Morgunblaðið - 26.05.2018, Blaðsíða 20

20 FRÉTTIRInnlent
MORGUNBLAÐIÐ LAUGARDAGUR 26. MAÍ 2018
Kringlan | Smáralind
Eltak sérhæfir sig í sölu
og þjónustu á vogum
Sigtryggur Sigtryggsson
sisi@mbl.is
Borgarráð hefur synjað umsókn um
breytingu á deiliskipulagi Nönnu-
götureits vegna lóðanna nr. 25 við
Njarðargötu og nr. 15 við Urðarstíg.
Umsóknin fól í sér aukið bygging-
armagn á reitnum. Fjölmargar at-
hugasemdir bárust frá íbúum í ná-
grenninu.
Umsókn um nýtt deiliskipulag
barst frá Arkitektum Laugavegi 164
ehf. fyrir hönd Mondó ehf. Í breyt-
ingunni fólst m.a. að sameina lóð-
irnar í eina lóð fyrir fjöleignahús og
fjölga íbúðum í allt að sjö. Þá stóð til
að rífa útbyggingar beggja húsa og
byggja nýtt sameiginlegt stigahús.
Tillagan var auglýst frá 12. febr-
úar til og með 26. mars 2018 og
barst alls 21 athugasemd. Þær eru
af margvíslegum toga en lúta flestar
að því að útsýni skerðist, skugga-
myndun í görðum aukist og verð-
mæti fasteigna rýrni. Þá muni bíla-
stæðavandi aukast og sé hann
nægur fyrir.
Bent er á að götumynd Njarðar-
götu sé ein af vinsælustu götumynd-
um í borginni, ein af heillegustu og
um leið fjölbreyttustu götumyndum
Reykjavíkur síðan 1930.
Þá er einnig bent á að þrátt fyrir
að óheimilt sé að reka gististarfsemi
á reitnum sé slík starfsemi rekin í
þremur húsum nú þegar. Íbúarnir
óttast frekari gististarfsemi með til-
heyrandi ónæði.
Íbúar á Fjölnisvegi 2 segja í bréfi
sínu að íbúar Njarðargötu séu nú
þegar undir miklu álagi vegna ferða-
manna sem rúlla töskum sínum að
næturlagi, ferðast í óteljandi lang-
ferðabílum upp og niður brekkuna
og búi í fjölmörgum íbúðum við göt-
una.
„Í ljósi athugasemda nágranna,
sem snúast um mikið byggingar-
magn í fíngerðu umhverfi, sbr.
umsögn/greinargerð hér að fram-
an, er lagt til að sú deiliskipulags-
breyting fyrir Njarðargötu 25 og
Urðarstíg 15, sem auglýst var, verði
ekki samþykkt,“ er niðurstaða
skipulagsfulltrúa Reykjavíkur.
Borgarráð staðfesti niðurstöðuna.
Mótmælin tekin til greina
 Borgin hafnar frekari uppbyggingu á Nönnugötureit
Götuhorn Reykjavíkurborg synjaði
ósk um frekari uppbyggingu.
Guðni Einarsson
gudni@mbl.is
Vegagerðin kannar nú uppsetningu sérstakra
vegvísa að ferðamannastöðum, brúnna skilta,
líkt og sjá má víða um heim. Einar Pálsson, for-
stöðumaður þjónustudeildar hjá Vegagerðinni,
sagði að málið sé enn á vinnslu- og umræðu-
stigi. Ákvörðun um að taka upp brún umferð-
arskilti hafi ekki enn verið tekin.
„Þetta er í vinnuferli og viðræðum Stjórn-
stöðvar ferðamála, Ferðamálastofu og Vega-
gerðarinnar. Aðdragandinn hefur staðið lengi.
Þegar svona er gert gefast tækifæri til að gera
ýmislegt annað í leiðinni. Sérstaklega hvað
varðar skilgreiningar á því hvað er ferða-
mannastaður. Að vísa á ferðamannastað er
ábyrgðarhluti. Það krefst þess til dæmis að það
sé fært að honum. Þetta er stórt mál og snýr að
því sem kalla má stýringu ferðamanna,“ sagði
Einar. „Ef af verður þá gæti verið mögulegt að
klára undirbúningsvinnu á þessu ári. Svo þarf
að leggja málið fyrir yfirstjórn Vegagerð-
arinnar.“ Auk þess sagði hann að breyta þyrfti
reglugerð um umferðarmerkingar áður en
brún skilti verða tekin í notkun. Hann kvaðst
vona að það tækist að ljúka þessum undirbún-
ingi á árinu. Almennt væri fólk hrifið af hug-
myndinni þar sem liturinn væri þekktur á
ferðamannastöðum víða erlendis.
