Morgunblaðið - 29.10.2003, Blaðsíða 17

HÖFUÐBORGARSVÆÐIÐ
MORGUNBLAÐIÐ MIÐVIKUDAGUR 29. OKTÓBER 2003 17
#7 BLÁA LÓNI‹
ICELAND REVIEW
ÁSKRIFTARSÍMI 512-7517
askrift@icelandreview.com
HVERS VEGNA ÍSLAND?
40 ÁSTÆ‹UR
10 BIRTAN
FORELDRAR sem tóku tilmáls á opnum fundi umnýjungar í skólamálum áSeltjarnarnesi í fyrrakvöld
gagnrýndu forystumenn bæj-
arstjórnarinnar aðallega fyrir
hvernig staðið var að ákvörðun um
sameiningu yfirstjórna grunnskóla
bæjarfélagsins. Minna bar á efn-
islegri gagnrýni á samþykkt bæj-
arstjórnar.
Um 200 manns mættu á fundinn
til að ræða þessa ákvörðun meiri-
hluta bæjarstjórnar Seltjarnarness
frá 8. október sl. Að því undanskildu
að skólastjórum verður fækkað um
einn er engin önnur breyting á
starfsmannahaldi fyrirhuguð. Jón-
mundur Guðmarsson bæjarstjóri
benti á að um 1500 manns teldust til
foreldra og forráðamanna barna á
Seltjarnarnesi og var fundurinn
haldinn í íþróttamiðstöðinni til að
geta tekið við svo miklum fjölda.
Í máli Jónmundar kom fram að
markmiðið með þessum breytingum
væri ekki að spara útgjöld til
fræðslumála. Rúmlega helmingi af
öllum skatttekjum bæjarins sé varið
til skólastarfs eða nokkuð á þriðja
milljarð króna á þessu kjörtímabili.
Efast hann um að nokkurt annað
bæjarfélag geri betur.
„Með hliðsjón af þessari stað-
reynd er ljóst að frekari umbætur í
skólamálum munu á komandi árum
fyrst og fremst ráðast af markvissri
ráðstöfun þessara fjármuna fremur
en unnt verði að auka hlutfall
fræðslumála í rekstri bæjarins til
einhverra muna,“ sagði Jónmundur.
Krefst samvinnu við skólafólk
Bjarni Torfi Álfþórsson, formaður
skólanefndar Seltjarnarness, lagði í
sínu máli áherslu á sóknarfærin sem
fælust í þessum breytingum. Þetta
væri álitlegur kostur fyrst og fremst
fyrir þá sem skólarnir þjóna; nem-
endur og foreldra þeirra. Marg-
vísleg gögn liggi fyrir sem fjalli á
einn eða annan hátt um kosti sam-
eiginlegrar stjórnunar grunnskóla.
Með betra stjórnunarteymi yrði til
öflugri vinnustaður og ný tækifæri
fyrir kennara. Tillagan miði ekki að
því að spara fjármuni heldur nýta þá
betur í þágu þeirra sem sæki
skólana og vinni þar.
Bjarni sagði það kröfu meirihluta
Seltjarnarness að skólastjórnendur
ynnu með þeim að þessari breyt-
ingu. Það eigi að gera þær faglegu
kröfur til þeirra, sem einu af æðstu
starfsmönnum bæjarfélagsins, að
þeir vinni með kjörnum fulltrúum að
eflingu skólastarfsins.
Nokkur tími fundarins fór í að
ræða nálgun kennara og starfsfólks
á málinu. Ólga hefur verið innan
starfsliða skólanna aðallega vegna
þess, eins og komið hefur fram, að
það var ekki haft með í ráðum áður
en ákvörðunin var tekin.
