Morgunblaðið - 07.07.2001, Síða 24
24 LAUGARDAGUR 7. JÚLÍ 2001 MORGUNBLAÐIÐ
Mér hefur gengið illa að fá vinnu – hvernig er
best að bera sig að við atvinnuleit?
SVAR Undirbúningurinn er lykilatriði.Allt of margir fara af stað í at-
vinnuleit án undirbúnings og sinna atvinnuleit-
inni ekki skipulega. Það er ekki vænlegt til ár-
angurs, en að sjálfsögðu skiptir markaðurinn
líka máli. Markaðurinn undanfarið hefur verið
að taka breytingum, ekki hefur verið eins auð-
velt að komast í starf og áður, hvort sem um er
að ræða faglærð eða ófaglærð störf. Versl-
unar- og þjónustugeirinn virðist vera að ná
jafnvægi í bili og svo er ekki eins mikil hreyf-
ing í skrifstofugeiranum og hefur verið und-
anfarin þrjú ár. Þessar breytingar gera það að
verkum að umsækjendur um hvert starf eru
margir og slagurinn harður. Það er því enn
meiri ástæða til að vanda til verks og undirbúa
sig vel fyrir atvinnuleitina.
Best er að byrja strax á fyrsta degi, hvort
sem verið er að klára skóla, fyrri vinnu lokið
eða eftir að ákvörðun hefur verið tekin um að
skipta um starf. Á fyrsta degi er best að byrja
strax kl. 9, með því að setjast niður og fara í
sjálfsskoðun.
Hver er ég
Hverju er ég góð/ur í (styrkleikar)
Hvað mætti ég bæta (veikleikar)
Hvað vil ég
Hvert stefni ég
Það er grundvöllur að þekkja sjálfa/n sig vel
og vera tilbúin/n að svara spurningum um
sjálfa/n sig varðandi styrkleika og veikleika,
því þetta eru spurningar sem við þurfum alltaf
að vera að spyrja sjálf okkur að í gegn um lífið
og þurfum við að sanna fyrir atvinnurekendum
að við séum hæfustu starfsmennirnir. Við
þurfum einnig að vita vel hvað við viljum og
hvert við stefnum. Þegar við höfum velt þessu
vel fyrir okkur, byrjum við á að útbúa ferilskrá
þar sem við látum koma fram upplýsingar eins
og:
Nafn, kennitölu, heimilisfang, síma
númer, netfang
Námsferil (menntun)
Starfsferil (reynsla síðastliðin 10 ár)
Tungumála- og tölvukunnáttu
Áhugamál
Félagsstörf
Persónulega eiginleika
Meðmælendur (a.m.k. tvo) með starfs-
heiti og símanúmeri
Einnig þarf að útbúa umsóknarbréf sem er
hugsað til þess að vekja athygli á ferilskránni.
Í umsóknarbréfi er í stuttu og hnitmiðuðu máli
sagt frá því af hverju sótt er um hjá fyrirtæk-
inu og um hvaða starf (ef það er auglýst), hvað
verið er að gera í dag og hvert stefnt er í fram-
tíðinni. Ég mæli eindregið með bókinni „Frá
umsókn til atvinnu“ eftir Jón Birgi Guðmunds-
son, en í henni eru mörg góð dæmi um um-
sóknarbréf, ferilskrár o.fl.
Þegar við erum orðin sátt við ferilskrána og
umsóknarbréfið/in (ath. ferilskrá og umsókn-
arbréfið þarf að aðlaga með tilliti til mismun-
andi starfa), fáum við vini eða fjölskyldu-
meðlimi til að lesa hana yfir. Síðan útbúum við
lista með þeim fyrirtækjum sem við höfum hug
á að vinna hjá og þeim ráðningarstofum sem
við ætlum að leggja gögnin okkar inn á. Því
næst notum við alla morgna í að merkja við og
senda gögnin um okkur til fyrirtækja. Þá þarf
að vera búið að kynna sér fyrirtækið t.d. á Net-
inu og stíla umsóknina á starfsmannastjóra
eða viðkomandi starfsmannaþjónustu. Eftir
3-4 daga er svo hægt að hringja eða senda raf-
póst á viðkomandi og fylgja gögnunum eftir.
