Litli Bergþór - 01.12.2013, Blaðsíða 6

6 Litli-Bergþór
Molarnir
Æskulýðsfélagið Molarnir sér um æskulýðsstarf fyrir
unglinga frá áttunda bekk grunnskólans til fyrsta bekks
í framhaldsskóla. Fundirnir eru yfirleitt haldnir aðra
hverja viku í Skálholtsbúðum og standa frá 20 til 22.
Nú í ár eru í kringum 40 krakkar sem sækja starfið og
koma mörg hver langt að. Um fundina sjá leiðtogar en
þeir koma bæði úr sveitinni og úr Reykjavík. Fundirnir
eru vel skipulagðir og byrja flestir á einhverskonar leik
eða þraut sem er í gangi út fundinn en undir lokin er
tekin bænarstund og krakkarnir fá Prins Póló og djús.
Á hverju ári fer æskulýðsfélagið á tvö mót til þess að
kynnast unglingum úr öðrum félögum og hafa gaman
saman. Fyrra mótið er haldið í febrúar í Vatnaskógi þar
sem æskulýðsfélögin af höfuðborgarsvæðinu koma
saman ásamt Molunum og æskulýðsfélaginu á Selfossi.
Seinna mótið er Landsmót æskulýðsfélaganna, haldið í
október, en þar koma saman unglingar af landinu öllu.
Það mót er haldið á mismunandi stöðum á hverju ári.
Krakkarnir eru nú nýlega komnir heim af slíku móti sem
haldið var í Keflavík. Þar stóðu þau sig með prýði og
skemmtu sér konunglega. Þau lögðu mikinn metnað
í skemmtiatriðið sem þau fluttu á mótinu, ekki síst
búningana, þar sem þau voru verur úr myndinni Avatar,
og fengu unglingarnir fyrstu verðlaun fyrir búningana.
Molastarfið stendur frá september og fram í lok maí en
loka fundurinn er haldinn í Haukadalsskógi þar sem allir
grilla saman og fara í leiki. Molararnir halda úti hóp á
facebook sem heitir Molar! Allir sem vilja fylgjast með
Molunum eru velkomnir í þann hóp.
Konný Björg Jónasdóttir, æskulýðsfulltrúi.
Meðfylgjandi myndir sýna æskulýðsstarfið í Skálholti
og á Landsmótinu.
Þórhildur Sif Loftsdóttir ásamt æskulýðsleiðtogunum
Konný Björg Jónasdóttur og Herdísi Ingvadóttur.
Brynhildur Óskarsdóttir, æskulýðsfulltrúi, ásamt
Guðmundi Hermanni bróður sínum.