Morgunblaðið - 03.04.2020, Blaðsíða 27

ÍÞRÓTTIR 27
MORGUNBLAÐIÐ FÖSTUDAGUR 3. APRÍL 2020
 Svíar stefna að því að ljúka bikar-
keppni karla í fótbolta áður en deilda-
keppnin fer af stað í Svíþjóð. Átta lið
eru eftir í bikarnum, sem spilaður er
frá hausti til vors, og lagt hefur verið
til að keppninni verði lokið á einni
viku, helst í lok maí ef það verður
mögulegt. Meðal annars mætast í átta
liða úrslitum þeir Kolbeinn Sigþórs-
son hjá AIK og Arnór Ingvi Traustason
hjá Malmö.
 Graham Potter hjá Brighton varð í
gær annar knattspyrnustjórinn í ensku
úrvalsdeildinni til að bjóðast til að
lækka laun sín vegna kórónuveiru-
ástandsins í landinu. Áður hafði Eddie
Howe hjá Bournemouth tekið á sig
launalækkun ásamt helstu samstarfs-
mönnum sínum.
 Einn af bestu sundmönnum Evrópu
á þessari öld, Ungverjinn Lászlo Cseh,
hefur ákveðið að framlengja ferilinn
um eitt ár til þess að geta keppt á sín-
um fimmtu Ólympíuleikum sumarið
2021 í Tókýó. Cseh hefur fengið fern
silfurverðlaun og tvenn bronsverðlaun
á Ólympíuleikum en sá sem kom í veg
fyrir að hann ynni til gullverðlauna var
Bandaríkjamaðurinn ósigrandi Mich-
ael Phelps. Cseh setti m.a. þrjú Evr-
ópumet í Peking 2008 en varð alltaf
annar á eftir Phelps sem setti heims-
met í sömu greinum og hirti gullin.
 Stuðningsmenn enska knatt-
spyrnufélagsins Tottenham hafa lýst
yfir gríðarlegri óánægju með að leik-
menn félagsins skuli ekki hafa gefið
eftir einhvern hluta launa sinna á með-
an starfsfólk félagsins hafi þurft að
taka á sig 20 prósent launalækkun.
Alls er um 550 manns að ræða sem
starfa hjá félaginu á ýmsum sviðum.
„Það sem hefur reitt stuðningsmenn
félagsins til reiði er að félag sem á að
vera traust og ábyrgt skuli lækka laun-
in hjá starfsfólkinu og biðja um hjálp
frá ríkinu, á sama tíma og dýrustu
starfskraftar félagsins fá sín laun
óskert,“ segir í yfirlýsingu frá Totten-
ham Hotspur Supporters Trust.
 Royal & Ancient-klúbburinn í St.
Andrews í Skotlandi, sem miklu ræður
í golfíþróttinni, hefur sent frá sér til-
kynningu vegna fréttaflutnings um
The Open Championship í sumar.
Tímaritið Golf Digest birti á vef sínum
frétt um að mótinu hefði verið frestað
í kjölfarið á því að Wimbledon-mótinu í
tennis var frestað. R&A segir í tilkynn-
ingunni að þessi fullyrðing sé röng.
Engin ákvörðun hafi enn þá verið tek-
in. Í ljósi kórónuveirunnar sé þó að
sjálfsögðu fundað reglulega og einn
valmöguleikinn sé að fresta mótinu.
 Son Heung-Min, sóknarmaður
enska knattspyrnuliðsins Tottenham,
hefur snúið aftur til heimalands síns
Suður-Kóreu til þess að
klára herskyldu sína. Hún
er 21 mánuður en Son
fékk undanþágu
um að stytta
hana eftir
Suður-
Kórea
fór með
sigur af hólmi á Asíu-
leikunum árið 2018.
Hann þarf hins vegar
að sinna heræfingum
í fjórar vikur til þess
að uppfylla herskyldu
sína og vonast hann
til þess að ljúka henni
áður en tímabilið hefst á
nýjan leik á Englandi.
Eitt
ogannað
FÓTBOLTI
Bjarni Helgason
bjarnih@mbl.is
E. Börkur Edvardsson, formaður
knattspyrnudeildar Vals, hefur aldr-
ei séð jafn svart ástand og nú þegar
kemur að rekstri félagsins en hann
settist í stjórn hjá Val árið 2003 og
tók við formannsembætti knatt-
spyrnudeildarinnar síðar um haust-
ið.
Kórónuveiran sem nú herjar á
heimsbyggðina hefur haft gríðarleg
áhrif á allt íþróttalíf hér á landi en
samkomubann
ríkir á Ísland.
Öll starfsemi
Vals hefur því
legið niðri að und-
anförnu en félag-
ið sendi frá sér
fréttatilkynningu
í vikunni þar sem
kom fram að allir
leikmenn, þjálf-
arar og starfs-
menn knattspyrnudeildarinnar
hefðu boðist til að taka á sig launa-
lækkun út árið 2020 vegna þeirra að-
stæðna sem skapast hafa í samfélag-
inu af völdum veirunnar.