Varðandi ráðningarstofur, þá er um að gera að
panta sér viðtalstíma hjá ráðgjafa, því þeir vita
best hvernig ástandið er á markaðinum og
einnig er það gott tækifæri til að þjálfa sig fyr-
ir atvinnuviðtal. Almenn kurteisi er að láta
ráðningarstofur vita þegar búið er að fá vinnu
og láta taka sig af skrá.
Eftir hádegið er svo mjög mikilvægt að gera
eitthvað uppbyggilegt fyrir sjálfan sig, t.d.
fara í líkamsrækt, sund, hitta vini, sinna
félagsstörfum o.s.frv. Það er ljóst að í framtíð-
inni kemur fólk til með að skipta um starf á 3-4
ára fresti og fær þ.a.l. líka oft synjun um starf
sem sótt er um. Ekki má láta það draga úr sér
þrótt og besta leiðin til að halda þróttinum er
að sinna heilsunni, jafnt líkamlega sem and-
lega. Það er mun líklegra að einstaklingur sem
hefur undirbúið sig vel og unnið skipulega í
öllu ferlinu verði jákvæður og hafi meira sjálfs-
öryggi þegar kemur að atvinnuviðtali en sá
einstaklingur sem hefur sinnt ferlinu óskipu-
lega og brotið sjálfan sig niður andlega. Því
eins og ég sagði hér áður, erum við að keppa
við svo marga á markaðinum og þurfum að
leggja alla krafta okkar og kænsku í atvinnu-
leitina. Gefðu þér því góðan tíma í undirbún-
inginn – næsta starf gæti verið ætlað fyrir þig!
Hvernig ber ég mig að í atvinnuleit?
eftir Öglu Sigríði
Björnsdóttur Atvinnuleit er ekkert annað
en markaðssetning á okkur
sjálfum
...........................................................
persona@persona.is
Höfundur er ráðningarstjóri Vinna.is
Lesendur Morg-
unblaðsins geta
komið spurn-
ingum varðandi
sálfræði-, félags-
leg og vinnu-
tengd málefni til sérfræðinga
á vegum persona.is. Senda
skal tölvupóst á persona@per-
sona.is og verður svarið jafn-
framt birt á persona.is.
ÞEIR sem beita starfsfólk breskra
sjúkrastofnana ofbeldi, hella yfir það
fúkyrðum eða sýna af sér annan
ruddaskap eiga á hættu að verða neit-
að um aðgang að sjúkrahúsum í allt
að eitt ár nái tillögur sem lagðar verða
fram á breska þinginu nú í haust fram
að ganga.
Svo rammt kveður að ofbeldismál-
um innan breska heilbrigðiskerfisins
að á síðasta ári urðu 65 þúsund starfs-
menn fyrir árásum og einn af hverj-
um þremur hjúkrunarfræðingum
mátti þola fúkyrðaflaum. Undanfarin
ár hefur ofbeldistilfellum fjölgað
mjög innan bresku heilbrigðisþjón-
ustunnar og í kjölfar þess hefur kom-
ið fram tillaga um að neita þeim sem
beita ofbeldi um aðgang að heilbrigð-
isþjónustu. Ekki munu þessar reglur
ná yfir þá sem haldnir eru geðsjúk-
dómum og leitast verður við að með-
höndla alla sem eru í bráðri lífshættu.
Sjúklingarnir sem hér um ræðir
munu fyrst fá aðvörun, eða gula
spjaldið, við fyrsta brot en við annað
brot það rauða sem felur í sér að þeim
verður neitað um aðstoð.
