Litli Bergþór - 01.12.2013, Blaðsíða 4

Ágætu félagar!
Ungmennafélagið hefur miklum skyldum að gegna hér í samfélaginu, sérstaklega hvað varðar barna- og
unglingastarf. Árið 2006 var undirritaður samningur við sveitarfélagið þar sem sveitarfélagið styrkir
félagið árlega en í staðinn þarf félagið að uppfylla ákveðnar
skyldur varðandi barna- og unglingastarf. Mikilvægt er að
félagið sinni þessu hlutverki á sem bestan og öflugastan hátt og
geti borið sig saman við önnur félög á landsvísu. Vert er að skoða
hvort félagið eigi að stefna á að fá viðurkenningu frá Íþrótta-
og ólympíusambandi Íslands sem heitir Fyrirmyndarfélag ÍSÍ.
Til að fá þessa viðurkenningu þurfa félög að standast ákveðnar
kröfur sem ÍSÍ setur. Þessar kröfur ganga m.a. út á ábyrga
fjármálastjórnun, þjálfarar þurfa að hafa ákveðna menntun,
félags- og foreldrastarf þarf að vera til staðar. Félög þurfa
líka að sinna fræðslu- og forvarnarstarfi og setja sér stefnu í
jafnréttismálum. Miklar kröfur eru gerðar úr samfélaginu til
félaga sem sinna barna- og unglingastarfi og eru þær alltaf að
aukast. Því er mikilvægt að félög séu sífellt í nafnlaskoðun
með sína starfsemi. Undirrituðum finnst vert að skoða hvort
Umf. Bisk. eigi að stefna á það á næstu árum að taka upp það
gæðastarf til að geta fengið þessa viðurkenningu að getað kallað
sig Fyrirmyndarfélag.
Framundan eru jól og áramót með öllum sínum kærleika og
gleði sem við öll hlökkum til. Á þessum árstíma kemur barnið
upp í okkur öllum því í jólaundirbúningnum rifjast upp góðir
tímar frá okkar uppvexti. Gaman er að fylgjast með börnum í
aðdraganda jólanna því tilhlökkunin skín úr andlitum þeirra og
óhætt er að segja að jólin séu tími barnanna. Stundum er líka sagt að jólin séu tími kaupmanna, en þeir
fara mikinn í þessum mikla verslunarmánuði. Mikilvægt er því að muna eftir tilgangi jólanna og hafa
hann í hávegum á aðventunni. Það er auðvelt að gleyma sér í öllum auglýsingaflauminum og missa sjónar
á tilganginum. Það eru miklu frekar samverustundir með fjölskyldu og vinum við jólaundirbúninginn sem
standa uppúr þegar fram í sækir. Því miður eru þó ekki allir sem eiga góðar minningar frá jólunum og er
miklvægt að muna eftir að gefa þeim tíma svo þessi árstími verði þeim góður.
Árið sem nú er að renna sitt skeið á enda hefur verið viðburðaríkt hjá félaginu. Bókin, Ungmennafélag
Biskupstungna – 100 ára saga, kom út á árinu og er óhætt að segja að þetta sé eitt af stærstu verkefnum
félagsins frá upphafi. Mikil vinna var á bak við útgáfuna sem skilaði sér að lokum í þessu glæsilega riti.
Það er gaman að segja frá því að félagið þurfti ekki að setja sig í skuldir og gat fjármagnað verkið með
eigin fé og styrkjum og er fjárhagsstaða félagsins traust eftir útgáfuna.
Lesendum óska ég gleðilegra jóla og farsældar á nýju ári.
Ritað í byrjun desember 2013
Helgi Kjartansson, formaður
4 Litli-Bergþór
Formannspistill
Facebook
Ritstjórn vill benda lesendum Litla-Bergþórs á Facebook síðu blaðsins. Gaman væri
ef fólk rifjaði upp gamlar sögur úr sveitinni - setti inn gamlar (og nýjar) myndir með
skýringum á við hvaða tilefni þær eru teknar og hverjir eru á þeim. Kannski verður
til grein í Litla-Bergþóri úr svona innleggi á síðuna.
Kveðja, ritstjórn Litla-Bergþórs.