Pólitískur áróður í fréttabréfi
Jónmundur velti meðal annars
fram þeirri spurningu hvort það
væri eðlilegt að kennarar, starfs-
menn Seltirninga, hefðu uppi gíf-
uryrði um samstarfsmenn sína í til-
raun til að þvinga kjörna fulltrúa til
að víkja frá sannfæringu sinni. „Er
það eðlilegt að fréttabréf annars
skólans sé beinlínis notað til að flytja
einhliða pólitískan áróður? Er það
viðunandi að vefsíður skólanna, op-
inberra stofnana, séu notaðar til að
birta pólitískar ályktanir gegn yf-
irstjórn bæjarins? Mundi slíkt við-
gangast á ykkar vinnustöðum?“
spurði Jónmundur foreldrana.
Sagði hann að pólitískir fulltrúar
minnihlutans reyndu að beita sam-
tökum foreldra fyrir sig í pólitískum
tilgangi og þeir sem sitji í for-
eldraráðum beiti sér þar af þunga í
fullkominni þversögn við sérstakan
úrskurð menntamálaráðuneytisins
um hagsmunaárekstra þar að lút-
andi.
Þetta er alvarlegt álitaefni að mati
bæjarstjórans sem enginn getur vik-
ist undan að taka afstöðu til þegar
rætt er um lýðræði og fagleg vinnu-
brögð. Nefndi hann að unnið sé að
samantekt um þessi efni sem lögð
yrði fram í skólanefnd.
Foreldraráð ekki pólitískt tæki
Þorsteinn Magnússon, formaður
foreldraráðs Mýrarhúsaskóla, sagði
ósmekklegt af Jónmundi að ýja að
því að foreldraráð sé pólitískt tæki
minnihluta bæjarstjórnar. Svo væri
auðvitað ekki heldur sætu þar for-
eldrar sem hefðu hagsmuni
barnanna og skólans að leiðarljósi.
Hann mótmælti einnig þeim orð-
um Jónmundar að eindreginn stuðn-
ingur væri innan foreldraráða um
tillögur bæjarstjórnarinnar. Ekki
kannaðist Þorsteinn við það og sagði
ráðin ekki hafa fengið nægileg gögn
til að taka ákvörðun á faglegum
grunni.
Formaður foreldraráðs Mýr-
arhúsaskóla sagði að óskað hafi ver-
ið formlega eftir áliti mennta-
málaráðuneytisins á því, hvort
bæjarstjórn hefði borið að fá um-
sögn foreldraráða áður en tillaga um
sameiginlega yfirstjórn grunnskól-
anna var samþykkt 8. október sl.
Sagði hann lögin ekki ótvíræð í þá
veru en þó væri hægt að komast að
þeirri niðurstöðu af fyrri álitum
ráðuneytisins, sem fjölluðu um vald-
svið og umsagnarrétt foreldraráða
grunnskóla.
Lagði hann áherslu á að þetta
væri ekki gert til að bregða fæti fyr-
ir kjörna fulltrúa í bæjarstjórn. For-
eldraráðin hefðu ekki tekið efnislega
afstöðu og vildu fá að kynna sér mál-
ið áður. Benti hann m.a. á að þessi
fundur væri fyrsta innlegg bæjaryf-
irvalda til að reyna að útskýra fyrir
foreldrum áform sín.
Efnt til óvinafundar að óþörfu
Páll Vilhjálmsson sagði að ekkert
samráð hafi verið haft við foreldra
eða starfsfólk skólanna og því gert
að samþykkja þessa fyrirskipun
þegjandi og hljóðalaust. Taldi hann
óþarfa að efna til þessa óvinafundar
þegar hægt var að kynna málið áður
og ræða við hlutaðeigandi aðila.
Framkoma forystumanna Seltjarn-
arnesbæjar væri ekki til að ná sátt
um málið.
Stefán Pétursson, foreldri og
fulltrúi í foreldraráði Mýrarhúsa-
skóla, spurði Guðmund Oddsson,
skólastjóra Kársnesskóla, sem var
gestur á fundinum, hvernig samein-
ing yfirstjórnar grunnskólanna í
Kópavogi hafði áhrif á kennslu
barnanna. Guðmundur svaraði að
hann gæti fullyrt að kennslan væri
ekki verri nema síður sé. Breytingin
hefði leitt margt gott af sér. Áður
hafði hann sagt að plúsarnir væru
tvímælalaust fleiri en mínusarnir.
