Rit Mógilsár - 2019, Page 80

80 | F a g r á ð s t e f n a 2 0 1 9

Efni og aðferðir
Fengin voru fræ úr fimm frægörðum af kynbættri sænskri stafafuru til prófunar á
Íslandi til samanburðar við fjögur kvæmi sem hafa verið notuð á Íslandi undanfarin ár
(tafla 1).
Finnvid Precher hjá Svenska Skogsplantor hafði milligöngu um að útvega fræið.
Samanburðarkvæmin voru Tutshi Lake, Watson Lake og Carcross, sem voru ræktuð upp
af innfluttu fræi, og síðan var notað fræ úr Þjórsárdal safnað í reit af Skagway-uppruna.
Framleiðsla plantnanna fór fram í gróðrarstöðinni Sólskógum. Plönturnar voru
ræktaðar í eitt ár í fp40-fjölpottabökkum (100 cm3 pottar, 1. mynd).

Öllum efniviðnum var sáð á sama tíma nema Skagway sem var sáð viku síðar. Tilraunin
var gróðursett á alls 12 stöðum í öllum landshlutum (2. mynd). Gróðursetningin fór
fram í júní og júlí 2014. Hafnarsandur í Ölfusi er undanskilinn í uppgjöri en sú tilraun
var afskrifuð vegna mikill affalla fyrsta veturinn eftir gróðursetningu. Allar aðrar
tilraunir voru mældar eftir fimm vaxtarsumur til að fá fyrstu vísbendingar um lifun og
vaxtarþrótt mismunandi efniviðar. Einnig var skráð hvort plönturnar væru með sviðið
barr eða ekki. Einungis Grund, Stóru-Hámundarstaðir og Óseyri sýndu sviðnun af
umfangi sem hentaði til greiningar. Tölfræðiforritið R var notað við úrvinnslu gagna
en Excel-töflureiknir við framsetningu niðurstaðna.
1. mynd. Ársgamlar plöntur tilbúnar til gróðursetningar. (Mynd: Pétur Halldórsson)