Morgunblaðið - 01.05.2018, Page 3

STERKARI SAMAN
1. MAÍ 2018
Verkalýðshreyfingin á Íslandi varð til í lok 19. aldar þegar
verkafólk hóf að skipuleggja sig í stéttarfélög. Það áttaði sig
á aflinu sem bjó í fjöldanum og samstöðunni. Frá þeim tíma
hefur sameinuð verkalýðshreyfing barist fyrir réttindum
og kjörum launafólks á Íslandi og náð markverðum árangri.
Þar hefur samstaðan leikið lykilhlutverk. En það eru blikur
á lofti.
Við horfum upp á vaxandi misskiptingu tekna og auðs í
samfélaginu. Alþingismenn, æðstu embættismenn ríkisins
og stjórnendur fyrirtækja skammta sér launahækkanir
langt umfram venjulegt launafólk og skattar eru
lækkaðir á stóreignafólk. Á sama tíma hirða stjórnvöld
kaupmáttaraukninguna frá hinum lægst launuðu með
skattahækkunum og skerðingu bóta. Það er mikið verk
að vinna fyrir samhenta verkalýðshreyfingu. Við höfum
vopnin og aflið til að breyta ef við stöndum saman.
ASÍ óskar launafólki til hamingju með daginn og hvetur til
samstöðu í aðgerðum stéttarfélaganna 1. maí.