Muninn - 01.05.2016, Blaðsíða 97

95
Þú ert nýkomin/nn í buzakvosina að hausti til.
Þú hafðir heyrt að hér ætti maður að setjast og hvergi annar staðar, og maður ætti að byrja á Twitter. Svo
fannst þér dálítið skrítið að skólafélagið, Huginn, sé að geyma drykki við stofuhita í Kvosinni, en svo fattar þú
að þetta eru bara SviMA strákar. Þar næst ferð þú að hlakka til að byrja í tíma. Þér gekk mjög vel í grunnskóla
og ætlar svo sannarlega að demba þér í þetta nám!
Fyrstu vikurnar ganga vel, og svo ferð þú á félagakynninguna.
Á félagakynningunni sérðu allskyns spennandi undirfélög sem þér líst vel á. Allt frá FolfMA kynningunni hjá
krullaða dvergnum til myndbandsins frá LMA, sem er fullt af einkahúmor sem enginn skilur.
Þá vaknar einföld spurning; Ætti ég að taka þátt?
JÁ!
Félagslífið er það sem heldur okkur MA-ingum saman. Það að nemendur geti skemmt sér með því að
sameinast við að grýta frisbídiskum í skrýtnar járnkeðjur á staur eða sýnt saman heila leiksýningu sem fyllir
salinn í öll skipti er magnað! Ég held að við tökum þessari starfsemi allt of sjálfsagðri. Ekki þarf að líta langt
til skóla í nágrenninu til þess að sjá að það er hægara sagt en gert að byggja upp félagslíf frá grunni.
Fyrsta skrefið er að stíga út fyrir þægindarammann.
Það er mjög erfitt og óþægilegt fyrir marga, hvort sem þeir eru nýbakaðir buzar ellegar gamlingjar á
lokasprettinum; en það sem á við alla er að það mun borga sig.
Fáðu nokkra vini þína til þess að koma með þér í þetta, það gerir það bærilegra.
Ef þú hugsar út í það, þá hefur þú voða litlu að tapa. Segjum að þú færir í LMA prufur, þá í versta falli öðlastu
reynslu á prufunum og þér gengur þá vonandi betur á næsta ári; en í besta falli munt þú upplifa 3 bestu
mánuði lífs þíns, við eitthvað sem þú elskar að gera eða lærir að elska að gera.
Það er mjög erfitt fyrir marga, að taka þetta skref, að stíga út fyrir þægindarammann en ég vona að þessi
grein geti allavega hjálpað einni manneskju til þess að gera það; þá er markmiðinu náð.
Ég vona svo innilega að fólk þori að taka skrefið, því þetta er fyrsta skrefið í átt að skemmtilegra og
hamingjusamara lífi.
Eftir hálfa menntaskólagöngu hef ég komist að einu; einu sem
mér finnst nauðsynlegt að allir nemendur hérna þurfi að vita:
Það er mismunandi milli manna, hvað er það mikilvægasta sem
þeir fá út úr menntaskóla.
En ég vona að það mikilvægasta sem þú lærir sé að lærdómur
menntaskólanema er nefnilega ekki bara sá sem finnst í
skólabókum. Að læra að fóta okkur í lífinu er ekki síðra verkefni
sem við stöndum frammi fyrir. Félagslífið er frábær vettvangur til
þess.
Ef náminu er sinnt áttu möguleika á góðu framhaldsnámi.
Ef félagslífinu er sinnt áttu möguleika á ævilöngum
vinsamböndum.
Óður til félagslífsins
Höfundur: Egill Örn Richter