„Það er mjög mikill samhugur og
samkennd innan félagsins um þetta
mál og leikmenn knattspyrnuliðanna
eiga hrós skilið,“ sagði Börkur í sam-
tali við Morgunblaðið í gær. „Það var
nauðsynlegt að fara í þessar aðgerðir
og þetta sýnir fyrst og fremst liðs-
heildina hjá okkar leikmönnum og
þann anda sem er ríkjandi í félag-
inu.“
Gríðarlegt tekjutap
„Við teiknuðum upp þrjár sviðs-
myndir og erum að vinna eftir einni
þeirra núna. Hlutirnir geta breyst
mjög hratt eins og dæmin hafa sýnt
frá að þessi veira komst fyrst á flug.
Við vinnum þetta í raun bara frá
mánuði til mánaðar en við erum
bjartsýn á að Íslandsmótið fari í
gang um miðjan júní,.
Tekjutapið á þessum fyrstu mán-
uðum hefur áhrif lengra inn í árið
fyrir félagið.
Það er allt lokað hjá okkur og það
skýtur skökku við finnst manni ef fé-
lögin eiga að bera allan kostnað af
þessu sjálf.
Ríkið kom til bjargar þegar sam-
tök atvinnulífsins ætluðu ekki að
greiða launamönnum laun á meðan
þeir voru í sóttkví, nú hafa íþróttirnir
verið settar í sóttkví líka. Það þarf
því að finna lausn með ríkisvaldinu
til þess að bjarga íþróttalífinu á Ís-
landi.
Maður hefur eðlilega aldrei séð
neitt svona áður, hvorki á Íslandi eða
bara í heiminum yfirhöfuð. Ég veit
ekki hvað maður á að líkja þessu við
en þetta er fyrst og fremst bara
skelfileg staða hjá öllum í rauninni.
Þetta hefur haft alveg hriklega áhrif
á atvinnulífið og fyrirtæki í landinu
en það góða við þetta er að þetta
mun taka enda á einhverjum tíma-
punkti. Við megum þess vegna ekki
missa trúnna og vonina því það mun
stytta upp.“
Skökk umræða
Íþróttafélögin í landinu hafa feng-
ið sinn skerf af gagnrýni að undan-
förnu fyrir að hafa spennt bogann of
hátt og greitt leikmönnum sínum of
há laun. Valur er eitt þeirra félaga
sem hefur staðið einna best, fjár-
hagslega undanfarin ár, en formað-
urinn ítrekar að félagið sé enn að
leita að hinum gullna meðalvegi.
„Það er alveg eðlilegt að fólk velti
upp svona spurningum á tímum sem
þessum.
Fyrr á árum var ekki hefð fyrir að
borga íþróttafólkinu okkar pening
fyrir að stunda íþróttir en í dag er
allt annað umhverfi, kröfur, geta,
umhverfi, meiri peningar þannig að
sjálfsögðu á að greiða laun í dag.
Svo er líka spurning hvað eru góð
laun og hvað eru slæm laun. Það er
þessi gullni meðalvegur sem við, sem
rekum félögin, erum að reyna finna
en laun í samfélaginu hafa farið upp
á undanförnum árum eins og gengur
og gerist og laun íþróttafólks fylgt
með.
Umhverfið á Íslandi er eilítið sér-
stakt og samkeppnin um íslenska
leikmenn er gríðarlega mikil. Það
hefur tíðkast hér í gegnum tíðina að
menn fari ungir út í atvinnumennsku
og því eru félög tilneydd oft á tíðum
að sækja sér erlenda leikmenn ef
metnaðurinn er til staðar og félög
vilja ná árangri.
Landsliðið hefur sem dæmi notið
góðs af bættri aðstöðu og metnaði fé-
lagana að því leyti að betri leikmenn
eru að koma upp og við sem rekum
félögin höfum reynt að gera þeim
leikmönnum sem hér spila, kleift að
verða betri knattspyrnumenn. Um-
ræðan hefur oft á tíðum ekki verið
fagleg þegar kemur að rekstri félag-
anna sem er og verður alltaf erfiður.
Við mættum kannski mæta meiri
skilning á því starfi sem unnið er í
knattspyrnuhreyfingunni hér heima.
Það má alveg hrósa þeim sjálfs-
boðaliðum sem þar starfa og gefa
þeim klapp á bakið öðru hverju fyrir
þeirra óeigingjarna starf.“
Vill frysta gjöld félaganna
Vegna slæmrar fjárhagsstöðu fé-
laganna í landinu má leiða að því lík-
ur að það verði lítið um styrkingar á
leikmannamarkaðanum þegar nær
dregur Íslandsmóti. Það má því leiða
að því líkur að ungir og efnilegir ís-
lenskir knattspyrnumenn, sem eru
að ganga upp úr yngri flokkunum, fái
tækifæri í úrvalsdeildinni í sumar.
