar þú skötu?
Já ég borða skötu tvisvar á ári.
Annars vegar þegar haldin er
skötumessa í Garðinum á Þorláks-
messu að sumri. Síðan borða ég
alltaf skötu í góðra vina hópi á Þor-
láksmessu fyrir jól. Það er órjúfan-
legur hluti í aðdraganda jóla.
Eru einhverjar hefðir í kringum
Þorláksmessu hjá þér?
Borða skötu í hádeginu, síðan
höfum við nú í mörg ár farið í
bæinn og rölt um Laugaveginn á
Þorláksmessukvöld. Lengi vel var
ég á síðustu stundu með að kaupa
jólagjöf fyrir konuna og gerði það
gjarnan á Þorláksmessu, kannski
verður það þannig líka í ár!
■■ Magnús Stefánsson:
Gjöfin fyrir kon-
una oft keypt á
síðustu stundu
Magnús Stefánsson bæjarstjóri í Garðinum fer í skötu á Þorláks-
messu.Magnús Stefánsson bæjarstjóri í Garðinum snæðir yfirleitt
kalkún á aðfangadag með fjölskyldunni. Hann er frekar vanafastur
yfir hátíðarnar og fær sér t.a.m. alltaf skötu í góðra vina hópi á Þor-
láksmessu. Lagið Er líða fer að jólum, með Ragga Bjarna, kemur
bæjarstjóranum söngglaða alltaf í jólaskapið.
Hvít lagkaka með súkkulaðikremi
Ég er í uppskriftagírnum þessa dagana eins og margar aðrar húsmæður og mig langar til að gefa
ykkur uppskrift að ljósri lagköku með súkkulaðikremi á milli en þetta er kaka sem ömmur mínar
langt aftur i móðurlegg hafa bakað árum saman fyrir jólin. Börnunum mínum finnst þessi kaka æði
og nú er ég búin að setja hana í hollustubúning því það er svo notalegt að fá sér eina köku-
sneið. Það er frábært að halda í þessar gömlu fjölskylduhefðir síðan maður var að alast upp
og bragðið vekur óneitanlega upp góðar æskuminningar. Gleðilegan jólabakstur!
Hvít lagkaka:
4 egg
250 g smjör
1 msk mjólk
1 tsk vanilluduft
260 g lífrænt heilhveiti
260 g Sukrin sykur
2 tsk vínsteinslyftiduft
Súkkulaðikrem:
1-2 egg
250 g smjör
2 msk kalt kaffi
2-3 vanilluduft
2 msk hreint kakóduft
500 g Sukrin melis flórsykur
200 g lífrænt 70% súkkulaði
Kakan. Smjör, egg og sykur þeytt vel saman. Þurrefnum blandað saman í sér skál og öllu svo
hrært saman. Skiptið deiginu í 3 hluta og smyrjið út 1 hluta í einu á bökunarpappír á ofnplötu. Baka
1 ofnplötu í einu í ofninum. Bakið við 200°C í 10 mín.
Kremið. Smjör, egg og sykur þeytt vel saman, súkkulaði og kakó brætt saman við lágan hita. Rest
af kremuppskrift bætt við og hrært vel saman við. Kremi smurt á milli laga þannig að verði 3 lög
af köku og kremi.
Heilsukveðja, Ásdís grasalæknir.
www.facebook.com/grasalaeknir.is, www.pinterset.com/grasalaeknir, www.instagram.com/asdisgrasa
HEILSUHORNIÐ
ÁSDÍS
GRASALÆKNIR
SKRIFAR
Heimilisfólk og starfsmenn
Hrafnistu Reykjanesbæ
Bestu jóla- og
nýárskveðjur sendum
við til ættingja og vina
með þakklæti fyrir
liðnar stundir.