Mannvit skilaði Vegagerðinni rannsókn-
arskýrslu um málið í apríl, Vegvísun að ferða-
mannastöðum – Brún skilti. Verkefnið var
styrkt af rannsóknarsjóði Vegagerðarinnar og
er hægt að lesa skýrsluna á heimasíðu Vega-
gerðarinnar. Þar er skoðað hvort og þá hvernig
Vegagerðin geti notað brún skilti til auðkenn-
ingar fyrir ferðamannastaði. Bent er á að brún-
ir vegvísar að ferðamannastöðum séu þekktir
víða erlendis. Þar má nefna mörg Evrópulönd,
Bandaríkin, Kanada og Ástralíu. Nefnd Sam-
einuðu þjóðanna um umferð á landi gaf það út
2010 að brúni liturinn á umferðarskiltum skyldi
vera frátekinn fyrir ferðamannastaði.
Ferðamannastaðir og ferðamannaleiðir
Hópurinn sem vann skýrsluna skoðaði m.a.
fyrir hvaða gerðir skilta brúni liturinn gæti átt
við hér. Það gæti átt við um þjónustumerki og
vegvísa. Bent er á að í Bandaríkjunum séu ýmis
almenn þjónustuskilti höfð brún þegar þau eru
innan þjóðgarða og ferðamannastaða. Í Noregi,
Danmörku og Svíþjóð er notað sérstakt tákn
fyrir ferðamannaleiðir. Verði slíkar leiðir skil-
greindar hér á landi er talið æskilegt að hanna
samræmt tákn fyrir þær.
Ef ákveðið verður að taka upp brúna litinn á
skilti fyrir ferðamannastaði væri samræmi í því
að nota brúnan bakgrunn í stað græns á þjón-
ustu- og leiðbeiningartákn á ferðamannastöð-
um og eins skilti um bönn og aðvaranir á sömu
stöðum. Brúnn litur á skiltum getur líka átt við
sum upplýsingamerki þegar þau eru staðsett
innan þjóðgarða og skilgreindra ferða-
mannastaða. Suma núverandi vegvísa væri
einnig hægt að nota með brúnum bakgrunni
þegar þeir eru notaðir í og að þjóðgörðum og
ferðamannastöðum.
Á það er bent að tákn sem sýnd eru í hand-
bók Ferðamaálstofu séu að miklu leyti í takt við
tákn Vegagerðarinnar. Þó eru dæmi um að
gerð hafi verið ný tákn fyrir tákn sem þegar
eru til í reglugerð um umferðarmerki. Æskilegt
þykir að samræma táknin sem notuð eru í land-
inu.
Bent er á mikilvægi þess að móta stefnu um
tungumál og notkun tákna á skiltum. Þar sem
nota þarf texta þykir almennt æskilegt að nota
íslensku. Þó eru til undantekningar eins og við
alþjóðaflugvelli. Þar verði notuð íslenska og
enska og eins þegar verið er að vara við hættu
til að ná einnig til erlendra ferðamanna.
Eitt af markmiðum verkefnisins var að skoða
hvernig viðmið væri hægt að hafa við val á því
hvaða ferðamannastaðir mættu nota brún
skilti. Eðlilegt þykir að horfa fyrst og fremst til
þjóðgarða en líka annarra mikilvægra og vin-
sælla ferðamannastaða. Mikilvægt er að slík
skilgreiningarvinna verði unnin í samvinnu
Vegagerðarinnar og ferðamálayfirvalda.
Brún skilti á ferðamannaslóðir skoðuð
 Vegagerðin kannar að setja upp brún umferðarskilti við ferðamannastaði  Ákvörðun liggur ekki
fyrir  Breyta þarf reglugerð um umferðarmerki  Margir þekkja brún skilti frá ferðum erlendis
Tölvugerð mynd/Mannvit
Hugmynd Svona gætu brún skilti við Þingvelli
mögulega litið út, samkvæmt skýrslunni.
