Tímarit hjúkrunarfræðinga - 2019, Blaðsíða 29

Tímarit hjúkrunarfræðinga | 29
endurinnlagna. Einnig var lögð áhersla á
þrýstingssáravarnir auk þess sem hugað var
að áliti og ánægju aðstandenda. Loks má
nefna tvö gæðaverkefni sem snéru að aukinni
samvinnu við aðrar deildir spítalans og þar
sem hjúkrunarfræðingar skiptu miklu máli.
Annars vegar voru afskipti gjörgæsluteymis af
sjúklingum á legudeildum, svokallaðs GÁT-
teymis, og hins vegar eftirfylgni þeirra veikustu
að lokinni útskrift af gjörgæslu. Bæði þau
verkefni hafa lifað og eflst.
Öryggi og líðan starfsmanna
Við heilbrigðisstarfsfólk vinnum mikilvæg
og gefandi störf, við að bjarga mannslífum og
við að bæta heilsu og líf fólks. Það gerum við
með því að beita gagnreyndum vísindum og
aðferðum en einnig með því að gefa af okkur til
skjólstæðinganna, miðla von og geisla öryggi
og trausti. Því þurfum við að vera vel stemmd
í vinnunni og hlúa vel að okkur sjálfum. „Við
getum ekki gefið það sem við eigum ekki
sjálf,“ segir hjúkrunarfræðingurinn Maureen
Bisognano sem nú stýrir einni virtustu stofnun
í heimi á sviði öryggis og gæðamála, IHI í
Bandaríkjunum.
Kulnun starfsfólks í heilbrigðisþjónustu er
mikið áhyggjuefni og þarf að beita öllum
tiltækum ráðum til að sporna við. Kulnun
hefur slæm áhrif á einstaklinginn, vinnustaðinn
og getur beinlínis komið niður á gæðum og
öryggi meðferðar. Ábyrgð vinnuveitanda er
vissulega mikil en við eigum öll að sameinast
um að skapa þannig umhverfi að við mætum
stolt og glöð til vinnu og förum enn stoltari
heim. Við þurfum að hlúa að eigin heilsu og
líðan: hreyfa okkur, borða skynsamlega, sofa
vel, rækta geðið og viðhafa góð samskipti, efla
en líka hvíla andann og umgangast áfengi og
lyf með mikilli varúð.
Fram undan eru mikil viðfangsefni í heil-
brigðiskerfinu og breytingar óumflýjanlegar.
Við verðum öll að leggja okkar af mörkum,
byrja á að líta í eigin barm og skoða hvað
hver og einn getur gert til að stuðla að betri
framtíð innan heilbrigðiskerfisins. Efling gæða
og öryggis skiptir miklu máli, það er ekki
einungis siðferðilega, lagalega og faglega rétt
heldur beinlínis fjárhagslega hagkvæmt. Fyrir
liggur að innleiða Áætlun um gæðaþróun
í heilbrigðisþjónustu til ársins 2030. Sú
áætlun, sem meðal annarra var unnin af
hjúkrunarfræðingum hjá Embætti landlæknis,
byggist á markvissu umbótastarfi, notkun
gæðavísa, skráningu og úrvinnslu atvika auk
þjónustukannana til að viðhorf notenda komi
fram.
Ljóst er að hjúkrunarfræðingar verða
mikilvægir í þeirri vinnu og ég hlakka til
áframhaldandi samstarfs við stéttina!
Sigríður Eiríksdóttir verður formaður Fjelags íslenskra hjúkrunarkvenna
„Í STARFI MÍNU SEM YFIRLÆKNIR Á GJÖRGÆSLUDEILD
LANDSPÍTALA VIÐ HRINGBRAUT VORU HJÚKRUNAR-
FRÆÐINGAR ÖTULIR SAMSTARFSMENN ÞEGAR KOM AÐ
ÞVÍ AÐ EFLA GÆÐI OG ÖRYGGI“