Tímarit hjúkrunarfræðinga - 2019, Page 61

Tímarit hjúkrunarfræðinga | 61
Undirbúningur að geðheilsuteymum
Þegar þróunarverkefninu Geðheilsustöð
Breiðholts lauk kom aftur að tímamótum þegar
starfsemin fluttist yfir til HH þann 1. mars
2017 og varð að geðheilsuteymi austur.
Með flutningi á starfseminni var haft
að leiðarljósi samþykkt tillögu um
stefnu og aðgerðaráætlun stjórnvalda í
geðheilbrigðismálum til fjögurra ára. Eitt
af aðalmarkmiðum áætlunarinnar er að
þjónusta við einstaklinga með geðröskun
sé samþætt og samfelld. Í því samhengi er
tiltekið að fólk sem glímir við geðröskun hafi
aðgengi að þverfaglegu teymi heilbrigðis- og
félagsþjónustu. Því verði m.a. náð með fjölgun
geðheilsuteyma á höfuðborgarsvæðinu og lagt
til að teymin vinni á grundvelli þarfagreiningar
og valdeflingar. Til að undirbúa starfsemi
geðheilsuteymanna var með erindisbréfi
skipaður samráðshópur þvert á stofnanir.
Meginhlutverk hópsins var að skilgreina
starfsemina og hvaða þættir ættu að vera til
staðar.
Geðheilsuteymi HH
Í dag eru starfandi tvö geðheilsuteymi sem
vinna eftir sömu verkferlum í Reykjavík
austur og vestur og verið er að koma af stað
geðheilsuteymum á landsbyggðinni. Þriðja
teymið mun innan skamms taka til starfa
á höfuðborgarsvæðinu en það mun sinna
Kragasvæðinu.
Geðheilsuteymin eru þverfagleg 2. stigs
geðheilsbrigðisþjónusta. Byggist starfsemi
þeirra á nærþjónustu, batahugmyndafræði,
gagnreyndum aðferðum og þeim leiðum og
stuðningi sem henta eintaklingnum hverju
sinni. Geðhjúkrunarfræðingar eru stór hluti af
þverfaglegum starfshópi teymanna og hafa þeir
forystu sem málastjórar. Í teymunum vinna
einnig einstaklingar með reynslu af geðröskun
og þétt samstarf er við þjónustumiðstöðvar
með þátttöku félagsráðgjafa í teymunum.
Lögð er áhersla á einstaklings- og fjölskyldu-
vinnu ásamt fræðslu en námskeið eru stór hluti
af starfseminni. Innan geðheilsuteymanna
starfar atvinnulífsráðgjafi frá Virk (IPS)
sem hefur það hlutverk að styðja til
atvinnuþátttöku eða náms. Geðheilsuteymin
styðjast einnig við hugmyndafræði FACT þar
sem sveigjanleiki þjónustunnar er í fyrirrúmi,
einstaklingsbundin málastjórn og samvinna
þvert á ólík svið (FACT, 2013).
Meginmarkmið þjónustunnar er einstaklings-
miðuð nálgun þar sem hverjum og einum er
mætt þar sem hann er staddur. Lögð er áhersla
á að vinna með grunnþarfir einstaklingsins,
tilfinningalega líðan ásamt því að efla von,
bæta sjálfsmynd, bjargráð, virkni og tengslanet.
Með þjónustunni er ávallt haft í huga
mikilvægi þess að hver og einn velji sína leið
og bati sé einstaklingsbundinn og geti tekið
mislangan tíma.
Starfsemi geðheilsuteymanna fer fram með
viðtölum á starfsstöð eða með heimavitjunum
eða hvoru tveggja, eftir því sem þörf er á
hverju sinni. Til að tryggja samfellda þjónustu
með hagsmuni einstaklingsins að leiðarljósi
eiga geðheilsuteymin gott samstarf við aðrar
stofnanir ásamt félaga- og notendasamtökum.
En stefna geðheilsuteymanna er að vera í
stöðugri þróun og horfa til þarfa þjónustuþega
hverju sinni. Þeir einstaklingar sem þiggja
þjónustu teymanna eru á breiðu aldursbili
frá 18 ára aldri og því er mikilvægt að sníða
þjónustuna að hverjum og einum.
Óumdeilt er að notendur hafa mikilvæg
áhrif á þjónustuna en samvinna þeirra
innan þverfaglegs teymis við fagfólk úr
ólíkum stéttum er mikilvægur hlekkur
þjónustunnar.
Heimildir
FACT (2013). Flexible Assertive Community Treatment:
Visjon, modell og organisering af fact-modellen
(Karin Blix Flage þýddi). Brumunddal: Nasjonal
kompetansetjeneste for samtidig rusmisbrug og psykisk
lidelse.
Geðheilsustöð Breiðholts (2012). Samþætt
þjónusta geðteymis Heimaþjónustu Reykjavíkur og
þjónustumiðstöðvar Breiðholts: Lokaskýrsla. Reykjavík:
Geðheilsustöð Breiðholts.
Geðteymi heimahjúkrunar (2011). Ársskýrsla. Reykjavík:
Geðheilsuteymi heimahjúkrunar.
„MEGINTILGANGI
VERKEFNISINS VAR ÞVÍ NÁÐ
MEÐ FÆKKUN Á INNLÖGNUM
OG BÆTTUM LÍFSGÆÐUM
ÞJÓNUSTUÞEGA“