Í dag kl. 14 verður opnuð í Þjóð-
minjasafninu við Suðurgötu sýning-
in „Leitin að klaustrunum“ sem
byggist á rannsókn Steinunnar
Kristjánsdóttur, prófessors í forn-
leifafræði við Háskóla Íslands og
Þjóðminjasafn Íslands. Í rannsókn-
inni var leitað að hvers kyns vís-
bendingum um klausturhald í land-
inu frá 1030-1554. Notaðir voru
jarðsjármælar til að kíkja undir
svörðinn og könnunarskurðir grafn-
ir þar sem vísbendingar sáust. Leit-
að var að klausturgripum í söfnum
og kirkjum og að klausturplöntum,
rústum og örnefnum úti á vettvangi.
Heimildir voru lesnar, jafnt forn-
bréf sem þjóðsögur, auk þess sem
farið var yfir kort og ljósmyndir.
Í fréttatilkynningu frá safninu er
rifjað upp að klausturhald á Íslandi
hófst með stofnun klausturs á Bæ í
Borgarfirði árið 1030. Samtals voru
þrettán klaustur stofnuð á fjórtán
stöðum á kaþólsku tímaskeiði hér-
lendis en því síðasta var komið á fót
á Skriðuklaustri árið 1493. Klaustr-
in urðu ásamt biskupsstólunum að
umsvifamestu kirkjulegu stofnun-
um í landinu fram til siðaskipta. Þá
var þeim lokað og kaþólsk trú bönn-
uð með lögum. Klausturhald féll í
gleymsku og minjar eftir klaustrin
týndust.
Árið 2017 kom út bókin Leitin að
klaustrunum – klausturhald á Ís-
landi í fimm aldir eftir Steinunni
Kristjánsdóttur á vegum Sögu-
félags og Þjóðminjasafns Íslands.
Áður hafði komið út Sagan af
klaustrinu á Skriðu árið 2012. Bæk-
urnar voru báðar tilnefndar til Ís-
lensku bókmenntaverðlaunanna og
Fjöruverðlaunanna í flokki fræði-
rita og til viðurkenningar Hagþenk-
is. Leitin að klaustrunum – klaust-
urhald á Íslandi í fimm aldir hlaut
bókmenntaverðlaun félags bóksala
2017 og viðurkenningu Hagþenkis
2017.
Sýningin er liður í hátíðarsýn-
ingaröð Þjóðminjasafns Íslands
vegna 100 ára afmælis fullveldis Ís-
lands og evrópska menningararfs-
ársins 2018. Af tilefninu lánar Þjóð-
minjasafn Dana Þjóðminjasafni
Íslands helgiskrín frá 13. öld frá
Keldum á Rangárvöllum. Skrínið
verður til sýnis í grunnsýningu
safnsins, „Þjóð verður til – menning
og samfélag í 1200 ár“.
Helgiskrínið frá Keldum til
sýnis í Þjóðminjasafninu
 Sýningin „Leitin að klaustrunum“ opnuð í safninu í dag
Keldnaskrínið Það er frá 13. öld.
Í umfjöllun Morgunblaðsins á
fimmtudaginn um nýjan nytjamark-
að ABC barnahjálpar í Hafnarfirði
var einn viðmælendanna sagður
heita Helgi.
Það rétta er að hann heitir Egill Örn
Pálsson og er hér með beðist velvirð-
ingar á þessum mistökum.
LEIÐRÉTT
Rétt nafn er Egill
Öll tilboð í byggingu húss fyrir
skrifstofur Byggðastofnunar á
Sauðárkróki voru langt yfir kostn-
aðaráætlun. Lægsta tilboðið var
tæpum 200 milljónum kr. yfir því
sem reiknað hafði verið með.
Byggðastofnun ætlar að láta
byggja tæplega 1.000 fermetra hús
á tveimur hæðum og með kjallara
undir hluta hússins. Stefnt er að
vottun byggingarinnar sem vist-
væns mannvirkis.
Boðin var út jarðvinna, upp-
steypa og í raun fullbúið hús ásamt
öllum frágangi utan og innan og
lóðar. K-Tak ehf. á Sauðárkróki
átti lægsta tilboð, 651 milljón kr. en
kostnaðaráætlun hljóðaði upp á 458
milljónir. Þrjú önnur tilboð bárust,
öll talsvert hærri, eða á bilinu 718
til 786 milljónir kr.
Langt yfir áætlun
Byggðastofnunar