Litli Bergþór - 01.12.2013, Blaðsíða 33
Litli-Bergþór 33
Sigurbjörnsson biskup. Félagið stóð fyrir málþingi
í Skálholti um framtíð staðarins laugardaginn 19.
október undir yfirskriftinni „Skálholt hvað ætlar þú að
verða?“ Um 80 manns sóttu þingið og komu þar fram
margar hugmyndir og ábendingar sem stjórn félagsins
mun vinna áfram með.
16. ágúst var óperan Ragnheiður eftir Gunnar
Þórðarson frumflutt í Skálholti af fimmtíu manna
sinfóníuhljómsveit, níu einsöngvurum og Kammerkór
Suðurlands. Hljómsveitarstjóri var Petri Sakari og
Hilmar Örn Agnarsson er stjórnandi kammerkórsins.
Sigurður Helgason, yfirmatreiðslumaður á Grillinu
á Hótel Sögu heimsótti Ingólf og Sigrúnu á Engi og átti
við þau spjall fyrir greinaflokkinn „Matreiðslumeistari
heimsækir bændur“ í Bændablaðinu 22. ágúst.
Sveitarstjórn Biskupstungna samþykkti bókun
vegna Kjalvegar í tengslum við bréf Samtaka ferða-
þjónustunnar, var bókunin þess efnis að nauðsynlegt
sé að hefjast handa strax við uppbyggingu Kjalvegar
þar sem ekkert fjármagn hafi verið sett í hann í
marga áratugi þrátt fyrir margföldun tekna ríkisins af
ferðamennsku þar.
Ný símanúmer voru tekin í notkun hjá stofnunum
Bláskógabyggðar þann 15. ágúst. Skrifstofan er með
númerið 480 3000 og faxnúmerið er 480 3001. Númer
Bláskógaskóla er 480 3020.
Sveitahátíðin Tvær úr Tungunum var haldin í og við
Aratungu þann 17. ágúst, var veður með eindæmum
gott þennan dag og mætti töluverður fjöldi fólks á
hátíðina. Keppt var í járnkarlinum og gröfuleikni.
Járnkarl varð Samúel Birkir Egilsson á Hjarðarlandi og
járnkona varð Sandra Grímsdóttir á Syðri-Reykjum. Í
Gröfuleikninni sigraði Grétar Már Grímsson á Syðri-
Reykjum. Þyrla Landhelgisgæslunnar kom og fékk fólk
að skoða hana. Umhverfisverðlaun Bláskógabyggðar
voru veitt við þetta tækifæri. Viðurkenningar voru
veittar fyrir snyrtilegasta sveitabýlið í rekstri, fyrsta
til þriðja sæti. Vatnsleysa I-III hlaut fyrstu verðlaun,
önnur verðlaun fékk Fellskot og í þriðja sæti var
Heiðarbær í Þingvallasveit. Kvenfélag Biskupstungna
var með sumarmarkað sinn þennan dag í Aratungu og
um kvöldið var haldinn stórdansleikur í húsinu þar
sem Geirmundur Valtýsson lék fyrir dansi.
Unnið var að vegabótum í sumar og haust á veginum
frá Skálholtsafleggjaranum langleiðina upp að Hross-
hagaafleggjara. Var vegurinn bæði hækkaður og
breikkaður.
Réttað var í Tungnaréttum þann 14. september,
milli 4500 og 5000 fjár, í ágætis veðri. Heimtur voru
ágætar þrátt fyrir leiðinlegt fjallveður og óvenju
blautan framafrétt. Um kvöldið var að venju réttaball
í Aratungu þar sem hljómsveitin Góðir landsmenn
spiluðu fyrir dansi.
Í eftirsafni fundust um 80 kindur og síðan er búið
að sækja reiting af kindum á bílum, samtals um 16
kindur, þar af fjögur húnversk lömb, sem voru norðan
varnargirðingar. Eitthvað af þessum kindum voru
flækingar úr Hreppum og af Skeiðum.
Samkvæmt Magnúsi grenjaskyttu í Austurhlíð var
legið á 19 grenjum í ár, þar af voru einungis tvö í
óbyggðum. Hin voru öll í byggð. Unnust 53 dýr þar af
12 fullorðin og 41 yrðlingur. Fimm ný gren fundust á
árinu, flest í byggð.
Sauðfé í byggð stendur hætta af fleiru en tófunni.
Óvenju lélegar heimtur voru á Brekku og Miðhúsum
í haust, en á Brekku vantar um 11 lömb af 70 úr
heimalandinu. Af þeim sem heimtust lifandi voru 7
lömb hundbitin, að því er talið er, og mikið var um
undanvillinga. Á Miðhúsum vantar einnig um 30 lömb
í haust, þar af heimtist eitt hundbitið í haust og annað
drapst í vor með áverka eftir hundsbit. Í fyrra vantaði
einnig 30 lömb á Miðhúsum, en fé frá þessum bæjum
gengur í afgirtu heimalandi.
Stolið var fatnaði að verðmæti um einnar milljón
króna úr versluninni Geysi sunnudaginn 15. september
en þjófarnir náðust skömmu síðar með fenginn. Sömu
menn voru gripnir við þjófnað úr sumarbústöðum í
landi Efri-Reykja í nóvember en sluppu í burt eftir að
hafa ráðist á manninn sem stoppaði þá og veitt honum
áverka. Náðust þeir skömmu seinna við Úthlíð.
Sigurmyndin úr ljósmyndasamkeppni 17. júní í ár.
Myndina tók Dana Heiða Becker í Laugarási.