Rit Mógilsár - 2019, Side 49

R i t M ó g i l s á r | 49

Kolefni til sölu?
Gunnlaugur Guðjónsson* og Pétur Halldórsson
Skógræktin
*gulli@skogur.is
Útdráttur
Mikilvægasta verkefni samtímans í umhverfismálum er að draga úr útblæstri gróður-
húsalofttegunda og þar er þáttur koltvísýrings (CO2) stærstur. Jafnframt er nauðsynlegt
að binda eftir mætti eitthvað af þeim koltvísýringi sem hefur þegar verið losaður út í
andrúmsloftið. Sömuleiðis eru takmörk fyrir því hversu mikið er hægt að draga úr
losun þegar í stað. Á meðan ekki verður hjá því komist að losa gróðurhúsalofttegundir
út í andrúmsloftið er skynsamlegt og nauðsynlegt að ráðast í mótvægisaðgerðir.
Hagkvæmasta og öflugasta aðferðin sem völ er á til kolefnisbindingar er nýskógrækt.
Vaxandi áhugi er á kolefnisbindingu með nýskógrækt hérlendis, jafnt meðal
almennings og í atvinnulífinu. Til þess að koma megi upp virkum markaði með slíkar
aðgerðir þarf að búa þeim áreiðanlegt og viðurkennt kerfi og tryggja vel að sú binding
sem óskað er eftir verði að raunveruleika. Slíkum kerfum hefur sums staðar verið
komið á, til dæmis í Bretlandi, og geta fyrirtæki og stofnanir nú keypt skógarkolefnis-
ígildi og talið þau fram á móti losun starfsemi sinnar. Með hliðsjón af slíku bresku kerfi
hafa nú verið unnin frumdrög að kerfi sem koma mætti á laggirnar á Íslandi. Það
byggist í stuttu máli á því að stofnað er til skógarkolefnisígilda sem merkt eru „í bið“
þar til staðfest er að ræktun sé hafin sem binda muni koltvísýringstonn á móti
keyptum skógarkolefnisígildum. Þá eru skógarkolefnisígildin orðin gild og meðan svo
er má versla með þau eftir settum reglum. Með reglulegu millibili eru skógarkolefnis-
ígildin staðfest af sérfræðingum og vottuð af til þess bærum óháðum aðilum. Þegar
samningstíma viðkomandi skógarkolefnisígilda lýkur eru þau fyrnd og ekki hægt að
versla með þau lengur. Kerfi sem þetta gæti orðið að veruleika á Íslandi áður en langt
um líður þótt ekkert hafi verið ákveðið enn sem komið er.