„Það hefur verið lítið um að vera á
leikmannamarkaðnum í vetur sem
helgast einna helst af því að það hef-
ur einfaldlega ekki verið mikið fram-
boð af leikmönnum. Ég á ekki von á
miklum hreyfingum á markaðnum
fram að móti, sérstaklega ekki núna
miðað við það sem er í gangi í sam-
félaginu. Mér finnst þessi umræða
um unga leikmenn oft vera hrópuð út
í tómið því það vilja öll félög spila á
sínum uppöldu leikmönnum. Auðvit-
að vilja félögin spila sínum bestu
mönnum en þrítugur fótboltamaður
sem hugsar vel um sig í dag þarf
ekkert endilega að vera gamall í
þeim skilningi. Stundum þarf hins
vegar að styrkja hópinn ef það vant-
ar leikmenn í ákveðnar stöður og þá
er það gert. Það þarf alls ekki að
vera neikvætt.“
Formaður Vals vill sjá stjórnvöld
grípa inn í og aðstoða íþróttahreyf-
inguna á þessum erfiðu tímum.
„Hentugast væri að stjórnvöld
myndu stíga inn í launamálin til að
byrja með og það á við um laun leik-
manna, þjálfara og starfsmanna.
Hér var boðuð ákveðin leið þar
sem að ríkið greiðir 75% af laun-
um þeirra sem eru í 25% vinnu
o.sfrv, en sú leið hentar kannski ekki
íþróttamönnunum því það er erfitt
að setja íþróttamann í 25% vinnu.
Eins þarf að finna lausn á rekstr-
argjöldum félaganna með ríkinu og
sveitarfélögunum. Samfélagið á og
verður að standa vörð um íþróttalífið
á tímum sem þessum og því á að
frysta öll gjöld félaganna á meðan
allt liggur niðri,“ bætti formað-
urinn við.
Þarf að finna lausn til að
bjarga íþróttalífinu á Íslandi
 E. Börkur Edvardsson formaður knattspyrnudeildar Vals hefur aldrei séð
eins svart ástand  Bjartsýnn á að Íslandsmótið fari af stað um miðjan júní
Morgunblaðið/Hari
Meistarar Valskonur eru ríkjandi Íslandsmeistarar kvenna í knattspyrnu, körfuknattleik og handknattleik.
E. Börkur
Edvardsson
Engin af þjóðunum 55 ræddi um að aflýsa sín-
um mótum á fjarfundinum sem UEFA hélt með
þeim í gærmorgun, samkvæmt Sky Sports. Í gær
lögðu hins vegar stjórnarmenn belgísku
A-deildarinnar fram tillögu um að aflýsa því sem
eftir væri af tímabilinu þar í landi. Í máli þeirra
kom fram að einungis væri formsatriði að sam-
þykkja tillöguna á fundi deildarinnar 15. apríl.
Það þýðir að Club Brugge verður krýndur meist-
ari þótt ellefu umferðum sé ólokið í landinu.
Í nágrannalandinu Hollandi eru líka háværar
raddir um að fara sömu leið og lýsa tímabilinu
2019-20 lokið með sigri Ajax sem er jafnt AZ
Alkmaar að stigum á toppnum en með betri
markatölu þegar níu umferðir eru eftir.
Knattspyrnusamband Evrópu, UEFA, hefur sent
aðildarþjóðum sínum skýr skilaboð um að ljúka
sínum keppnistímabilum þegar öruggt sé að gera
það eftir að kórónuveiran hafi gengið yfir en lýsa
ekki yfir að þeim sé lokið.
Markmið UEFA er að allar vetrardeildir Evr-
ópu ljúki keppni í júlí og ágúst og stefnan hefur
verið sett á að keppni í Meistaradeildum karla og
kvenna og Evrópudeild UEFA verði lokið í ágúst.
Fréttamaður Sky Sports kveðst hafa séð um-
rætt bréf sem sent hafi verið til allra 55 aðild-
arþjóðanna með þessum boðskap. Þar séu þær
hvattar til að sýna samstöðu og ganga í takt um
leið og tekist sé á við þau vandamál sem farsóttin
hafi leitt af sér.
„Það hefur gríðarlega þýðingu að jafnvel svona
yfirgengilegur atburður eins og þessi farsótt geti
ekki komið í veg fyrir að úrslit í okkar mótum
ráðist inni á vellinum, samkvæmt settum reglum,
og að allir meistaratitlar vinnist samkvæmt úrslit-
um leikja,“ segir í bréfinu.
„Sem ábyrgir leiðtogar í okkar íþrótt þurfum
við að tryggja eins lengi og nokkur möguleiki er
að allt fari fram samkvæmt reglum. Við erum
sannfærð um að fótboltinn geti hafist á ný eftir
nokkra mánuði, samkvæmt þeim skilyrðum sem
sett eru af stjórnvöldum, og erum sannfærð um
að ákvarðanir um að aflýsa tímabilum séu ekki
tímabærar og ekki réttlætanlegar,“ segir enn-
fremur í bréfinu.
Skýr skilaboð frá UEFA um að ljúka keppni