Fréttatíminn - 15.06.2012, Blaðsíða 36

Æsingur í umferðinni
Haraldur
Jónasson
hari@
frettatiminn.is
HELGARPISTILL
É
Ég er alla jafna dagfarsprúður maður. Reyni að hafa
stjórn á skapi mínu í samskiptum við annað fólk.
Helst mætti telja mér til vansa, og ég veit að fer í
taugarnar á mörgum sem ég á í daglegum samskipt­
um við, er að ég flauta oft á tíðum leiðinleg lög – jafn­
vel gamlar jólalummur um mitt sumar – samferða­
fólki til talsverðrar armæðu. Ég á mér þó dökka hlið
sem ekki allir vita af. Ég er umferðarreiður. Ég tek
út flestar frústrasjónir daglegs amstur á götum úti.
Ég öskra á mótorhjólakappann sem treður sér
milli bíla til þess að verða fyrstur á ljósum. Ég helli
úr skálum reiði minnar á gamlar konur sem kunna
hvorki að nota aðreinar né fráreinar. Ég blikka
pappakassann sem svínar á mig, í það minnsta þrjá
fjórðu úr kílómetra. Og vogi sér einhver að stela af
mér fremsta bili á umferðarljósum, jahhh, sá á ekki
von á góðu. Sérstaklega ekki hafi ég verið búinn að
reikna út að þurfa ekki að stoppa á ljósum heldur
renna að og skjótast þá áfram í þriðja gír eins og skot
úr túttubyssu.
Einu sinni, á mínum yngri árum, fór ég út úr bíln­
um og lét mann, sem reyndar átti það skilið, heyra
það og gott ef ég lét ekki eitt spark vaða í dekkið
hjá honum. Ég er meira að segja kominn með of
háan blóðþrýsting sem ég rek beint til reiðinnar
sem grípur mig stundum í umferðinni. Ég er svo
sannarlega ekki stoltur af þessum skapgerðarbresti
og skammast mín á köflum fyrir.
En ég ræð ekki við mig. Ég þoli ekki þegar um­
ferðarljós poppa upp hér og þar án þess að nokkur
þörf hafi verið fyrir þau. Ég þoli ekki hraðahindranir
og hringtorgavitleysan virðist engan endi ætla að
taka. Í öllum skilningi. Tvíbreiðar götur eru gerðar
að einbreiðum og hvað er svo málið með Hörpu­
klúðrið? Hver var það sem ákvað að breyta Sæbraut­
inni í „þrjátíu götu“ með sautján umferðaljósum og
hraðahindrunum sem nægja til að fylla Panama­
skurðinn? Var alveg bannað að moka þessari götu í
stokk eða búa til eins og eina göngubrú fyrir þá sem
vilja sækja tónlistarhúsið á tveimur jafn fljótum. Allt
virðist vera gert til þess að halda mér fúlum á móti.
Bílastæði eru svo annar kapítuli. Þar beinist reiðin
þó ekki endilega að samferðafólki mínu, nema ef
vera skildi þeim sem leggja einum bíl í tvö stæði
(hvað er það???) eða þeim sem leggja litla bílnum
sínum svo langt inn í stæðið að það virðist tómt alveg
þangað til maður beygir þar inn. Bílastæðareiðin
beinist helst gegn þeim sem hanna stæðin, sér í lagi
ef stæðum er fækkað til að koma trjám, grasi eða
skrauti fyrir. Þannig tókst þeim einmitt að eyði­
leggja Laugaveginn þarna um árið!
Mitt í hinni réttlátu reiði skýtur hins vegar upp
óþægilegur þanki. Sem gæti verið stærsta vanda­
málið þegar allt kemur til alls. Ég sjálfur. Ég er
nefnilega grábölvuð frekja í umferðinni. Ég sikk­
sakka milli akreina til að vera fremstur hér og þar,
passa að lenda fyrir framan gamla kalla með hatta,
er gjörsamlega óþolandi aftursætisbílstjóri og svo
mætti lengi telja. Ég er alltaf að reyna að hætta
þessu. Mana mig til að halda mig hægra megin þótt
bílarnir til vinstri skjótist fram hjá. Það endar yfir­
leitt á einn veg. Ég dembi mér yfir til vinstri og reyni
að vinna upp „tapið“. Ég er mín eigin martröð.
Auðvitað finnst mér gott að börnin mín séu örugg­
ari við einbreiðar götur, þar sem eru hraðahindranir
og ljós til að stemma stigu við hættulegum hrað­
anum. Gamalt fólk lendir sjálfsagt sjaldan í slysum
sökum þess hve hægt það keyrir og mótorhjólagæj­
arnir, ætli þeir séu ekki bara svona spenntir að kom­
ast út á góðviðrisdögum? Fólk sem hannar bílastæði
er sjálfsagt líka ágætis fólk þegar maður kynnist
því. Þannig að ef þið sjáið mig, rúmlega hálffertugan
manninn á gráum Focus­station alveg að bráðna úr
reiði í umferðinni, reynið þá að umbera mig stutta
stund. Ég meina ekki neitt með þessu.
Te
ik
ni
ng
/H
ar
i
Hýsing tölvukerfis hjá Advania dregur úr rekstrarkostnaði
og hentar fyrirtækjum af öllum stærðum.
» Aukið öryggi
Gögnin eru afrituð yfir í annan hýsingarsal og þannig geymd á tveimur stöðum.
Hýsingarumhverfi okkar er vo
að samkvæmt ISO 27001 sem er alþjóðlegur
staðall um upplýsingaöryggi.
» Hámarksaðgangur að hugbúnaði og gögnum
Öll gögn og hugbúnaður er aðgengilegur á einfaldan og þægilegan há
.
» Sérfræðingar vakta gögn og kerfi
Sérfræðingar okkar eru á vakt allan sólarhringinn, alla daga ársins
Hafðu samband og kynntu þér kosti hýsingar hjá Advania.
Það er símtal sem borgar sig.
Bjóðum
tölvukerfið
þi
velkomið
í hýsingu
Sætún 10 | 105 Reykjavík | Sími 440 9000 | advania@advania.is | www.advania.is
36 viðhorf Helgin 15.-17. júní 2012