Gripið verður til fleiri aðgerða til að
auka öryggi starfsfólks á sjúkrahús-
um, til dæmis verður komið fyrir fleiri
eftirlitssjónvörpum, neyðarhnappar
settir upp og svo verður starfsfólki
boðið upp á kennslu í sjálfsvörn. Þyk-
ir nú mörgum sem undarleg staða sé
komin upp þegar þeir sem velja sér
þann starfa að liðsinna öðrum verða
að þola dónaskap og ofbeldi frá skjól-
stæðingum sínum eða jafnvel að-
standendum þeirra. Tony Blair, for-
sætisráðherra Bretlands, hefur heitið
þeim stofnunum stuðningi sem hyggj-
ast taka upp þessar nýju vinnureglur.
Sjúklingar
fá rauða
spjaldið
Bresk sjúkrahús
London. Reuters.
ALSJÁLFVIRKT gervihjarta hefur
í fyrsta sinn verið grætt í mann. Við-
brögð læknasamfélagsins við þessum
fregnum hafa verið allt frá varfærn-
um fögnuði yfir í harða gagnrýni.
Gervihjartað er búið til úr plasti og
títaníum og er á stærð við greipaldin.
Læknar við Háskólann í Louisville í
Kentucky í Bandaríkjunum græddu
það í deyjandi sjúkling sl. mánudag.
Talsmaður sjúkrahússins sagði að á
þriðjudagskvöld hefði sjúklingurinn
verið vakandi og fengið heimsókn
ástvina.
Læknar segjast vænta þess að
ígrædda hjartað lengi líf sjúklingsins
um einungis einn mánuð eða svo. En
tækið telst mikil tækniframför frá
þeim gervihjörtum sem notuð voru á
níunda áratugnum og eru tengd með
vírum og pípum við vélbúnað utan
líkamans.
Nýja hjartað, sem nefnist Abio-
Cor, er alveg sjálfvirkt og engir vírar
eða pípur eru tengdar við það. Því
kemur afl frá rafhlöðu sem borin er
utan á líkamanum og sendir straum í
gegnum húðina til ígrædds spennu-
keflis, stýrikassa og vararafhlöðu.
Ígrædda rafhlaðan, sem er á stærð
við venjulegan símboða, getur virkað
í um hálfa klukkustund á milli
hleðslna.
Einn af frumkvöðlum gervihjarta-
tækni í heiminum, dr. Robert K. Jar-
vik, var ekki of hrifinn af aðgerðinni.
„Margra ára reynsla hefur kennt
okkur að það er óþarfi að fjarlægja
hjartað,“ sagði hann. Nýja gervi-
hjartað væri það stórt að svo að segja
engin kona gæti notað það og þessi
tækni gæti nýst aðeins um einu pró-
senti þeirra sem kynnu að þurfa á
hjartaígræðslu að halda.
Dr. David Faxon, forseti banda-
rísku hjartasamtakanna, sagði
ígræðsluna ef til vill vera stórt skref
fram á við í þróun gervihjartatækni.
En draumurinn um ígræðanlegt, var-
anlegt gervihjarta væri enn ekki orð-
inn að veruleika. „Hér er auðvitað um
að ræða tilraun og langtímaárangur
af henni á eftir að koma í ljós,“ sagði
Faxon.
Blendin við-
brögð lækna
Louisville í Bandaríkjunum. AP.
ReutersNýja gervihjartað er búið til úr plasti og títaníum.
Fyrsta alsjálfvirka gervihjartað
grætt í mann
Tveir efnisþættir, sem birtir
hafa verið undanfarin misseri í
Vikulokunum á laugardögum,
færast yfir í Lesbók Morgun-
blaðsins frá og með deginum í
dag. Þetta eru Á slóðum Ferða-
félags Íslands og Vísindavefur
Háskólans.
Tvennt færist
yfir í Lesbók