Litli Bergþór - 01.12.2013, Blaðsíða 12

12 Litli-Bergþór
Jessika Kenney og Christian Wolff undir stjórn Ilans
Volkov.
Eftir þátttöku í Óperunni Ragnheiði í ágúst 2013,
sem sagt er frá hér að ofan, var kórinn beðinn um
að syngja í ýmsum tilfallandi giggum, eins og við
friðarsúlu Yoko Ono og í afmæli Egils Ólafssonar í
október 2013.
En aðalverkefni haustsins voru æfingar fyrir
tónleikaferð okkar til London 14. – 17. nóvember.
Kammerkór Suðurlands varð þess heiðurs
aðnjótandi að hið virta breska tónskáld, sir John
Tavener, valdi kórinn til að frumflytja nýtt verk eftir
sig „Three Shakespeare Sonnets“, sem hann tileinkaði
eiginkonu sinni Maryanna eftir að hann reis upp
úr erfiðum veikindum. En Tavener og Hilmar Örn
hafa haft náið samstarf um árabil. Var ákveðið að
tónleikarnir yrðu í Southwark Cathedral, hinni gömlu
sóknarkirkju Shakespeares í London föstudaginn 15.
nóvember 2013 - og þá var bara eftir að fjármagna
dæmið! Leigu á kirkju, hljóðfæraleikara, einsöngvara
o.s.frv, auk fargjalda og gistingar. En allt gekk þetta
upp með góðra manna hjálp.
Samstarf sir John Tavener og Kammerkórs
Suðurlands hófst árið 2003 þegar Hilmar Örn fór til
Englands og var gestur tónskáldsins í eina viku. Þar
voru lögð drög að verkefnavali fyrir geisladisk með
verkum Taveners og ákvað tónskáldið þá að semja
nýtt verk, Schuon Hymnen, tileinkað Kammerkór
Suðurlands. Þá hófst sjö ára vinnuferli sem endaði
með útgáfu geisladisksins Heilagur draumur á Íslandi
og Englandi. Diskurinn fékk lofsamlega dóma og var
valinn plata mánaðarins í október 2010 hjá Gramophone
og tilnefnd til Íslensku tónlistarverðlaunanna 2011 í
flokknum ,,sígild og samtímatónlist“.
Auk Shakespearesonnettana og fleiri verka eftir
Tavener, var ákveðið að flytja á þessum tónleikum
Kammerkórsins nokkur af verkum ungu íslensku
tónskáldanna, sem við fluttum á síðasta ári, sem og
frumflytja nútímatónverk eftir ungt og upprennandi
tónskáld frá Wales, Jack White að nafni. En Hilmar
Örn hafði kynnst honum í gegnum samstarfsaðila í
London.
Dramatísk tónleikaferð til Lundúna í
nóvember 2013.
Eftir strangar æfingar, og þegar einungis tveir
dagar voru til brottfarar, bárust þau sorglegu tíðindi
að tónskáldið, sir John Tavener, hefði látist að morgni
12. nóvember. Fjölskylda hans, sem Hilmar Örn var í
nánu sambandi við, tók samt ekki annað í mál en að
tónleikarnir yrðu haldnir, en þetta breytti óneitanlega
stemmningunni í hópnum, sem hélt utan árla morgnuns
þann 14. nóvember.
Er ekki að orðlengja það, að það brast á fjölmiðlafár
við komuna til Lundúna. Kórinn fór rakleiðis í beina
útsendingu í útvarpi BBC, þar sem hann flutti hluta af
íslenska prógramminu og tekin voru viðtöl við Hilmar
og Björgu um tengsl þeirra og kórsins við Tavener.
Eins voru sjónvarpsmyndavélar og fréttamenn í
kringum kórinn á æfingunni um kvöldið.
Biðraðir mynduðust við kirkjuna á föstudeginum
og komust færri að en vildu, voru hátt í 1000 manns
í kirkjunni á tónleikunum um kvöldið og hver krókur
og kimi setinn.
Tónleikarnir tókust frábærlega vel í alla staði og
fékk kórinn og kórstjórinn mikið hrós fyrir flutninginn.
Gagnrýnendur bresku dagblaðanna héldu vart vatni (í
orðsins fyllstu, því tárin flóðu) og gáfu tónleikunum
fjórar stjörnur sem telst mjög gott.
Fjölskylda Taveners var viðstödd tónleikana og
maður spyr sig hvað hann sá fyrir? Tónleikarnir
enduðu á sonnettunni (nr. 71) sem byrjar á orðunum
„syrgðu mig ekki þegar ég er dáinn“.
En það var sæll og stoltur kór sem flaug heim á
rósrauðum skýjum á sunnudagskvöldið - og lenti í
fárviðri á Keflavíkurflugvelli. Hluti kórsins, sem flaug
með Wow air lenti norður á Akureyri og komst ekki til
baka suður fyrr en kl. tvö um nóttina - í sama fárviðrið
og blindbyl á Reykjanesbraut. En heim komust þreyttar
Tungnakórkonur milli kl. sex og sjö um morguninn í
heiðskíru og fallegu veðri, sem var allsstaðar á Íslandi
nema á Reykjanesi þetta kvöld!.
Nú er fyrirhugað að fylgja Tavenerplötunni eftir í
samvinnu við Smekkleysu og Chester Music í London,
sem er útgefandi og umboðsaðili Taveners, og fara
með Kammerkór Suðurlands á ýmsar tónlistarhátíðir
í Evrópu árið 2014, en Tavener hefði orðið sjötugur á
næsta ári.
Kórinn hefur fengið breskan umboðsmann sem
vinnur að framgangi hans á erlendri grund og einnig
er kórinn í samstarfi við ÚTÓN, Útflutningsskrifstofu
íslenskrar tónlistar. Kammerkór Suðurlands hefur
hlotið styrk frá Kraumi tónlistarsjóði sem er mikilvæg
viðurkenning á starfi kórsins og stuðningur.
Texti:
Geirþrúður Sighvatsdóttir
Viðar Gunnarsson sem Brynjólfur biskup og Guðrún Jó-
hanna Ólafsdóttir sem Ingibjörg vinnukona í Skálholti.