Það eina sem krakkarnir kvörtuðu
yfir væri að þau sæju ekki skóla-
stjórann sinn eins oft og áður. Það
væri stærsti mínusinn en faglegur
ávinningur væri ótvíræður.
Hvað lá á?
Nokkrir óskuðu eftir skýringum á
því af hverju þessi ákvörðun var tek-
in í svo miklum flýti. „Hvað lá á?“
spurði einn fundarmannanna og
sagði óánægju kennara klárlega
vinna þessum fyrirætlunum ógagn.
Af hverju var ekki hægt að kynna
málið betur og hrinda þessu í fram-
kvæmd eftir tvö ár eða þrjú var
spurt.
Bjarni Torfi Álfþórsson, formaður
skólanefndar, sagði vissulega hægt
að bíða og horfa á þegar allt gengi
vel. Hins vegar vildu stjórnendur
bæjarins efla skólastarfið enn frekar
og því væri farið í þessar skipulags-
breytingar. Aðföng yrðu betur nýtt,
starf millistjórnenda eflt, getan til
að bregðast við frávikum í skóla-
starfi aukin og skólarnir yrðu álit-
legri kostur í samkeppni við aðra
skóla, t.d. einkaskóla.
Sagði hann þá sem lasta þessar
áætlanir ekki vinna skólastarfi á Sel-
tjarnarnesi gagn. Endaði hann mál
sitt með því að vitna í spurningu sjö
ára sonar síns frá því um morg-
uninn, sem hann las upp úr gátubók-
inni sinni. Spurði hann pabba sinn
hvað væri það auðveldasta í heim-
inum. Svarið var að lasta.
Framtíðarsýn bæjarfulltrúa
Jónmundur sagði réttilega hægt
að deila á málið. Hann hélt þó að
deilan hefði orðið sú sama þótt hin
leiðin hefði verið farin og málið
kynnt vel fyrst fyrir starfsfólki skól-
anna og foreldrum. Þetta væri fram-
tíðarsýn meirihluta bæjarstjórnar
Seltjarnarness í skólamálum og um
markmiðið efuðust fáir. Eftir þeirri
sannfæringu ynnu bæjarfulltrúar og
nú ríði á að fólk sameinist með heill
nemendanna að leiðarljósi.
Foreldrar á Seltjarnarnesi fjölmenntu á borgarafund um sameiningu grunnskólanna
Fleiri tækifæri við sameiningu
Morgunblaðið/Þorkell
Á fundi með foreldrum á Seltjarnarnesi kom fram að vinna þurfi með kennurum að breytingum í skólastarfi.
Kurr er meðal foreldra
á Seltjarnarnesi vegna
samþykktar bæjar-
stjórnar að sameina
yfirstjórnir Valhúsa-
skóla og Mýrarhúsa-
skóla. Forystumenn
bæjarfélagsins drógu
fram kosti sameiningar
á fjölmennum foreldra-
fundi og reyndu að
fylkja fólki um ágæti
málstaðarins.
GUÐMUNDUR Oddsson, skólastjóri Kársnesskóla, var
gestur fundarins og svaraði spurningum frá foreldrum.
Ekki er langt síðan yfirstjórn hans skóla var sameinuð
Þinghólsskóla í Kópavogi og sagði Guðmundur aðstæður
á Seltjarnarnesi nú svipaðar. Eftir sína reynslu væri
ávinningur af sameiningunni tvímælalaust meiri en gall-
arnir. Fólk ætti að vinna saman að þessum breytingum
eftir að ákvörðun hafi verið tekin af kjörnum fulltrúum.
Ef vilji væri til að fella íhaldið ætti að gera það í næstu
kosningum en ekki láta það bitna á skólastarfinu.
Stærsti mínusinn við sameininguna, sem kom meðal
annars fram í sjálfsmati skólanna, sagði Guðmundur
vera að krakkarnir kvörtuðu yfir að sjá skólastjórann
sinn ekki nógu oft.
Skólastjórinn sjaldséður